Kon sa Unsang Paagi Mahiusa ang Kalibotan
ANG tawhanong paningkamot sa pagmando sa ilang kaugalingon bug-os nga napakyas. Ikaw sa walay duhaduha mouyon sa dinasig nga obserbasyon: “Ang tawo nagmando sa tawo sa iyang kadaotan.” (Ecclesiastes 8:9) Nganong ang mga tawo sa pagkaalaot napakyas sa pagmando sa kaugalingon?
Ang Bibliya naghatag sa katarongan, nga nag-ingon: “Dili iya sa tawo nga nagalakaw ang pagtultol sa iyang lakang.” (Jeremias 10:23) Dili, dili iya sa tawo, o katungod, ang pagmando sa iyang kaugalingon o sa iyang isigkatawo. Kini ang linain nga katungod ni Jehova nga Diyos, nga atong Maglalalang, nga bahin kaniya kita gisultihan: “Si Jehova mao ang atong Maghuhukom, si Jehova mao ang atong Maghahatag-balaod, si Jehova mao ang atong Hari.”—Isaias 33:22.
Diha lamang kon modawat ang tanang tawo kang Jehova nga Diyos ingong Magmamando nga mahiusa ang kalibotan. Apan mahitabo ba gayod kana? Sa dugay na kaayong panahon usa ka manalagna sa Diyos naghisgot bahin sa “ulahing mga adlaw,” sa dihang daghang tawo mosugod sa pagpangita kang Jehova alang sa pagtudlo.
Usa ka Gitagnang Tibuok-Kalibotang Pakigdait
“Ug mahitabo sa ulahing mga adlaw,” ang manalagnang Isaias misulat, nga “ang balay ni Jehova lig-ong pagatukoron ibabaw sa kabukiran . . . ug ang tanang nasod magaganayan ngadto niana. Ug daghang katawhan mangadto ug manag-ingon: ‘Umari kamo, manungas kita sa bukid ni Jehova, ngadto sa balay sa Diyos ni Jacob; ug kita pagatudloan niya sa iyang mga dalan.’” Kon kita mopadayon sa pagbasa, atong makita ang dangatan sa pagdangop kang Jehova alang sa pagtudlo. “Ilang himoon ang ilang mga espada nga mga punta sa daro ug ang ilang mga bangkaw himoon nga mga galab,” nagpadayon ang tagna. “Usa ka nasod dili na mobakyaw sa espada batok sa laing nasod, ni makakat-on pa sila mahitungod sa gubat.”—Isaias 2:2-4.
Oo, ang sangpotanan unya sa pagpamati niining diyosnong pagtulon-an mao nga wala na unyay pag-awayay pa, wala nay etnikong kapintasan, wala nay gubat. Ang tawhanong mga magmamando nagtuo nga ilang matuman kining tagnaa sa Bibliya ug gikulit pa gani ang kataposang bahin niini diha sa usa ka paril sa Plasa sa Hiniusang Kanasoran sa Siyudad sa New York. Bisan pa, ang gubat ug pagdumot batok sa nasodnon ug etnikong mga pundok misamot hinoon hangtod sa kataposan sa 1993. Busa ikaingon mo ba nga napakyas ang tagna sa Diyos?
Wala, kini wala mapakyas—kay ang mga tawo gikan sa tanang kanasoran karon mismo nagaganayan ngadto sa balay ni Jehova sa pagdawat sa diyosnong pagtulon-an. Sa pagkamatuod, pagkadakong pamatuod ning ting-init ang “Diyosnong Pagtulon-an” nga mga Kombensiyon sa mga Saksi ni Jehova sa katumanan niining tagnaa! Ang tibuok-kalibotang panag-igsoonay sa mga Saksi ni Jehova wala magpadala—sa rasa, nasyonalidad, o etnikong kagikan—sa pagtukmod kanila sa pagdumot o sa pagpatay sa usag usa. Sila sa mahulagwayon naghimo sa ilang mga espada nga mga punta sa daro ug sa ilang mga bangkaw nga mga galab.
‘Apan,’ tingali may mosupak, ‘dili ka makalaom nga mamati ang tanan sa pagtudlo sa Diyos sa paghigugma sa usag usa.’ Bisag tinuod kini, ang Diyos adunay gahom sa pagpapha sa tanang mga magsusupak sa iyang balaang kabubut-on.
Kon Unsay Himoon sa Diyos
Nagaampo ka ba sama sa gitudlo ni Jesus sa iyang mga sumosunod, nga mao: “Amahan namo nga anaa sa langit, Balaana ang imong ngalan. Paanhia ang imong gingharian. Matuman ang imong kabubut-on sa yuta, maingon man usab sa langit”? (Mateo 6:9, 10, King James Version) Kon mao, ikaw makasalig nga tubagon sa atong mahigugmaong Maglalalang kanang pag-ampoa. Sa unsang paagi himoon niya kana?
Gitudlo na sa Diyos ang iyang Anak, “Ang Prinsipe sa Pakigdait,” ingong pinili nga magmamando sa iyang “kagamhanan,” ang Gingharian nga gitudlo kanato nga maoy iampo. (Isaias 9:6, KJ) Gikinahanglan nato ang maong labaw-tawhanon espirituhanon nga magmamando, kay siya lamang ang makawagtang gikan sa katawhan sa daotan nga impluwensiya ni Satanas ug sa iyang mga demonyo. Ang tawhanong mga magmamando, bisag unsa pa ka maayo ug tuyo, dili makahimo niini.—1 Juan 3:8; Pinadayag 12:7-12.
Apan, unsay mahitabo sa presenteng-adlaw nga mga kagamhanan nga napakyas sa pagpasakop sa balaang pagmando? Laing tagna sa Bibliya nga nagbatbat sa Gingharian nga alang niini gitudloan kita ni Jesus sa pag-ampo nag-ingon: “Ang Diyos sa langit magatukod ug usa ka gingharian nga dili gayod malumpag. . . . ang [langitnong Gingharian sa Diyos] magaut-ot ug magadugmok niining tanang mga gingharian, ug kini mismo molungtad sa walay kataposan.” Busa, ang pag-ampo nga moanhi ang Gingharian sa Diyos nagkahulogan nga kita nagaampo alang sa usa ka tibuok-kalibotang kagamhanan ubos sa pagmando sa “Prinsipe sa Pakigdait.”—Daniel 2:44; Isaias 9:6.
Unya, sa dihang mahiusa ang tawhanong pamilya sa kalinaw ubos sa Gingharian sa Diyos, ang tanan maghigugmaay sa usag usa bisan unsa pay rasa o etnikong kagikan. Pagkamahimayaong panahon unya kana! (Pinadayag 21:3, 4) Among gidapit kamo sa pagtan-aw-daan nianang malinawong kahimtang bisan karon taliwala sa mga Saksi ni Jehova ug unya magapaabot uban kanila sa panahon sa dihang ang tibuok kalibotan mahiusa diha sa pakigdait.
[Hulagway sa panid 15]
Hiusahon sa Gingharian sa Diyos ang tanang tawo diha sa pakigdait