Ang Usa nga Manalipod sa Atong Ihalas nga Kahayopan
SUKAD sa banagbanag sa kasaysayan sa tawo, ang tawo nagkalipay sa pagtuon sa ihalas nga kahayopan. Ugaling, ikasubo nga human itugot sa Diyos sa tawo nga ang karne idugang sa iyang mga pagkaon, ang pagpabili sa ihalas nga kahayopan nadaot ngadto sa way-hinungdang pagpamatay ug pintas nga pangayam alang sa tropeyo.—Genesis 2:19, 20; 9:2; 10:9; 25:27.
Apan ang pila ka tawo nagpadayon sa pagkahingangha sa ihalas nga kahayopan sa yuta. Mga 3,000 ka tuig kanhi, ang mga pulong sa Salmo 104 gisulat sa usa nga mahigugmaon ug ihalas nga kahayopan. Gihisgotan niya pinaagig ngalan ang lainlaing ihalas nga linalang, sama sa mga zebra, mga leyon, mga kanding sa bukid, mga rock badger, ug ang cigueña. Gikan sa iyang pagtuon sa mga langgam, mga awit sa langgam, ug ihalas nga mga mananap, ang salmista natandog sa pagpahayag sa pagdayeg: “Sa kaalam gibuhat [ni Jehova] silang tanan.”—Salmo 104:10-12, 17-21, 24.
Sa pagkatinuod, si Jehova nga Diyos sa tukma mahimong malipay sa iyang labing matahom nga kalalangan. (Genesis 1:31) Sa ingon, makaseguro kitang dili siya motugot nga mapuo ang nahibiling ihalas nga kahayopan sa yuta. Nahiuyon niana, gidasig sa Diyos ang salmista nga isulat ang impormasyon nga maayo kaayong balita alang sa tanang nahigugma sa ihalas nga kahayopan. Giingnan kita nga “ang yuta . . . dili matarog sa panahong walay tino, o sa walay kataposan.” (Salmo 104:5) Ang ingon nga kamahunahunaon sa walay-kataposang kaayohan niining planetaha tinong naglakip sa mga linalang nga nagpuyo ibabaw niini. (Isaias 45:18) Gipamatud-an ni Jesu-Kristo ang kamahunahunaon sa Diyos alang sa ihalas nga kalalangan sa miingon siya: “Ang lima ka maya ginabaligya sa duha ka dako, dili ba? Bisan pa niana walay mausa kanila ang mahikalimtan sa atubangan sa Diyos.” (Lucas 12:6) Ang kamahunahunaon sa Diyos alang sa iyang mga linalang gipasiugda usab sa Salmo 104, bersikulo 14, nga mabasa: “Siya nagapatubo sa lunhaw nga balili alang sa mga mananap, ug sa mga talamnon sa pag-alagad sa katawhan, sa pagpatubo sa pagkaon gikan sa yuta.”
Nahiuyon niining mga kamatuorana, si Jehova nga Diyos dili motugot nga magpadayon sa walay kataposan ang mga tawo nga dili motuo kaniya ug nagpameligro sa kaugmaon sa yuta ug sa ihalas nga kahayopan niini. Sa pagpasiugda niini, ang Salmo 104 mihinapos pinaagi niining mapasaligong mga pulong: “Ang mga makasasala mahanaw gikan sa yuta; ug mahitungod sa mga daotan, sila wala na.”—Salmo 104:35.
Pagkamakapalipay nga hisayran nga gipahayag sa Diyos ang iyang dakong tinguha “nga pagalaglagon ang mga nagalaglag sa yuta.” (Pinadayag 11:18) Sa maong panahon ang ubang mga tagna nga karon nagakatuman sa masambingayong paagi magbaton ug literal nga katumanan. Pananglitan, pinaagi sa iyang propetang si Oseas, si Jehova nga Diyos nagpahayag: “Pagahimoon ko ang usa ka tugon nianang adlawa maykalabotan sa ihalas nga mananap sa kapatagan ug sa nagalupad nga linalang sa kalangitan ug sa nagakamang nga butang sa yuta, ug ang pana ug ang espada ug ang gubat pagawagtangon ko gikan sa yuta, ug pahigdaon ko sila sa kasegurohan.”—Oseas 2:18; Isaias 11:6-9.
Handurawa ang imong kaugalingon diha sa maong umaabot nga Paraisong yuta. Pagkamakapahimuot unya kanang panahona! ‘Apan,’ tingali mahibulong ka, ‘unsay gikinahanglan aron makapanunod sa maong mga panalangin?’ Una sa tanan, gikinahanglan ang pagtuon sa Pulong sa Diyos. Dayon, alang niadtong mosunod sa pagtultol sa Bibliya, si Jehova nga Diyos nagpahayag niining kahibulongang saad: “Ang mga matarong magapanunod sa yuta, ug sila mopuyo sa walay kataposan ibabaw niana.”—Salmo 37:29.