Mga Kredit Kard—Kini ba Alang Kanimo?

USA ka lalaki nga taga-California, nga nailhan sa pipila ingong “G. Plastic Fantastic,” adunay koleksiyon nga 1,265 ka balidong kredit kard. Itugot ta, kining tawhana wala maghawas sa aberids nga tighupot ug kredit kard. Bisan pa, kaylap nga giila nga ang paglungtad sa kredit kard nahimong maayong-pagkatukod nga bahin sa moderno Kasadpang sosyedad.

Ang American Demographics nagpahayag nga sa 1986 halos tres-kuwartos sa mga panimalay sa T.B. adunay usa o labaw pa nga kredit kard. Adunay kapin sa 25,000 ka lainlaing kredit kard ang mabatonan sa Tinipong Bansa lamang. Ang mga kompaniya sa gasolina, mga tindahan nga nagbaligyag menudo, ug mga kompaniya sa ayroplano naghatag sa ilang mga kredit kard. Sa 1991, ang mga Amerikano naghupot ug 232 milyong balidong MasterCards ug Visas, ang duha ka labing popular nga kard.

Ang gitawag nga industriya sa plastik nga salapi nagatubo usab sa Uropa, nga nag-awhag sa mainit nga mga away taliwala sa magkaribal nga mga bangko ug mga kompaniya sa pangutang aron paliton sa naghinamhinam nga mga mamamalit. Ang kinatibuk-ang gidaghanon sa balidong mga kredit kard sa tibuok kalibotan maoy kapin sa usa ka bilyon! Nganong daghan kaayong kredit kard? Kinsay labawng makabenepisyo gikan sa paggamit niini? Unsay pipila sa mga kapeligrohan ug mga suliran nga giatubang sa mga tigkupot ug kredit kard? ☞

Kinsay Makabenepisyo?

Ang mga bangko ug mga kompaniya sa kredit kard mokita ug dakong ganansiya, dili lamang gikan sa mga balayranan​—lakip ang tinuig nga mga balayranan sa pagpamembro, mga multa sa naulahi pagbayad, mga multa gumikan sa pagsobra sa gilimiting kantidad​—kondili gikan usab sa taas nga tubo nga ilang ipatong sa salapi nga giutang gikan kanila. Apan, siyempre, dili sila makaganansiya gikan sa mga tanto gawas kon ang mga tighupot ug kredit kard mangutang ug dako. Sa Tinipong Bansa lamang, minilyon ang tinuyong nagbanlod sa ilang kaugalingon sa walay-hunong nga pagpangutang. Mga 75 porsiento sa mga Amerikanong tighupot ug mga kredit kard ang adunay wala pa mabayring mga balanse sa ilang mga kuwenta, nga alang niana kinahanglang magbayad sila ug dagkong tubo matag bulan. Ang aberids nga Amerikanong tig-utang pinaagig kredit kard adunay utang nga kapin sa $2,000 sa iyang binulang kuwenta.

Sa iyang librong The Credit Jungle, si Al Griffin nag-ingon nga ang “15 ngadto sa 20 porsiento sa mga tighupot ug kard nga nagbayad sa ilang mga kuwenta sa utang sa bug-os sa dihang madawat nila kana walay maamot sa mga kalihokan sa bangko.” Siya midugang nga “ang laing 80 ngadto sa 85 porsiento sa mga tighupot ug kard naghimo sa plano sa kredit kard nga labing maganansiyahong kalihokan sa bangko. Ang usa ka kasarangang $10 milyon nga negosyo sa kard sa bangko moganansiya ug $1.8 milyon matag tuig.” Sa 1990 ang bangko sa T.B. nga may kinadak-ang bahin sa negosyo sa kredit kard nakaganansiyag duolan sa $1 ka bilyon gikan sa mga kalihokan sa mga tigpalit, sa kinadak-an sa kredit kard nga kompaniya niini.

Pagbantay sa mga Kapeligrohan

Adunay dili maayong bahin niining gagmayng mga plastik. Pananglitan, nakadawat ka na bag tawag sa telepono gikan sa dili-iladong kompaniya nga nagpahibalo kanimo sa premyo nga bag-o lamang nimong nadaog? Daghan ang nakadawat. Aron makuha nimo ang imong premyo, ang imo lamang buhaton mao ang pagtubag sa pila ka pasukaranang mga pangutana. Apan unya ang nagtawag mangutana sa numero sa imong kredit kard. Ngano? Tungod kay sa pagkamatuod wala kay nadaog nga premyo. Ang maong tigtawag buot lamang sa numero sa imong kredit kard aron nga siya makaorder pinaagig koreo o telepono nga ikaw ang pabayron.

Adunay daghang matang sa panikas sa kredit kard, nga mobilig ginatos ka milyong dolyar matag tuig. Ug bisan kon kining sulirana dili direktang nag-apektar kanimo, kon ikaw adunay kredit kard, tingali nagbayad ka sa maong mga alkanse pinaagi sa tag-as nga mga balayranan ug mga tubo.a

Ang tinuod nga kapeligrohan sa mga kredit kard anaa sa mga kalisdanan ug pag-antos nga mahitabo kon ikaw magumon sa utang. Ang The Credit Jungle nag-ingon nga “daghang tawo nga makapugong sa tentasyon sa pagpalit ug maluhong mga butang ug mga serbisyo nga dili nila mapalit kon mobayad ug cash, bug-os walay mahimo sa pagpakigbisog sa tentasyon sa dihang sila naghupot ug kredit kard. Daghang pamilya ang nagmantinil sa pagkaon sulod sa duha ka semana human magbayad sa mahalong mga pagkaon nga giutang sa miaging bulan.”

Apan dili lang kay ang imong mga batasan sa pagkaon ang maapektahan kon ang imong mga utang makahurot ug dakong bahin sa imong kinitaan. Ang librong Credit​—The Cutting Edge nagtaho nga “sa aberids, ang mga Amerikano naggasto ug duolan sa 75% sa ilang kinitaan matag bulan sa pagbayad sa mga hulam nga kuwarta, mga utang, ug mga kredit kard.”

Ikasubo, alang sa daghan kaayong mga mamamalit, ang usa ka kredit kard maoy, dili ganghaan ngadto sa ekonomikanhong paraiso, kondili usa ka pagkadakin-as ngadto sa tagdugay nga utang ug kabalaka. Ang mga Amerikanong mamamalit, pananglitan, sa di pa dugayng katuigan nagpatongpatong sa utang ginamit ang kredit kard, nga miresulta sa dugang pang mga delingkuwensiya sa kredit kard, mga dili pagbayad, ug mga pagkabangkarota. Sa 1990, ang mga mamamalit sa T.B. nakautang ug kinatibuk-ang $3.2 trilyon sa mga kredit kard, mga utang sa kotse, ug mga bayranan sa inutang nga balay! Ang aberids nga panimalay nakautang ug mga $35,000 ug nakabayad ug mga $3,500 matag tuig sa tubo.

Dili ikatingala, ang personal nga mga pagkabangkarota miusbaw sa gidaghanon. Sa 1990 ang talagsaong 720,000 ka Amerikano ang miparehistro ug pagkabangkarota, halos 17-porsientong usbaw sa 1989. Sa 1991 kining numeroha misulbong sa 800,000, ug sa 1992 ang bag-ong talaan maoy 971,517 personal nga pagkabangkarota.

Ang pipila nga nalisdan sa pagpugong sa ilang paggamit sa mga kredit kard mipili sa pagwagtang niini kanila. Sa laing bahin, daghan ang nakahimog maalamong paggamit sa mga kredit kard nga wala magpakomplikado sa ilang kinabuhi sa dili kinahanglanong paagi.

[Footnote]