Ang mga Kabayo Maoy Akong Kinabuhi Kaniadto
Ang gagmay kaayong mga kuko ang migawas ug una, gisundan sa ulo nga napatong sa usa ka paris sa pangunahang mga tiil. Naglisod ako sa mga abaga, apan ang nahibilin migawas nga dali ra kaayo. Dihang giputol na ang pusod, milukso ang baye nga kabayo, mibihihi tungod sa kalipay ug sa pagpinaabot nga makita ang iyang nati.
KINI maoy usa lamang sa daghang higayon nga ako mobangon sa akong katre sa gabii sa pagtabang sa “inahan” sa iyang pagpanganak. Gidawat ko kini nga walay reklamo. Abi god nimo, ang pagpasanay ug purebred o kabayo nga wala paliwati ug laing matang maoy akong gikaikagan kaayo kaniadto.
Ang akong gugma sa mga kabayo nagsugod sa bata pa ako kaayo. Ako nagsugod na sa pagsakay sa sayis anyos pa ako. Natawo sa Roncq, sa amihanang Pransiya, gipadako ako sa Katolikong mga ginikanan, nga nagpaeskuyla nako sa Katolikong eskuylahan sa mga interno alang sa akong sekondaryang edukasyon. Walay mga eskuylahan alang sa mga pagpasanay sa mga kabayo, busa mihukom ako sa pag-undang sa pagtungha ug mosulod sa kalibotan sa mga kabayo. Nagsugod ako uban sa usa ka magbabansay sa Chantilly, usa ka lungsod sa amihanan sa Paris nga ilado sa iyang mga kabayong purebred. Didto, nasabtan ko ang malisod, mapig-oton nga kalibotan sa lumba. Nganong malisod? Ang mga kabayong-iglulumba ikatandi sa hawod kaayo nga mga magdudula—gikinahanglan nila ang kanunay nga paggalam.
Pagbansay sa mga Kabayong-Iglulumba
Ang delikadong yugto sa pagbansay ug pagpangandam sagad mosugod sa tinghunlak sa dihang ang mga kabayo 18 ka bulan na. Sila kinahanglang maanad sa ilang bag-ong mga palibot ug makakat-on sa pagkalimot sa ilang pagduladula, magtininuod sa trabaho. Una, kinahanglang paanaron una sa busal ang kabayo sa tigbansay, nga dili sayon nga trabaho.
Ang pagbakos lang sa kabayo magpaulpot-ulpot na niini! Ang nati kinahanglang bansayon nga maanad sa montura, ug sa kataposan panahon na aron ang kabayo sakyan sa unang higayon. Ang una nga mosakay sagad pilion taliwala niadtong gibansay nga mahimong mga hinete. Busa masinati sa kadaghanan kanila ang ilang unang kapildihan sa pagkahulog! Ang pagbansay sa mga kabayo nagkinahanglag dakong kahanas ug pailob, nga inubanag malulot nga pagdumala. Sa pagkatinuod, kon ang hayop maakagi ug dili maayong kasinatian, ang tibuok karera niini sa pagpakiglumba mameligro.
Kada buntag sayo, ipagawas namo ang mga kabayo aron tudloan sila sa nagkalainlaing paagi sa linaktan—sa ato pa ang paagi sa paglakaw, sa inug-og nga paglakaw, ug sa hinay nga pagdagan—ang tanan maoy hinungdanong bahin sa pagbansay. Sa dihang mabansay na, ang kabayo kinahanglang sunod-sunod nga makausab sa paagi sa paglakaw sumala sa mando. Apan, ang daklit nga pagdagan ug paglukso himoon usahay, pasagdan ang mga kabayo nga libreng makadagan sa mubong distansiya.
Sa kataposan sa buntag, mamalik kami sa mga kuwadra ug sudlayog maayo ang buhok sa kabayo. Ang tanang lama sa singot pahiran, ug ang ilang mga kuko usab mainampingong hinloan.
Kon maayo ang pag-uswag sa kabayo, kini makasugod na sa pag-apil sa mga lumba alang sa mga dos anyos sa kataposan sa tingtugnaw. Ang karera sa purebred sa katibuk-an matapos sa kataposan sa ikatulo o, sa kinaulahian, sa ikaupat ka tuig niini. Ang mga trotter o ordinaryong mga kabayo nga nagalumbang may karwahe nga giguyod, hinunoa, magpadayon sa pagpakiglumba hangtod sa otso anyos ang edad.
Akong mga Pangandoy Natuman
Sanglit naikag kaayo sa pagpasanay ug mga kabayo, ako nagsugod sa pagbansay diha sa umahan sa mga kabayo sa Normandy, sa amihanan-kasadpang Pransiya—usa ka maayo kaayong dapit sa pagpasanay ug mga kabayong iglulumba tungod sa klima niini ug sa malabong nga mga pastohan. Sa ikanapulog-walo ka bulan sa ulahi ako nahimong luyo-luyong direktor sa Bois-Roussel Stud Farm, ang kinadak-an sa Uropa niadtong panahona, nga may 300 ka kabayo nga atimanon ug gatosan ka ektarya ang luna.
Sa Bois-Roussel Stud Farm, nahibalag ko ang babaye nga nahimong akong asawa; siya nagtrabaho didto ingong usa ka sekretarya. Wala gayod akoy ideya kon sa unsang paagi kini makaapektar sa akong kinabuhi. Abi god nimo, nasinati niya ang mga Saksi ni Jehova ug misugod sa pagpakig-estorya kanako bahin kanila. Niadtong panahona dili pa ako interesado.
Sa dihang nadungog sa direktor ang among plano nga magminyo sa pipila ka bulan, iya kaming gihangyo kon buot namo nga maoy modumala sa laing umahan sa kabayo diin siya maoy kasosyo nga tag-iya. Busa natuman ang akong gipakahamili nga pangandoy. Ania ako, direktor sa usa ka dakong umahan sa kabayo sa edad 24! Diyutay lamang ang mga direktor sa umahan sa kabayo sa Pransiya; kini nga trabahoa angay lamang sa mga membro sa eksklusibong grupo sa natad sa lumba sa kabayo. Mas gamay kay sa Bois-Roussel, ang La Louvière Breeding Farm nahimutang usab sa Normandy ug alang kanako kini maoy gamay nga paraiso sa 100 ka ektarya, nga may mga usa ka gatos ka kabayo, lakip sa mga laki, baye, ug mga nati nga kabayo.
Sanglit ang direktor kanhi may unom pa ka semana una pa mogikan, gitanyagan kami sa tag-iya sa pagbiyahe ngadto sa Tinipong Bansa. Kami nakaduaw ug dagkong mga umahan sa kabayo sa Amerika sa pagtuon sa ilang mga paagi sa pagpasanay ug nakigkontak sa ubay-ubay nga mga umahan nga maoy among padalhan sa among mga baye nga kabayo aron paliwatan sa ilang mga laki nga mga kabayo.
Kinabuhi Diha sa Umahan sa Kabayo
Ang kinabuhi diha sa umahan sa kabayo makalinga apan tinong dili mabudlay. Sa pagkatinuod, natagbaw kaayo kami niini, kay kami kanunayng nahiduol sa kinaiyahan ug may maanindot, mahimsog nga mga hayop nga ginaatiman. Sa buntag kami mahigmata sa hinay nga tingog sa mga kabayo nga nanibsib sa lunhawng mga sagbot. Matahom kaayo kini nga musika alang sa akong dalunggan!
Ang trabaho sa umahan gibahin sa mga panahon sa pagpahabal ug sa pagpaanak, sa paglutas sa mga nati, ug sa pagbaligya sa batan-ong mga purebred. Ang mga laki nga kabayo mainampingong pilion sumala sa maayong mga rekord sa pagpakiglumba, ingon man ang kaliwat ug kagikan. Sa matag tingpamulak mga 40 ka baye nga kabayo ang pahabalan, ug gatosan ka libong dolyar ang ibayad aron makabatog purebred nga laking kabayo nga may talagsaong rekord nga magpaliwat sa nati. Tungod sa maong mga puhonan, daling masabtan kon nganong dakong paggalam ang gikinahanglan sa panahon sa pagmabdos ug sa mga yugto sa pagpanganak.
Ikasubo, ang mga aksidente mahitabo, ug usahay ang gamayng nati mailo inigpanganak. Niining bahina among atubangon ang malisod nga trabaho sa pagdani sa parehog matang nga baye nga kabayo sa pagsagop niini. Pugngan sa mga suta ang baye nga kabayo, nga magpulihay sa adlaw ug gabii sa mga 48 oras, sa dihang ang gamayng nati ipaduol aron pasusuhon. Kinahanglang gunitan ang baye nga kabayo aron dili makapatid, kay seguradong mapatay niya ang nailo nga nati. Ang usa sa pangunahang mga tiil sa baye nga kabayo ipadap-ig sa iyang tiyan ug ang galong pahugtan diha sa iyang itaas nga baba aron mapugngan siya.
Sa kadugayan kapoyan ang baye nga kabayo, ug segurado ang kalamposan dihang sa kataposan iyang madawat ang nati. Kasagaran, ang bag-ong inahan mapanalipdanon kaayo nga lisod gani bisan ang pagduol sa nati. Ang gipanganak kinahanglang ipahibalo dayon sa French National Registry, diin kini iparehistro alang sa partikular nga liwat.
Mga Kabayo ug mga Nati
Pipila ka adlaw human sa pagpanganak, ang baye nga mga kabayo, nga sundan sa ilang mga nati, dalhon ngadto sa mga kinoralan nga tugwayan. Sama sa daghang nati nga mga hayop, ang mga nati magpatuyang sa pag-iktin-iktin dayon, malipayong maglumpatlumpat libot sa ilang mga inahan ug mamatid sa tanang direksiyon. Pagkanindot nilang tan-awon nga nagluksolukso, nagsintahay, ug naligidligid sa sagbot! Gusto kaayo silag tubig ug maikagong magtampisaw sa tanang panahon diha sa tubig.
Ang mga kabayo dili gustong mag-inusara ug dali rang laayan. Apan, ang mga laki nga kabayo ug ang ginabansay nga mga nati kinahanglang lainon. Kon ang kabayo dili makaagwanta nga mag-inusara, pangitaan gayod siyag kauban nga hayop. Kami naobligar sa paghatag sa usa sa among mga laki nga kabayo ug karnero. Sila nagkasinabot ug maayo. Ngani, dili gayod biyaan sa karnero ang kabayo sa adlaw o gabii. Usa ka kampeyon nga kabayong iglulumba nga ginganlag Allez France adunay kaubang karnero nga mikuyog kaniya bisan ngadto sa mga lumbaanan—bisan tuod ug dili apil sa mga lumba mismo!
Ang Agosto maoy panahon sa paglutas, usa ka makasubong panahon alang sa mga inahan ug sa mga nati. Kinahanglan silang bulagon ug kinahanglang dili magkita o bisan magdungganay sa usag usa. Ipakita sa mga nati ang ilang kasubo pinaagi sa kanunayng pagbihihi sa daghang adlaw, hangtod nga sila maulian sa ilang kasubo. Sa Enero 1 sa tuig human sa ilang pagkahimugso, sila tawgong mga tuigang nati. Sa tinuig nga mga subasta sa Deauville, sayon ra kaayong kab-oton ang prisyo sa usa ka tuigang nati ang kapin sa usa ka milyong dolyar.
Ang ubang mga kabayo nga natawo ug gipaliwat diha sa among umahan sa kabayo may malamposong mga karera. Ang usa niana si High Echelon, nga nakadaog sa Prix ďAmérique sa 1979, ingong kampeyon sa kalibotan sa trotter nga kategoriya. May ubang purebred usab kami nga nakadaog sa daghang dagkong klasikong mga lumba.
Napailaila sa Kamatuoran
Daghang bulan ang milabay diha sa bag-ong umahan nga wala kami maduaw sa mga Saksi ni Jehova. Busa ang akong asawa misugyot nga mosulat ako sa duol nga kongregasyon sa paghangyo nga dunay usa nga moduaw. Pipila ka adlaw sa ulahi, usa ka magtiayon miabot sa among pultahan. Para nako, ako dili makatuo nga tukmang gihubit sa Bibliya ang atong adlaw. Sa dihang gisultihan ako sa akong asawa nga ang Gingharian sa Diyos natukod na sa 1914, gibati ko nga kini interpretasyon lang sa mga Saksi. Wala ko makita kanang petsaha diha sa Bibliya.
Dugay ang among panaghisgot uban sa magtiayon, kinsa maoy bug-os panahong mga ebanghelisador, ug ang ilang pagpatin-aw—ilabina sa basahon sa Daniel—nakapukaw sa akong interes, ug ako miuyon sa pagtuon sa Bibliya. Apan, kini lisod nga ipahaom sa akong eskedyol, kay ako okupado kaayo sa akong trabaho.
Ang magtiayon mibiyaheg 25 kilometros sa pagduaw kanamo ug sagad mopauli nga dili makadumala sa among pagtuon sa Bibliya tungod kay ako napugos sa pagbantay sa nagkasakit nga kabayo o nag-atiman sa nanganak nga kabayo. Apan sa nagdako ang akong apresasyon sa panginahanglan nga hatagag unang dapit ang mga intereses sa Gingharian ug ang pagkamatarong sa Diyos, mihimo akog mga lakang sa ‘pagpahimulos sa higayon’ alang sa pagtuon.—Efeso 5:16; Mateo 6:33.
Giatubang ang Pagpili
Wala magdugay misugod kami sa pagtambong sa mga tigom, ug unom ka bulan sa ulahi mitambong ako sa “Balaang Pagkasoberano” Distritong Kombensiyon sa 1975 sa Annecy, habagatan-silangang Pransiya. Sa panahon sa maong kombensiyon, naamgohan ko nga ang akong trabaho wala mahiuyon sa Bibliya. Nasabtan ko ang prinsipyo nga gipahayag diha sa Isaias 65:11, nga sa tin-aw nagpakita nga “kadtong nag-andam sa lamesa alang sa diyos sa Maayong Kapalaran” dili uyonan sa Diyos. Sanglit kami nagpasanay lamang ug mga kabayong iglulumba, kami sa dili direkta nakaamot sa industriya sa pagpanugal. Ang among mga konsensiya wala motugot kanamo nga magpabawtismo.
Ang panahon miabot alang sa labing hinungdanong desisyon. Magpadayon ba ako sa akong minahal nga karera o ipahinungod ang akong kinabuhi kang Jehova nga Diyos? Sanglit ang kabubut-on sa Diyos nahimong ang labing hinungdanong butang sa akong kinabuhi, akong gipakighisgotan ang maong butang sa duha ka tag-iya ug gitunol ko ang akong pagluwat. Nagpabilin pa akog usa ka tuig nga nagpaabot sa akong kapuli, apan sa misunod nga sirkitong asembliya, nga gihimo sa Septiyembre 1976 sa Gargenville (dapit sa Paris), ako ug ang akong asawa gibawtismohan.
Diha sa kalibotan sa pagpasanay ug mga kabayo, nahibaloan sa daghang tawo ang akong desisyon. Nahinumdoman ko ilabina ang usa ka siruhano sa ospital nga miduaw sa among umahan. Siya miingon nga sa moral nga panghunahuna, siya bug-os nga nakasabot kon nganong gipili ko ang maong desisyon. Nagtan-aw sa palibot, siya nakadayeg sa kaanindot sa umahan sa pagpasanay ug kabayo—ang mabulokong nataran sa mga bulak, ang bungbong nga kahoy sa matag usa nga kuwadra sa mga kabayo, ang koral nga putig pintal nga mga milya ang gilay-on. Siya miingon nga sa pagtandi siya dili makahimo sa pagpatungha sa gikinahanglang salapi sa paggalam ug sa pag-adorno sa iyang ospital.
Wala gayod ako magbasol sa akong desisyon. Ang akong asawa ug ako mibiya sa Pransiya sayo sa 1992 sa pag-alagad sa nagasultig-Pranses nga teritoryo diin mas dako ang panginahanglan sa mga magmamantala sa Gingharian. Didto, ako nakapribilehiyo sa pag-alagad ingong usa ka ansiano sa kongregasyon sa mga Saksi ni Jehova. Managsama kamig hunahuna ni apostol Pablo nga gipahayag diha sa Filipos 3:8: “Sa pagkatinuod giisip ko ang tanang butang nga kapildihan tungod sa labawng kabililhon sa pagkaila kang Kristo Jesus nga akong Ginoo. Tungod kaniya napildihan ako sa tanang butang ug kini sila giisip ko nga basura, aron lamang maangkon ko si Kristo.”
Ang akong asawa ug ako nahigugma gihapon sa kinaiyahan ug sa mga hayop, ilabina sa mga kabayo. Kami nagapaabot sa adlaw sa dihang ang relasyon sa tawo uban sa hayop dili na unya ipasukad sa mahakogong ganansiya.—Sumala sa giasoy ni Stephane Jesuspret.