Ang Kasaysayan sa Ice Cream
ANG ice cream dako kaayog kauswagan sukad sa unang mga adlaw niini. Ang karaang mga Romano mao ang nag-imbento sa sorbete. Kining bugnaw nga pangsira-gana, nga hinimo gikan sa pinong yelo, prutas, ug dugos, usahay makita diha sa mga lamesa sa mga sapian. Ang paggamag sorbete nahingpit sa dugay nang panahong miagi, dayag nakaabot na sa kinatayoktokan diha sa mga kamot sa mga maestro kosinero sa Arabo sa panahon sa Edad Media. Ang mga pulong “sorbet” ug “sherbet” tingali Arabiko ug gigikanan.
Ikaingon nga ang unang sorbete, nga hinimo gikan sa yanong tubig, mao ang gigikanan sa modernong-adlaw nga ice cream. Ang dakong kausaban nakab-ot pinaagi sa paggamit ug gatas, mga itlog, asukar, ug palami, nga mahimong usa ka kremahon, lamiang timpla. Kon nabuhi ka pa sa katuigang 1600 sa palasyo sa Pranses nga hari nga si Louis XIV, ikaw nakasaksi unta sa pagpailaila sa ice cream ngadto sa mga alta-sosyedad. Niadtong panahona dihay pila ka kontrobersiya taliwala sa mga doktor ug ubang mga eskolar kon ang ice cream maayo ba sa ighihilis o dili.
Sa unsang paagi nahimong posible ang paghimog ice cream nga wala may mga makina nga igpakamig sa ice cream? Sa sinugdanan, duha ka sudlanan nga ginama sa kahoy o pewter ang gigamit, ang usa ka sudlanan isulod sa lain. Ang timpla sa ice cream giandam diha sa mas gamay nga sudlanan, ug ang luna sa tunga butangag yelo ug asin. Human isagol ang mga ingrediyente, ang tinimpla dili kuhaon gikan sa sudlanan, ug ang ice cream andam na. Diin man nagkuha ug yelo? Sa mga kasiglohang miagi nadiskobrehan sa mga tawo nga ang yelo mahimong gamaon ug ipundo pinaagi sa pagtigom ug niyebe panahon sa tingniyebe ug ibutang kini sa mga lungag nga tabonan ug dagami ug sa mga sanga sa tugas. Sa ika-19ng siglo, ang mga makina sa paghimog ice cream naimbento ug gigamit alang sa dinaghan nga paggama. Diha sa balay ang yelo tipigan diha sa mga kahon sa yelo nga hinimo sa kahoy ug duul.
Kining sigloha nakakita sa dakong kalamposan sa mga teknik sa paghimog ice cream. Ang mga repridyeritor, mga makina sa ice cream, ug ubang gamit nagapadali sa paggamag ice cream diha sa pabrika ug sa balay, uban sa napauswag nga mga sukdanan sa kahinlo.
Ang Arte sa Paghimog Ice Cream
Ang hanas nga tighimog ice cream kinahanglang mahibalo sa iyang pangita, nga nagkahulogan nga siya kinahanglang usa ka tighimog dulse ug kosinero, usahay usa ka tawo sa arte, ug may pagkakemista ug bakteriyologo usab. Unsay nagpahimo sa ice cream nga lapot kaayo, kremahon, ug lamian? Aw, palandonga ang ginama sa pabrika nga ice cream ingong usa ka pananglitan. Sa panahon sa paggama, ang mga tambok ug espiso nga mga pinuga gikan sa utanon idugang aron molapot ang sambog. Isagol usab mao ang hustong gidaghanon sa itlog, asukar, ug, kon kinahanglan, natural nga pangkolor ug palami, sama sa kokwa, kape, ug prutas. Adunay peanut butter nga ice cream usab.
Human nga ang sambog masagol nag maayo diha sa 70 grado Sentigrado nga kainit, paaboton pa kini sa temperatura nga 90 grado Sentigrado sa pagpatay sa bisan unsang kagaw nga anaa niana. Human nga kini pabugnawon sa 4 grado Sentigrado, sa pipila ka oras, kini mobagtok. Ang ikaduhang yugto sa proseso mao ang pagpakamig. Ang temperatura kalit nga paubson sa -6 ngadto sa -10 grado Sentigrado, samtang hinay-hinayng ukayon ang sambog. Kini magpasulod sa hangin, usa sa mga butang nga nagpahimo sa naandang pagkakremahon sa ice cream.
Daghan nang siglo ang nangagi sukad nga gikalipayan sa mga Romano ang ilang mga sorbete ug sukad nga gipailaila ang ice cream sa palasyo ni Louis XIV. Apan sa sunod higayon nga imong kalipayan ang kalami sa imong paboritong pinakamig nga pangsira-gana, sorbete man o ice cream, pasalamati kadtong karaang mga Romano sa paghunahuna ug pag-imbento ug makapapresko nga ideya!