Kon Makasulti pa Lang Kana nga Pigurin!
“PAG-AMPING gayod! Dili ko gustong mabuak siya!” Mao kanay sagad isulti ni Jane samtang iya akong ipasigarbo sa iyang mga higala, ilabina kon dunay usa nga buot mohikap kanako. Buweno, ako maoy gipakamahal nga kabtangan. Ug ako nahibalo nga gipabilhan ako ni John ug Jane—giampingan gayod nila ako pag-ayo. Apan kon isulti ang kamatuoran, dili ako ingon niana ka daling mabuak.
Nagtan-aw sa akong hamis kaayong pagkapintal nga mga mata sa mga tawong nagadayeg kanako, ako makakatawa sa akong kaugalingon sa mga paagi sa paggama kanako. Walay tawo ang arang makaantos sa maong grabeng kasinatian! Usa kini ka makaiikag nga sugilanon.
Pilit nga mga Sinugdanan
Ang china clay, maoy akong pangunang sambog, masahon uban sa puting granito ug sa pinulbos nga bukog sa hayop, nga sagolag tubig. Kinahanglang eksaktong pagkatimbang ang sambog niini. Kuhaon sa mga elektromagnetiko ang bisan unsang puthaw nga mga partikulo nga tingali anaa sa espiso nga likido, o slip, ingon sa pagtawag niana sa industriya sa pigurin, nga human niini pug-an kinig tubig hangtod mahisama kini sa tibugol nga Plasticine.
Ang slip itulod ngadto sa galingan, nga samag usa ka higanting makina nga mikser, nga pagaukayon ug masahon. Kuhaon sa vacuum pump ang tanang mga bulabula nga hangin, nga mopahinabo sa akong minasa nga moliki dihang kini idangka na sa hurnohan.
Ang akong tigdesinyo nakahimog usa ka molde kanako nga maoy mga 13 porsiento nga mas dako kay sa ako unyang sangpotan. Ug dili ikahibulong! Ako mokuyos sa dihang ako idangka sa hurnohan sa tulo o upat ka beses sa temperatura nga gikan sa 800 ngadto sa 1,200 ka grado Celsius. Aw, oo, mokabat pa ug daghang bulan sa pagtrabaho sa dili pa ako makapahiyom kanimo sa akong maarangan. Pasagdi akong mosugilon pa kanimo ug dugang.
Pagtaod sa mga Bahin
Nagtuo ka ba nga ako gihulma sa usa lang ka bahin? Mao kanay pagtuo sa kadaghanan sa mga tawo, apan layo kana sa kamatuoran. Hulmahon ako diha sa daghang eskayola nga hulmahan nga mokuha sa umog aron mobagtok pag-ayo ang akong minasa. Sa dihang sa ulahi buksan na sa akong maghuhulma ang iyang molde, anaa ako, nga bulag-bulag—ang akong ulo dinhi, ang tiil didto, ang akong sayal maampingong gibutang sa laing lugar. O, pagkadako sa akong pangandoy nga matibuok ako!
Uban sa maampingong kamot gunitan ako sa tigtaod sa mga bahin nako. Nalipay ako nga iyang namatikdan ang sagalsalong mga daplin nga nabilin sa mga molde. Maampingon niyang gipahamis kini, lakip na ang ngil-ad nga sinumpayan libot sa akong ulo. Maarang-arang na ang akong gibati! Uban sa dakong kahanas iyang gisumpay ang akong mga bukton sa akong lawas, naneguro nga ang hapin sa akong bukton maayong pagkapuwesto. Sama kahanas sa usa ka siruhano, siya nagsumpay ug nagdugtong hangtod nga walay usa ang makatuo nga ang akong kinabuhi bulag-bulag.
Karon ako paughon. Sanglit wala may timaan nga may mga liki nga nakita, andam na ako sa mga pagsulay sa kalayo. Painiton ang hurnohan, ug ako hinay nga gibutang ngadto niana, uban sa daghan pang pigurin.
Dekorasyon
Ang tingog sa inspektor miingon bahin kanako, “Maanindot!” Ako giaprobahan, ug karon naglinya ako aron dalhon ngadto sa departamento sa dekorasyon. Sapawan ako ug likidong kristal nga komong gitawag ug glaze, nga nagpasabot nga ituslob ako sa kawa sa likidong kristal. Unya, ngadto na usab ako sa hurnohan aron mogawas nga sinaw ug hamis, andam na aron ako apasan ug lainlaing kolor sa likidong kristal.
Ako pintalan lang nga kinamot, mao nga walay duha kanamo nga pigurin ang managsamag hitsura. Nagkinahanglag daghang tuig ang pagbansay, ug miingon ang batan-ong babaye nga maoy mopintal nako nga kinahanaglang iya akong pintalan nga dili magkurog ang kamot ug sa madali. Kay kondili, moporma ang mga linya sa dapit nga mouga ang pintal.
Nakaangay ka ba sa akong mga mata? Kini ang kinalisoran sa tanan. Usa ka adlaw nadungog ko ang mamimintal nga miingon sa iyang higala nga kinahanglang ipahimutang niya ako ug maayo diha sa bangko ug moginhawag lalom ug pugngan kana hangtod ang kinapinohang mga badlis sa akong mga mata, tabon-tabon, ug mga kilay matapos. Ang gamay nga pagginhawa o paglihok makadaot sa badlis sa brotsa sa usa lang ka pamilok, nadunggan ko siyang misulti niana.
Busa karon ako nabistihan na, ug gitawag ako ug Autumn Breeze. Diha sa akong tumbanan maampingong gipapilit ang akong ngalan ug ang ngalan sa naghimo kanako—timaan nga giaprobahan, sa ato pa. Ihurno ako sa kataposan aron hugot nga motapot ang gipintal sa akong nawong, ug ako andam na sa pag-adto sa bisan diing dapit sa kalibotan.
Sa pagkatinuod, ako gilaraw alang sa lokal nga baligyaan ug nagpabilin sa Inglaterra, diin ako nakita ni John. Nalipay ako nga iya akong nakita. Si Jane, iyang asawa, nalipay kaayo sa dihang iya akong gihatag ngadto kaniya sa paghandom sa ilang ika-25 nga anibersaryo sa kasal. Kadto ang unang higayon nga nadunggan ko si Jane nga miingon: “O, ampingi gayod pag-ayo! Dili ko gusto nga mabuak siya!” Maayo kaayo ang pagkasayod nga luwas ako diha sa ilang mga kamot. Ug lalim kaayo nga makahatag ug kalipay—ug ginapabilhan.
[Mga hulagway sa panid 26]
Gisumpay sa tigtaod ang nagkalainlaing mga bahin sa pigurin aron maandam alang sa hurnohan
Nagbubo sa slip gikan sa galingan ngadto sa mga moldeng eskayola
Nagbukas sa moldeng eskayola
Human ituslob sa kristal nga likido, ang pigurin pintalan nga kinamot nga sapawan ug nagkalainlaing kolor
Binatid nga gidibuhoan ang mga bahin sa nawong
[Credit Line]
Tanang letrato: Sa panugot sa Royal Doulton
[Picture Credit Line sa panid 25]
“Autumn Breeze,” sa panugot sa Royal Doulton