Kalibotan nga Walay Sakit

“Ang malarya mas alisto kay sa gihunahuna ni bisan kinsa,” matud sa imyunologong si Dr. Dan Gordon. “Naningkamot pa kami sa pagpangitag sulbad niana.”

“KAMI wala pay igong nahibaloan mahitungod sa metabolismo sa [kagaw sa tesis],” matud ni Barry Bloom sa Howard Hughes Medical Institute. “Wala pa namo bug-os masayri kon sa unsang paagi mosaler ang bisan unsang tambal. Wala lang gyod namo masayri.”

“Ang kahibalo dili awtomatikong magpasabot nga kausaban sa panggawi,” masulob-ong miingon ang tigpamaba sa Centers for Disease Control, nga naniid sa kapakyasan sa mga kampanya sa “luwas nga sekso” sa pagsanta sa sipilis. Sumala sa gipakita sa mga pahayag sa ibabaw, ang pakig-away batok sa malarya, tesis, ug sipilis maoy pakyas. Ang ugma-damlag ba magdalag mas epektibong mga tambal niining mga sakita?

Tingali. Apan bisan pag ang tawo makabuntog sa pila ka balatian ug makapahimo sa uban nga maagwanta ra, adunay pasikaranang katarongan kon nganong dili siya bug-os nga makadaog sa pakiggubat batok sa sakit.

Ang Hinungdan sa Sakit

Ang pakig-away batok sa sakit mosaylo pa kay sa pakig-away lamang batok sa mga parasito ug mga kagaw. Ang Bibliya mipatin-aw nga ang sakit maoy sangpotanan sa sala nga napanunod gikan sa atong unang tawhanong amahan. (Roma 5:12) Ang sala wala lamang magdaot sa relasyon sa tawo uban sa iyang Maglalalang apan mitultol usab sa iyang kadaotan sa mental, emosyonal, ug pisikal. Busa, inay sa pagpadayon diha sa kahingpitan sa paraisong yuta, ang mga tawo nahimong dili-hingpit ug nagkadaot hangtod sila namatay.​—Genesis 3:17-19.

Bisan pa sa paggamit sa labing maayong tambal, ang tawo dili makausab sa iyang makasasalang kahimtang o sa mga sangpotanan niini. Kining sulirana naghimo sa tawhanong rasa nga “mailalom sa kakawangan [“limitado kaayo,” Phillips].” (Roma 8:20) Ug matuod kini maylabot sa pagbuntog sa sakit. Ang pag-uswag sa pagluwas sa kinabuhi sa natad sa medisina sagad natugbangan sa nagahulga sa kinabuhi nga pagkahugno sa sosyedad.

“Aduna kitay suliran,” misulat si Jerold M. Lowenstein sa magasing Discover. “Kon labi pa kitang malamposon sa pagpakig-away sa sakit ug paglugway sa tawhanong kinabuhi, labi pang tataw ang posibilidad nga mapadali ang atong pagkapoo” tungod sa sobrang populasyon ug sa pagkadaot sa kalikopan.

Ang Tinuod nga Tambal

Ang tinuod nga tambal sa sakit wala diha sa tawo kondili anaa sa Maglalalang. Mao kanay hinungdan nga mipahayag ang salmista: “Ayaw ibutang ang imong pagsalig sa mga dungganan, ni sa anak nga lalaki sa tawo, nga kaniya walay kaluwasan.” Ang Bibliya dugang nag-ingon: “Malipayon ang usa . . . kang kansang paglaom anaa kang Jehova nga iyang Diyos, ang Magbubuhat sa langit ug yuta.” (Salmo 146:3, 5, 6) Ang Diyos lamang ang may gahom sa pagwagtang sa hinungdan sa sakit. Ug sumala sa Bibliya, katuyoan niya nga buhaton kana. Haduol na kanang panahona.

Si Jesu-Kristo mitagna nga ang “mga kamatay” maoy usa sa daghang pamatuod nga kita nagkinabuhi sa konklusyon sa presenteng sistema sa mga butang ug sa dili pa moabot ang bag-ong kalibotan. Gitagna usab niya ang pag-uswag sa mga kahimtang nga mopasamot sa sakit, sama sa gubat, gutom, ug pagkamalapason.​—Lucas 21:11; Mateo 24:3, 7, 12; 2 Timoteo 3:1-5, 13.

Sa dinhi pa siya sa yuta, si Jesus milagrosong nag-ayo sa mga masakiton, sa ingon nagsugod sa katumanan sa tagna: “Gipas-an niya ang atong mga balatian; ug bahin sa atong kasakitan, siya nag-antos niana.” (Isaias 53:4; Mateo 8:17) Sa ingon niana gipasundayag niya sa gamayng paagi kon unsay gitinguha sa Diyos nga palamposon sa tibuok-kalibotang gilapdon. Ang Bibliya nag-ingon bahin kang Jesus: “Unya miduol kaniya ang dagkong mga panon sa katawhan, nga nanagdalag mga bakol, mga kimay, mga buta, mga amang, ug sa daghang uban pa, ug ilang gibutang kini sila diha sa iyang tiilan, ug iyang giayo sila; tungod niana ang mga panon sa katawhan natingala sa ilang pagkakita sa mga amang nga nakasulti na ug sa mga bakol nga nakalakaw na ug sa mga buta nga nakakita na.”​—Mateo 15:30, 31.

Ang mga tawo nga nakakita sa maong mga milagro mihimaya sa Diyos tungod kay ilang nasabtan nga siya mao ang naghatag kang Jesus ug gahom sa paghimo niadtong mga milagroha. Ang gahom nga nabatonan ni Jesus mao ang samang gahom nga gigamit sa paglalang sa atong kahibulongang uniberso. Mao kana ang balaang espiritu sa Diyos, ang iyang aktibong gahom.​—Genesis 1: 1, 2; Pinadayag 4:11.

Si propetang Isaias misulat bahin sa panahon sa dihang “walay molupyo nga magaingon: ‘Ako masakiton.’” (Isaias 33:24) Ug ang Pinadayag 21:4, 5 nagpahayag: “‘Ang [Diyos] magapahid sa tanang luha gikan sa ilang mga mata, ug ang kamatayon wala na, ug wala na usab unyay pagminatay ni paghilak ni kasakit. Ang unang mga butang nangagi na.’ Ug ang Usa nga naglingkod sa trono miingon: ‘Tan-awa! ginabag-o ko ang tanang butang.’”

Ang Bibliya nagpakita nga kita nagkinabuhi sa panahon sa kausaban. (1 Juan 2:15-17) Sa dili madugay kining kalibotana, uban sa sakit, kagul-anan, krimen, kapintasan, ug kamatayon niini, maoy butang sa kagahapon. Ang Diyos magwagtang niini ug sa tanang katalagman niini, nga mag-andam sa dalan alang sa bag-ong kalibotan dinhi sa yuta, diin “magapuyo ang pagkamatarong.” (2 Pedro 3:11-13) Si Jesus naghisgot nianang umaabot nga bag-ong kalibotan ingon nga “Paraiso,” sanglit susama unya kana sa orihinal nga Paraisong tanaman sa Eden, hinuon sa tibuok-yutang gilapdon.​—Lucas 23:43; Genesis 2:7, 8.

Busa ang mga Kristohanon adunay paglaom, dili lamang sa temporaryong pagtambal, kondili sa dumalayong kagawasan gikan sa pagkadili-hingpit, sakit, ug kamatayon. Sila nagpaabot sa bug-os nga katumanan sa saad sa Diyos: “Ako si Jehova nga maoy nagaayo kaninyo.” “Ako gayong pagakuhaon ang sakit gikan sa inyong taliwala.”​—Exodo 15:26; 23:25.

[Mga hulagway sa panid 9]

Si Jesus gihatagag gahom sa Diyos sa pagbanhaw sa patay ug pag-ayo sa masakiton