Naglutaw nga mga Isla sa Lake Titicaca
SINULAT SA KORESPONSAL SA PAGMATA! SA PERU
MGA isla nga naglutaw? Oo, naglutaw ang mga isla diha niining talagsaong linaw sa Amerika del Sur. Ug may mga tawo nga nagpuyo niana.
Ang Lake Titicaca, nga sikbit sa utlanan sa Peru diha sa kasadpan ug Bolivia sa silangan, mao ang labing taas nga linaw nga mahimong biyaheon sa dagkong mga barko. Nahimutang sa 3,810 ka metros ibabaw sa lebel sa dagat, kini may gisangkarong 190 ka kilometros sa amihanan-kasadpan ngadto sa habagatan-silangan nga direksiyon ug kapin sa 80 kilometros patabok gikan sa labing lapad nga dapit niini.
Ang pipila sa daghang isla sa Lake Titicaca maoy naglutaw nga mga banig sa uga nga totora, samag tambo nga papiro nga nanubo sa mabawng mga dapit sa linaw. Ang mga tambo nanubo gikan sa ilalom sa linaw, molusot sa daghang piye sa tubig, ug nanuybo sa daghang piye ibabaw sa tubig. Aron mahimong usa ka isla, ang mga tambo, samtang nakagamot sa ilalom sa linaw, mobawog ug magkasalapid nga mahimog samag dagami nga plataporma, o salog, nga napatong sa ibabaw sa tubig. Dayon ang mga tambo butangag lapok ug palig-onon pinaagi sa pagdugang ug pinutol nga mga tambo. Ang mga molupyo nagpuyo diha sa mga payag nga hinimo sa tambo diha sa naglutaw nga isla nga tambo.
Ang The Encyclopædia Britannica nag-ingon nga ang mga tawo dugay nang nagpuyo niining mga islaha. Kini usab nag-ingon: “Ang mga molupyo sa isla maghimo sa ilang popular nga balsa—mga sakayan nga hinimo gikan sa binangan nga mga ugang tambo nga kaamgid sa sakayan nga papiro nga gilarawan diha sa karaang mga monumento sa Ehipto.”
Dili pa dugay, ang mga Saksi ni Jehova nakabaton ug usa ka sakayan sa pagsangyaw sa mga tawo diha sa mga isla sa Lake Titicaca. Ang sakayan de-motor ug makasakay ang 16 ka tawo. Sa dihang ang mga Saksi maglakaw gikan sa balay ngadto sa balay niining mga isla nga tambo, sila miingon nga molihok ug diyutay ang ibabaw inigtamak. Makapalipay, ang mensahe sa Gingharian sa Diyos karon nakaabot bisan sa mga tawo niining hilit nga mga isla nga naglutaw!