Ang Hunahuna sa Bibliya

Kinahanglan Bang Bawtismohan Ka Pag-usab?

SI Lucila nahasol. Bisag gimatuto nga Katoliko, siya bag-o pang misugod ug seryosong pagtuon sa Bibliya uban sa tabang sa dili-Katolikong higala. Nakita niya nga ang Bibliya nagbatbat sa bawtismo ingong usa ka butang nga lahi gikan sa rituwal nga iyang nadawat sa pagkamasuso. “Nagkahulogan ba kini nga magpabawtismo ako pag-usab?” siya sinserong nangutana. “Nahadlok ako nga ang paghimo niana makapasuko sa Diyos.”

Ginatos ka milyong tawo, mga Katoliko ug mga Protestante, giwisikan o gibuboan ug tubig sa masuso pa diha sa seremonyas sa bawtismo. Minilyon sa ubang mga tawo ang nabawtismohan pinaagi sa usa ka matang sa bug-os nga paglusbog sa tubig sa dihang sila gulanggulang na. Kini nagbangon sa pangutana, Unsa ba gayod ang Kristohanong bawtismo? May mga kahimtang ba nga nagpakamatarong sa ikaduhang bawtismo?

Ang Pocket Catholic Dictionary nagbatbat sa bawtismo ingong “sakramento diin, pinaagi sa tubig ug sa pulong sa Diyos, ang usa ka tawo gihinloan sa tanang sala ug gipakatawo pag-usab ug gibalaan diha kang Kristo ngadto sa walay-kataposang kinabuhi.” Bahin sa pagbawtismo-pag-usab, kining samang basahon nag-ingon nga ang “bawtismo nagbilin ug dili-mapapas nga timaan diha sa kalag, nga nagkahulogan nga kana dili mahimong usbon, tungod kay kana dili kinahanglan.” Kini ba ang giingon sa Bibliya?

Paghimog mga Tinun-an, Pagbawtismo Kanila

Sa Mateo 28:19, 20, mabasa nato ang sugo bahin sa bawtismo nga gihatag sa nabanhawng Kristo sa iyang mga tinun-an una siya mosaka sa langit. “Busa, panglakaw kamo ug paghimog mga tinun-an sa tanang kanasoran; bawtismohi sila sa ngalan sa Amahan ug sa Anak ug sa Espiritu Santo, ug tudloi sila sa pagtuman sa tanang sugo nga gihatag ko kaninyo.” (The Jerusalem Bible) Tin-aw, ang bawtismo gikinahanglan sa Kristohanong mga tinun-an​—kadtong natudloan sa pagsunod sa mga sugo ni Kristo​—dili mga masuso.a Kini kaharmoniya sa kamatuoran nga ang tanang bawtismo nga gibatbat sa Kasulatan naglangkit sa mga tinun-an kinsa dayag maoy bug-os nga nalusbog sa tubig. Kini tin-aw nga mao ang kahimtang sa dihang si Kristo Jesus mismo gibawtismohan ni Juan Bawtista. Ang talaan sa Bibliya nag-ingon nga human sa pagbawtismo, si Jesus “mihaw-as gikan sa tubig” sa Subang Jordan. (Mateo 3:16, JB) Sa pagkatinuod, ang Kasulatan nagpakita nga si Juan mipili pag-ayo sa iyang mga dapit sa bawtismo aron mabatonan ang daghang tubig.​—Juan 3:23.

Sa ulahi, sa pagbatbat sa bawtismo sa Etiopianong eunuko, ang Bibliya nagtug-an kanato nga “si Felipe milusad sa tubig kauban sa eunuko ug nagbawtismo kaniya,” diin human niana “sila nanghaw-as sa tubig.” (Buhat 8:38, 39, The New American Bible) Kining mga bawtismoha pinaagig paglusbog maoy pagsunod sa kinatibuk-ang kahulogan sa Gregong pulong ba·ptiʹzo, “pagbawtismo,” gikan sa baʹpto, nga nagkahulogang “pagtuslob o pagpailalom,” nga maoy gipasikaran sa Ingles nga pulong “baptism.”

Usa ka Kasulatanhong Talaan sa Pagbawtismo-Pag-usab

Apan unsa na man ang daghang minilyong tawo nga nabawtismohan sa masuso pa o dili bug-os nga nalusbog? Haom ba gayod nga bawtismohan sila pag-usab? Usa ka hitabo nga giasoy sa Buhat 19:1-7 motabang nato sa pagtubag niining mga pangutanaha. Lagmit panahon sa tingtugnaw sa 52/53 K.P. nga si apostol Pablo miduaw sa adunahang siyudad sa Efeso sa Asia Minor. Didto nakakaplag siyag pila ka tinun-an nga kinahanglang bawtismohan pag-usab. Human mahibalo nga kining mga lalakiha nabawtismohan sa bawtismo ni Juan, si Pablo nagbawtismo kanila pag-usab “sa ngalan sa Ginoong Jesus.” Wala siya mobati nga ang pagbuhat niana makapasuko sa Diyos. Tin-aw, ang Diyos miuyon sa pangatarongan ni Pablo, ug inay masuko niining maong pagbawtismo-pag-usab, ang Diyos naghimong balido niana pinaagi sa gasa sa balaang espiritu.

Kon ang 12 ka lalaki nagsalikway pa sa pagtudlo ni Pablo bahin sa matang sa bawtismo ug sa kahinungdanon sa Mesiyas, si Kristo Jesus, sa walay duhaduha si Pablo dili unta magbawtismo. Una, ang mga lalaki kinahanglang mokuwalipikar alang sa bawtismo. Niana lamang nga sila mabawtismohan pag-usab uban sa pag-uyon sa Diyos.

Kon Unsaon Pagkuwalipikar Alang sa Bawtismo

Unsaon nato pagkuwalipikar alang sa bawtismo? Tagda ang panon sa katawhan nga nabawtismohan sa adlaw sa Pentekostes 33 K.P. Giunsa nila pagkuwalipikar? Una, ingong mga Hudiyo ug Hudiyong mga kinabig, sila nagsugod nga may maayong pasukaranang kahibalo kang Jehova nga Diyos, sa iyang mga pakiglabot sa iyang katawhan, ug sa mga tagna sa Bibliya mahitungod sa iyang gisaad nga Mesiyas. Ikaduha, sila nagbaton ug dugang tukmang kahibalo panahon sa usa ka dinasig nga pagpamatuod nga gihatag ni apostol Pedro niadtong adlawa. Uban sa unsang resulta?

“Sa pagkadungog niini, sila nasubo ug nag-ingon kang Pedro ug sa mga apostol, ‘Unsay among buhaton, mga igsoon?’ ‘Kinahanglang maghinulsol kamo,’ mitubag si Pedro, ‘ug kamong tanan kinahanglang bawtismohan sa ngalan ni Jesu-Kristo alang sa kapasayloan sa inyong kasal-anan, ug kamo makadawat sa gasa sa Balaang Espiritu.’” (Buhat 2:37, 38, JB) Matikdi nga ang pamatuod ni Pedro dili taphaw. “Siya misulti kanila sulod sa taas nga panahon nga naggamit ug daghang argumento.” Sila nadani sa iyang pangatarongan, ug sila midawat kon unsay iyang giingon ug nabawtismohan. “Nianang adlawa mga tulo ka libo ang nadugang sa ilang gidaghanon.”​—Buhat 2:40, 41, JB.

Ang samang mga elemento gikinahanglan alang sa mga bawtismo karon nga uyon sa Kasulatan: (1) tukmang kahibalo, (2) sinserong paghinulsol, ug (3) pagkakabig, o pagliso ngadto sa Diyos ug halayo gikan “niining hiwi nga kaliwatan.” Dugang pa, ang mga bawtismong uyon sa Kasulatan kinahanglang “diha sa ngalan ni Jesu-Kristo,” nga mao, gipasukad sa pagdawat sa iyang halad lukat alang sa kapasayloan sa mga sala ug pagpailalom kaniya ingong naentronong hari sa Diyos.​—Buhat 2:40, JB; Roma 5:12-19; 7:14-25.

Ang sinserong katawhan nga Kasulatanhong kuwalipikado alang sa bawtismo kinahanglang dili mahadlok nga pinaagi sa pagpabawtismo-pag-usab sila dili magpahimuot sa Diyos. Sa kasukwahi, ang tukma-sa-Kasulatan nga bawtismo sa kuwalipikadong katawhan magdalag kalipay sa Diyos.

[Footnote]