Gikan sa Among mga Magbabasa

Kabataang Nailalom sa Pagpit-os Daghang salamat kaninyo sa seryal sa mga artikulong “Kabataang Nailalom sa Pagpit-os​—Sa Unsang Paagi Katabangan Sila?” (Hulyo 22, 1993) Sa dihang gibasa ko kadto nakahilak ako, tungod sa kalipay ug kasakit. Sa mga kuwatro anyos, naagian ko ang kapintasan sa sekso sa kamot sa akong amahan. Nagdako ako nga nailalom kanunay sa emosyonal ug pisikal nga kasakit ug kahadlok. Ako usa na ka Kristohanon karon sulod sa 20 ka tuig, ug uban sa tabang ni Jehova​—ug sa mga artikulo nga sama niini​—ako misugod sa pagkaplag ug kahupayan. Ang impormasyon nakapaarang usab kanako sa pagpanalipod sa akong anak nga babaye.

S. S., Italya

Ako 17 anyos ug gibatig grabeng kapit-os sa emosyon. Grabe kaayo ang binaba nga pag-abuso diha sa akong balay. Bisan tuod wala makabasa ang akong amahan niining mga artikuloha, imposible gayod nga dili kini mamatikdan sa matag abusadong ginikanan. Nanghinaot ako nga ang mga artikulo makabukas sa mga mata niining matanga sa mga ginikanan.

T. B., Tinipong Bansa

Ang akong tres-anyos nga anak nga babaye giabusohan sa sekso. Siya natugaw kaayo tungod niini nga kasinatian; ang bata bisag linghod pa kaayo ang edad masakitan gayod sa emosyon. Nasuko kaayo ako ug naguol nga buot ko nga mosulat kamo ug usa ka artikulo aron tabangan ang mga ginikanan nga makakita kon unsa ka daotan kini alang sa among gagmayng kabataan. Dili ikatukib sa mga pulong ang akong kalipay sa nagbasa niining mga artikuloha. Wala pa gayod akoy nabasa sukad nga ingon ka matahom. Kini nagpakita sa uban nga kita nag-alagad sa usa ka Diyos nga makasabot sa grabeng kasakit nga gibati sa pipila.

M. G., Tinipong Bansa

Daghang salamat ilabina alang sa artikulong “Abusadong mga Ginikanan​—Ang Labing Grabeng mga Tigpit-os.” Gimatuto ako nga ingon niana, nga inabusohan sa emosyon ug sa sekso. Ang artikulo nagpakita kon unsa gayod ka lisod kini alang sa nahibiling bahin sa kinabuhi sa usa. Makapalipay nga masayod nga adunay usang tinuod gayod nga makasabot.

B. S., Tinipong Bansa

Ingong usa nga nakalahutay sa pag-abuso sa sekso ug sa emosyon sa bata pa, makasabot gayod ako sa kadaot nga ipahinabo sa wala kinahanglanang pagpit-os sa pagkabata. Gawas kon nakaagi ka niana, dili ka makasabot sa kadaot nga nahatag niini diha sa kinabuhi sa usa ka tawo. Ang pagdumot-sa-kaugalingon, pagbating sad-an, kahadlok, ug grabeng mga pagbati sa kawalay-pulos dili-maantos usahay. Maoy akong pag-ampo nga palandongon ug maayo sa mga ginikanan nga makabasa niini nga impormasyon ang ilang kaugalingon ug tagdon ang ilang mga anak nga may empatiya ug simpatiya.

D. I., Tinipong Bansa

Sa dihang nakita ko ang hapin, ako nakahilak. Ang akong siyete-anyos lisod gayod pakiglabotan, ug wala kami masayod kon unsay buhaton. Sa kataposan gidala namo siya sa hospital nga espesyalista sa sakit sa hunahuna ug emosyon. Sa adlaw human nga siya mipauli sa balay, nadawat namo kining isyuha bahin sa kabataang gibatig kapit-os. Kami aduna pa gihapoy daghang pangutana nga wala matubag, apan pinaagi sa mga artikulo nga sama niini, pag-ampo, ug sa pagpaluyo sa mga higala, natubag sa labing menos ang kadaghanan sa among mga pangutana.

D. G., Tinipong Bansa

Ako 13 anyos, ug duha ka tuig sa miagi nagkasakit akog grabe. May panapanahon usab ako nga depresyon. Maayo pa unta ug nabatonan ko kining mga artikuloha niadtong higayona. Gidala ako sa akong inahan ngadto sa espesyal nga hospital alang sa mga bata tungod kay ang mga doktor sa among lungsod naglibog kon unsay akong deperensiya. Ang mga doktor sa hospital nagbanabana nga ako may “psychosomatic reactions” sumala sa pagtawag sa inyong mga artikulo. Ang mga ansiano sa akong kongregasyon, uban sa akong mga ginikanan, mitabang kanako sa pagbuntog sa akong kapit-os. Nanghinaot ako nga ang inyong mga artikulo makatabang sa ubang mga batan-on sa pagbuntog sa ilang kapit-os.

J. B., Tinipong Bansa

Ako usa ka batan-on nga gibati usab ug kapit-os. Ako siyete anyos, ug ang akong mama ug papa nagbulag. Kana maoy nakaingon sa kapit-os. Ako may mga sakit sa tiyan sama sa inyong gisulat. Salamat sa inyong pagtagad.

J. H., Tinipong Bansa