Sa Dihang ang Tanang Rasa Hiusang Magpuyo Diha sa Pakigdait

GIBUHAT [sa Diyos] ang tanang nasod sa katawhan gikan sa usa ka tawo, aron papuy-on sa tibuok nawong sa yuta.” (Buhat 17:26) Mao kana ang yanong pahayag sa Bibliya bahin sa sinugdanan sa tawhanong pamilya.

Ang gipasabot niana mao nga ang tanang katawhan, bisag diin sila nagpuyo o bisag unsa pay ilang pisikal nga mga kinaiya, usa ray ginikanan. Kana nagpasabot usab nga bisan pa sa tanang makitang mga kalainan, “ang tanang nasod sa katawhan” adunay samang potensiyal maylabot sa mga katakos ug kinaadman. Oo, sa panan-aw sa Diyos, ang katawhan sa tanang rasa o nasyonalidad managsama.​—Buhat 10:34, 35.

Kon husto ang panglantaw sa Bibliya, adunay paglaom nga ang tanang pagpihig ug inhustisya nga gipasikad sa kalainan sa rasa mawagtang. Dugang pa, kon tukma ang Bibliya maylabot sa sinugdanan sa tawhanong pamilya, nan makataronganon nga ang samang basahon makatagana usab kanatog impormasyon nga magpadayag kon sa unsang paagi ang tawhanong rasa makahimo sa pagkinabuhi diha sa pakigdait.

Buweno, unsay gipadayag sa mga kamatuoran? Ang talaan ba sa Bibliya maylabot sa sinugdanan sa tawo gipaluyohan sa siyensiya?

Pamatuod sa Siyensiya

Ang publikasyong The Races of Mankind, nga sinulat sa mga antropologong si R. Benedict ug G. Weltfish, nag-ingon: “Ang sugilanon sa Bibliya bahin kang Adan ug Eva, nga amahan ug inahan sa tibuok tawhanong rasa, nagsulti kasiglohan kanhi sa samang kamatuoran nga gipakita sa siyensiya karong adlawa: nga ang tanang tawo sa yuta maoy usa ka pamilya ug adunay managsamang sinugdanan.” Kining maong mga magsusulat nagpunting usab nga “ang komplikadong pagkagama sa tawhanong lawas . . . dili mahimong ‘mitungha lang nga sulagma’ nga susama sa tanang tawo kon sila walay samang sinugdanan.”

Ang pulyetong Race and Biology, ni L. C. Dunn, propesor sa zoology sa Columbia University, nag-ingon: “Ang tanang tawo tin-aw nga iya sa usa ka matang, nga managsama sa tanang pangunang pisikal nga mga kinaiya. Ang mga membro sa tanang grupo mahimong magminyoay ug nagahimo gayod niana.” Unya kini mipadayon sa pagsaysay: “Apan ang matag tawo maoy talagsaon ug managlahi sa gagmayng mga paagi gikan sa ubang tawo. Kini may bahin tungod sa nagkalainlaing mga palibot nga ginapuy-an sa mga tawo ug sa bahin tungod sa kalainan sa mga gene nga ilang napanunod.”

Ang pamatuod sa siyensiya malig-on. Kon bahin sa biolohiya, walay labaw o ubos nga rasa, usa ka lunsay o nasagolang rasa. Ang mga kinaiya sama sa kolor sa panit, buhok, o mga mata​—mga butang nga giisip sa uban nga hinungdanon sa rasa​—dili maoy timailhan sa kinaadman o katakos sa usa ka tawo. Hinunoa, sila maoy mga resulta sa napanunod nga gene.

Sa pagkatinuod, diyutay ra ang mga kalainan sa rasa, sumala sa gisulat ni Hampton L. Carson sa Heredity and Human Life: “Ang suliran nga nagaatubang kanato mao nga ang matag grupo sa mga tawo daw lahi sa panagway sa gawas apan sa ilalom niining maong mga kalainan adunay lintunganayng panagsama.”

Kon ang tanang tawo sa tinuoray usa ra ka pamilya, nan, nganong naglungtad ang makalilisang nga mga suliran sa rasa?

Kon Nganong May Suliran

Ang pasukaranang katarongan nganong adunay pagpihig sa rasa mao ang daotang sinugdanan nga gihatag sa unang tawhanong mga ginikanan sa ilang mga anak. Si Adan ug Eva kinabubut-ong mirebelde sa Diyos ug busa nahimong dili-hingpit, depektoso. Ingong resulta, ang pagkadili-hingpit ni Adan​—kining kiling sa pagkadaotan—​napasa ngadto sa iyang mga kaliwat. (Roma 5:12) Busa sukad sa pagkatawo, ang tanang tawo kiling sa kahakog ug garbo, nga maoy mitultol sa rasanhong panagbangi ug kagubot.

Adunay laing katarongan sa paglungtad sa pagpihig sa rasa. Sa dihang si Adan ug Eva mibulag gikan sa pagmando sa Diyos, sila nailalom sa pagmando sa daotan espirituhanong linalang nga gitawag sa Bibliya nga Satanas, o ang Yawa. Ubos sa impluwensiya niining usa, kinsa “naglimbong sa tibuok pinuy-anang yuta,” sagad may ginahimong tinuyong mga paningkamot aron sa paglimbong sa mga tawo bahin sa rasa. (Pinadayag 12:9; 2 Corinto 4:4) Ang etnosentrismo​—ang ideya nga ang imong kaugalingong grupo mao ang mas labaw—​gisugnoran ug misilaob, ug sa tinuyo o dili-tinuyo, minilyon ang kusganong naimpluwensiyahan, nga may malaglagong mga resulta.

Sa prangkang pagkasulti, ang hakog, dili-hingpit nga mga tawo ubos sa pagmando ni Satanas nagpakaylap sa tanang bakak nga mga pagtulon-an bahin sa rasa nga maoy nakaingon sa mga suliran sa rasa.

Busa, aron mahiusa ang tawhanong rasa, ang tanan kinahanglang motuo nga kita sa pagkatinuod maoy usa ka tawhanong pamilya ug nga gihimo sa Diyos ang “tanang nasod sa katawhan gikan sa usa ka tawo, aron papuy-on sa tibuok nawong sa yuta.” (Buhat 17:26) Dugang pa, aron nga ang tanang rasa magkahiusang magpuyo diha sa pakigdait, ang impluwensiya ni Satanas kinahanglang kuhaon gikan sa tawhanong mga kalihokan. Kini bang mga butanga mahitabo? Aduna bay pasikaranan sa pagtuo nga kini mahitabo?

Pagtapos sa Pagpihig sa Rasa

Gipadayag ni Jesu-Kristo kon unsaon paghanaw sa pagpihig sa rasa sa dihang iyang gisugo ang iyang mga sumusunod sa “paghigugma sa usag usa” maingon nga siya nahigugma kanila. (Juan 13:34, 35) Kining gugmaha dili alang lamang sa mga membro sa usa ka partikular nga rasa o mga rasa. Dili gayod! “Higugmaa ang tibuok kapunongan sa mga igsoon,” midasig ang usa sa iyang mga tinun-an.​—1 Pedro 2:17.

Sa unsang paagi kining Kristohanong gugma mapasundayag? Ang Bibliya nagsaysay sa dihang kini miawhag: “Manguna sa pagpakitag pasidungog sa usag usa.” (Roma 12:10) Hunahunaa kon unsay kahulogan niini kon kini himoon! Tagdon sa matag usa, bisag unsa pay rasa o nasyonalidad, ang uban sa tinuod nga dignidad ug pagtahod, dili sila motan-aw kanila nga ubos, kondili ‘magatan-aw kanila nga labaw.’ (Filipos 2:3) Kon ang maong espiritu sa tinuod Kristohanong gugma maglungtad, masulbad ang suliran sa pagpihig sa rasa.

Tinuod, kon bahin sa uban nga natudloan sa pagpihig sa rasa, kini nagkinahanglan ug talagsaong paningkamot sa pagwagtang nianang dinasig ni Satanas nga mga ideya. Apan kini makab-ot! Sa unang siglo, ang tanang napasulod sa Kristohanong kongregasyon nakapahimulos ug dili-hitupngang pagkausa. Ang apostol Pablo misulat bahin niana: “Walay Hudiyo ni Grego, walay ulipon ni gawasnon, walay lalaki ni babaye; kay kamong tanan usa ra diha kang Kristo Jesus.” (Galacia 3:28) Sa pagkatinuod, ang matuod nga mga sumusunod ni Kristo nagatagamtam ug tinuod nga panag-igsoonay.

Apan ang pipila tingali mosupak: ‘Dili gayod kini mahitabo karong adlawa.’ Apan, kini nahitabo na taliwala sa mga Saksi ni Jehova​—usa ka organisasyon sa kapin sa upat ug tunga ka milyong katawhan! Tinuod, dili tanang Saksi ang hingpit nga nahigawas gikan sa mga pagpihig nga nakat-onan gikan niining dili-diyosnong sistema. Usa ka itom nga Amerikana sa tinuod miingon bahin sa mga puti nga isigka-Saksi: “Namatikdan nako nga adunay pipila kanila nga may nahibiling tinamdan sa pagkalabaw sa rasa, ug usahay makita nako nga dili-mahimutang ang pipila kanila sa dihang suod nga mahiuban sa mga tawo sa laing rasa.”

Apan, kining babayehana midawat: “Ang mga Saksi ni Jehova, sa usa ka sukod nga walay-sama diha sa bisan kinsa nga katawhan sa yuta, nakawagtang sa pagpihig sa rasa. Naningkamot gayod sila sa paghigugma sa usag usa nga wala magsapayan sa rasa . . . Usahay matandog ang akong kasingkasing sa punto nga dili-mapugngan ang mga luha sa pagsinati sa tinuod nga gugma sa puti nga mga Saksi.”

Ang panaghiusa ba sa rasa nga ginatagamtam sa pipila​—bisan kon ang gidaghanon niini minilyon—​mohatag gayod ug dakong kalainan samtang ang minilyon pang uban naimpluwensiyahan sa Satanasnong mga ideya sa pagkalabaw sa rasa? Dili, kami mouyon nga kana dili makasulbad sa suliran sa rasa. Kana dili mahimo sa tawhanong paningkamot. Ang atong Maglalalang lamang, si Jehova nga Diyos, ang makahimo niana.

Makalilipay, sa dili madugay karon, si Jehova, pinaagi sa iyang Gingharian nga anaa sa mga kamot sa iyang Anak, si Jesu-Kristo, magapapha sa tanang inhustisya sa yuta ug sa tanan nga mahakogong nagapalambo sa pagpihig ug pagdumot, sa rasa o sa uban pa. (Daniel 2:44; Mateo 6:9, 10) Unya, uban sa hingpit nga edukasyonal nga programa ubos sa pagdumala ni Kristo, ang tanang rasa tinuod gayod nga mahiusa. Samtang magauswag kana nga edukasyon, sila magkinabuhi diha sa hingpit nga panaghiusa nga walay bisan unsang lama sa pagpihig sa rasa. Ang saad sa Diyos sa kataposan matuman: “Ang unang mga butang nangagi na. . . . Tan-awa! Ginabag-o ko ang tanang mga butang.”​—Pinadayag 21:4, 5.

Ikaw ba usa ka tawo nga nangandoy sa panahon sa dihang ang tinuod nga panag-igsoonay maglungtad, sa dihang ang tanang rasa hiusang magpuyo diha sa pakigdait? Kon mao, ikaw among gidapit sa pagtambong sa Kingdom Hall nga duol nimo, diin ang mga Saksi ni Jehova regular nga nagatigom aron sa pagtuon sa Bibliya. Tan-awa sa imong kaugalingon ang ilang pagpasundayag sa tinuod Kristohanong gugma​—sa katawhan sa tanang rasa.

[Hulagway sa panid 10]

Sa dili madugay ang tanang rasa sa tanang dapit hiusang magpuyo diha sa pakigdait