Nakakat-on Ako Pagdumot sa Akong Nagustohan
Ang pagpakigsumbagay mao niadto ang akong kinabuhi. Ako malipay nga makasumbag sa akong kaparang uban sa bug-os kong kusog ug makita siyang nahilukapa sa akong tiilan. Ako maukyaban nga magtindog sa tunga sa boksinganan ug makadungog sa tig-anunsiyo nga mosinggit sa akong ngalan ingong mananaog sa sumbagay. Gusto ko ang sumbagay! Apan, karon ang ideya mismo sa kapintasan makapalagot kanako. Nakakat-on ako pagdumot sa ako karong gitawag nga kriminal nga dula sa sumbagay.
NIADTONG 1944, sa siyete anyos ako, ako nagpuyo sa Lares, Puerto Rico, diin ako natawo. Kadto ang panahon nga ako grabeng nakuratan nga nawad-an sa akong inahan tungod sa kamatayon. Siya namatay gumikan sa kanser sa edad nga 32. Ang kaguol nahimong dili maagwanta sa dihang sa wala madugay, ako nahiuli sa balay gikan sa eskuylahan ug nakakita sa usa ka babaye nga gisabak sa akong amahan. Siya nahimong akong inaina.
Sa pagkamatikod sa dili nako pag-uyon, ang akong inaina nagmapintason kanako. Busa ako milayas sa balay. Ako miyuhot pagsakay sa usa ka trak nga kargadog uling ug mga kahil ug nahikatulog. Pagkadako sa akong katingala sa dihang ako nahigmata ug nakadiskobre nga ako didto na sa siyudad sa San Juan, sa pikas nga bahin sa isla!
Ang Butangero sa Kalye
Sulod sa walo ka bulan ako nagpuyo sa mga kalye sa San Juan. Ako kanunayng sungogon sa ubang mga batan-on. Ako mihukom nga kinahanglang ako makig-away aron mabuhi. Human sa walo ka bulan ako nakaplagan sa kapolisan ug gipapauli sa balay. Ako wala gayod makapaayon sa ideya nga adunay inaina ug migugol sa kadaghanan kong panahon diha sa kalye. Halos matag adlaw, ako malangkit sa usa ka away. Sa diyes anyos na ako, ako milayas na usab.
Human sa pila ka semana, ako gidakop na usab sa kapolisan. Niadtong panahona ako wala motug-an kanila sa akong ngalan ug kon tagadiin ako. Human mapakyas sa pagkaplag sa akong pamilya, ako ilang gipadala ngadto sa usa ka balay sa mga ilo nga gidumala sa gobyerno sa siyudad sa Guaynabo. Maoy didto nga akong gisul-ob ang una kong parisan sa guwantis sa boksing. Maoy didto usab nga sa unang panahon sa akong kinabuhi, akong nakita ang ngalang Jehova diha sa usa ka karatula. Nangutana ako bahin niadto, ug ako giingnan nga si Jehova mao ang Diyos sa mga Hudiyo. Wala gayod nako hikalimti kanang ngalana.
Sa 15 anyos na ako, ako mibiya sa balay sa mga ilo, nga wala na gayod mobalik. Aron pagbuhi sa akong kaugalingon ako misugod pagbaligyag mga mantalaan. Ugaling, ang matag kalye maoy teritoryo sa tinong tigbaligyag mantalaan. May usa lamang ka paagi sa pagtino sa akong kaugalingong ruta: ang pagpakigsumbagay! Ug ako nakigsumbagay gayod.
Duha ka tuig sa ulahi ako misulod sa Armi sa T.B. ug nakadawat sa paninugdang pagbansay sa Arkansas, T.B.A. Sa taudtaod ako nahimong membro sa tem sa boksing. Unya ako gibalhin ngadto sa yunit sa Espesyal nga mga Serbisyo. Ang akong mga buluhaton maoy didto sa gymnasium, ug ang akong sarhento maoy tigbansayg boksingero.
Usa ka Mapintas nga Dula
Nadawat ko ang pagbansay kon unsaon paggamit ang akong mga kumo sa pagdaot sa akong mga kaparang. Ako nabansay sa dili pagpakabana sa mga panaghigala sulod sa boksinganan. Sa pagbagting sa kampana, ang usa ka higala nahimong kaaway nga pukanon ug labing maayo nga palup-ogon nga dili na makabangon.
Buot kong magpabilin sa armi, apan giingnan ako sa akong sarhento: “Retiro gikan sa armi sa labing madali. Mahimong propesyonal nga boksingero, ug sa pila ka tuig, makita ti ka sa telebisyon nga makigboksing sa Madison Square Garden sa Siyudad sa New York.” Lisod nga tuohan kadto! Ako—ang timawa ug way-balayng batan-on—mahimong bantogang boksingero?
Human sa duha ka tuig ako migawas sa armi ug mibalik sa Puerto Rico. Usa ka adlaw niadtong 1956, akong nakita ang usa ka anunsiyo alang sa usa ka sangka sa sumbagay sa mga bag-ohan, ang Golden Gloves. Miapil ako sa sangka ug nahimong kampeyon sa welterweight sa Golden Gloves sa Puerto Rico. Unya gipaayroplano ako paingon sa Siyudad sa New York aron makigsangka sa Golden Gloves nasodnong sangka. Ako nakigsumbagay nga taman sa ginhawa aron makasulod sa semifinals, apan ako wala makadaog sa kampeyonato. Bisan pa niadto, sa taudtaod may mga tanyag gikan sa umaabot nga mga manedyer ug mga tigbansay. Busa gidawat ko ang usa ka tanyag nga magpabilin sa Siyudad sa New York ug magbansay aron mahimong propesyonal.
Niadtong 1958, ako nahimong propesyonal nga boksingero. Ug husto ang akong sarhento. Niadtong 1961, lima ka tuig human sa paggawas sa armi, ako nakita sa nasodnong telebisyon, nga nakigboksing sa Madison Square Garden. Daghan sa akong mga sangka sa boksing gihimo nianang bantog nga dapit sa dula.
Ang akong mga sumbag nagtapos sa mga karera sa ubay-ubayng boksingero. Usa ka boksingero nga taga-Mexico hingpit nga nawad-an sa iyang panan-aw ingong sangpotanan sa mapintas nakong mga sumbag. Ang laing sumbagay nga nahimong kabug-at usab sa akong konsensiya maoy batok sa kampeyon sa middleweight sa Dominican Republic. Sa wala pa ang boksing iyang gihimong dakong isyu ang kamatuoran nga ako mas bug-at kaniya ug tunga sa kilo. Ang iyang tinamdan nakapasuko kanako. Wala gayod ako motutol dihang ang usa ka kaparang may gamay kaayong bentaha kanako sa timbang. Giingnan ko siya: “Aw, pangandam kay karong gabhiona patyon ti ka!” Sa pagsulod nako sa boksinganan, usa ka mantalaan miingon nga ako may “satanasnong panagway.” Sa walay dos minutos, ang tawo nagbuy-od nga walay panimuot sa lona. Ang iyang pangsulod nga igdulongog grabe kaayong pagkadaot nga siya wala na gayod mootro pagpakigboksing.
Kon sa Unsang Paagi Nakat-onan Ko ang Pagdumot sa Boksing
Ang akong kabantog nakadani sa pagtagad ug panaghigala sa mga aktor ug mga musikero. Kas-a ang kanhing kampeyon sa kalibotan sa heavyweight nga si Joe Louis mao ang nagpromot sa usa sa akong mga away. Nagsige akog biyahe, nagbaton ug maluhong mga kotse, ug nagpahimulos sa ubang materyal nga mga butang. Ugaling, sama sa kadaghanang boksingero, ang akong kalamposan wala magdugay. Niadtong 1963, ako grabeng nasamdan sa ubay-ubayng mga boksing ug dili na makaboksing pag-usab.
Sa maomaong panahon nabasahan nako sa artikulo sa usa ka mantalaan nga ang usa ka bantog nga boksingero nahimong usa sa mga Saksi ni Jehova. Sa usa ka hinungdan, human mabasa ang artikulo, napatik sa akong hunahuna nga ang relihiyon sa mga Saksi ni Jehova alang lang sa mga tawong dato.
Latas sa misunod nga pila ka tuig, akong nasinati ang ubay-ubayng mga sakit. Nasinati ko usab ang mga yugto sa grabeng depresyon. Panahon sa usa nianang maong atake, akong gition ang usa ka pusil sa akong kasingkasing ug gipusil ang akong kaugalingon. Ang bala mitipsing tungod sa usa ka gusok, nga nakaluwas sa akong kinabuhi. Ako buhi, apan ako masulob-on kaayo ug masakiton kaayo. Wala nay kuwarta, wala nay kabantog, wala nay boksing!
Unya, usa ka adlaw ang akong asawa, si Doris, misulti kanako nga siya nagtuon sa Bibliya uban sa mga Saksi ni Jehova ug nga gusto niyang motambong sa mga tigom sa Kingdom Hall. “Ambut, Doris,” matud nako. “Kita mga tawong kabos, ug ang mga Saksi ni Jehova maoy dato ug importanteng mga tawo.” Siya miingon kanako nga kadto dili tinuod ug nga ang Saksi nga nagtuon uban kaniya nagpuyo sa among silinganan mismo. Mao nga miuyon ako sa iyang desisyon nga motambong sa mga tigom. Sa usa ka higayon samtang gipaabot ko siya sa gawas sa Kingdom Hall, usa ka Saksi midapit kanako sa pagsulod. Ako nagsul-ob niadto sa hugawng sininang pangtrabaho, apan siya namugos. Ako giabiabi bisan pa sa akong panagway. Ang mahigalaong palibot nakapahingangha kaayo kanako.
Sa wala madugay ako misugod pagtuon sa Bibliya uban sa mga Saksi. Akong nakat-onan nga si Jehova dili lamang Diyos sa mga Hudiyo, sumala sa gisulti kanako, kondili siya ang bugtong matuod nga Diyos, ang Labing Gamhanan, ang Maglalalang sa tanang butang. Akong nahibaloan usab nga si Jehova nga Diyos nagdumot sa kapintasan. Sa Salmo 11:5 ang Bibliya nag-ingon: “Si Jehova mismo nagsusi sa matarong nga usa ingon man sa daotan nga usa, ug si bisan kinsa nga nahigugma sa kapintasan gidumtan gayod sa Iyang kalag.” Busa ako mibulag gikan sa tanang butang nga nalangkit sa boksing. Akong nasayran sa laktud kon unsa ka pintas kana nga dula. Human masayod kon unsay pag-isip sa Diyos niini, walay pagduhaduha diha sa akong hunahuna nga ang boksing maoy tuman kadaotan, kriminal nga dula. Oo, ako nakakat-on sa pagdumot sa dula nga akong nagustohan.
Ang Labing Dakong Pribilehiyo
Niadtong 1970, mihukom ako sa pagpahinungod sa akong kinabuhi kang Jehova. Si Doris ug ako nabawtismohan sa Oktubre nianang tuiga. Sukad niadto napahimuslan nako ang pribilehiyo sa pagsangyaw ngadto sa uban. Ingong bug-os-panahong magwawali, ako nakaambit sa pagtabang ug mga 40 ka tawo nga mahimong mga magsisimba ni Jehova.
Nga mabasolon, ako karon nagaantos tungod sa mga kadaot nga akong naagoman panahon sa mapintason kong katuigan. Naagoman ko ang ginatos ka sumbag sa akong ulo, nga nagpahinabog permanenteng kadaot sa akong utok. Ako adunay mga suliran sa paghinumdom sa dili pa dugayng panghitabo ug sa akong pangsulod nga igdulongog, nga nagaapektar sa akong panimbang. Kon lihokon nako nga tulin kaayo ang akong ulo, ako malipong. Gawas pa, ako kinahanglang motomar nga regular ug tambal alang sa akong mga suliran sa depresyon. Hinuon, ang akong isigka-Kristohanon nakasabot ug nagtabang nako sa pagsagubang. Ako mapasalamaton kaayo kang Jehova tungod sa paghatag kanako ug kusog sa pagpakigbahin nga regular sa pagpahayag sa iyang ngalan ug mga katuyoan sa uban.
Gipahimuslan ko ang labing dakong pribilehiyo sa tanan—nga mao, ang pagbaton ug personal nga relasyon uban sa Diyos nga Labing Gamhanan, si Jehova. Sa dihang ako usa ka boksingero, gipasubo ko ang kasingkasing ni Jehova sa matag sangka. Karon ako makapalipay sa iyang kasingkasing. Gibati ko nga samag siya nakigsulti kanako sa personal sa dihang siya nag-ingon: “Magmaalamon ka, anak ko, ug lipaya ang akong kasingkasing, aron matubag ko siya nga nagatamay kanako.”—Proverbio 27:11.
Sa dili madugay taposon na ni Jehova ang mga buhat ni Satanas, lakip ang tanang kapintasan ug kadtong nagpasiugda niini. Pagkamapasalamaton nako kang Jehova tungod sa pagtudlo kanako dili lamang sa paghigugma sa maayo kondili sa pagdumot usab sa daotan! Kana naglakip sa pagdumot sa kriminal nga dulang boksing. (Salmo 97:10)—Sumala sa giasoy ni Obdulio Nuñez.
[Hulagway sa panid 13]
Si Obdulio Nuñez