Pulang mga Patak Diha sa Niyebe—Gawas Kon sa Sayo sa Tinghunlak

“KAS-A nga makita, dili na gayod hikalimtan; ang hayag nga pagkapula masulaw diha sa nasala nga sidlak sa adlaw diha sa madulom nga salog sa kalasangan.” Mikomento ang Western Forests, usa ka giya nga basahon sa Audubon Society, bahin sa tanom nga gitawag ug snow plant, Sarcodes sanguinea. Mas makahingangha pa kini kon makita nimo kini nga sayosayo pa, dihang kini moturok diha sa nagpabiling mga patak sa niyebe. “Usa ka talagsaong tanom nga tambok, unoron, hayag nga pagkapula, nga may mga dahon nga nagsapaw sa ubos nga punoan ug nagkulapot sa tunga sa mga pungpong sa mga bulak sa itaas,” dugang pa sa Western Forests. Ang puy-anan niini makita lamang diha sa bukirong kalasangan sa mga kahoyng pino sa California ug sa habagatang Oregon.

Ang snow plant maoy usa sa mga saprophyte, usa ka grupo sa mga tanom nga walay berde nga materya, walay chlorophyll, ug busa dili makahimo ug photosynthesis. Ang mga saprophyte mabuhi diha sa patay o nagakadunot nga tanom o hugaw sa hayop. Ang mga kaupas, agup-op, ug ubang mga fungi ug pipila ka bakterya maoy mga saprophyte, apan lakip usab niining grupoha mao ang pipila ka tanom nga nagapamulak. Ang snow plant maoy usa niini.

Ang ubang mas taas nga mga tanom nga saprophyte bug-os nagasalig sa pipila ka fungi alang sa pagkaon, nga gitawag ug mycorrhizal nga relasyon​—nga makaayo nilang duha nga kombinasyon sa fungus (myco) ug sa sistema sa gamot (rhiza) sa usa ka mas taas nga tanom. Sa maong mga kahimtang ang mga gamot sa saprophyte sa kinaiyanhon walay mga buhok-buhok sa gamot. Ang fungus mao ang motrabaho sa pagsuyop sa mga minerales ug sa kaumog. Ang The Encyclopedia Americana (International Edition) nag-ingon: “Ang kahinungdanon sa mycorrhizae ingong nag-inagaray nga mga pag-ubanay nadiskobrehan sa hinapos sa ika-19ng siglo sa botanistang Aleman nga si Albert Bernard Frank ingong sanga sa usa ka pagtuon sa pagpasanay ug truffle alang sa kagamhanan sa Prussia.”