Mohagok Ka Ba?

KUSOG KA bang mohagok? Ang pipila ka tawo kusog nga mohagok ug wala gani masayod niana. Busa, wala sila mahibalo kon nganong sila mobangon nga luya ug samag hubog. Ang ilang sakit nailhan nga sleep apnea o temporaryong paghunong sa pagginhawa kon matulog. Samtang matulog ang usa ka tawo nga adunay sakit nga sama niini, ang kaunoran sa tutonlan nga nagbukas kanunay sa mga agianan sa gininhawa morelaks ngadto sa gilapdon nga masirhan ang agianan sa hangin. Mga usa ka minuto ang molabay una ang maong tawo maghangos ug makamata sa makadiyut. Kasagaran sa mga nasakit ug apnea wala masayod nga ang ilang pagkatulog nabalda. Ang bugtong ilhanan mahimong maggikan sa kauban sa kuwarto nga sagad makamata sa hagok. Ang mga eksperto nagtuo nga ang apnea motultol sa mga aksidente sa sakyanan ug sa trabaho ug nga kana mahimong usa ka hinungdan sa estrok ug mga atake sa kasingkasing.

May sulbad ba? Ang Complete Home Medical Guide (Columbia University College of Physicians and Surgeons) mitambag: “Ang mga lalaki maapektahan nga labaw sa 20 ka beses ang kasubsob kay sa mga babaye. Kapin sa katunga sa mga nasakit niini maoy mga tambok, nga dugang pang nagpameligro sa normal nga pag-agi sa hangin. Busa, ang pagpaus-os sa timbang maoy hinungdanong bahin sa pagtambal.” Ang samang basahon nagsugyot nga sa grabeng mga kahimtang, ang operasyon nga makaiban sa nakasampong sa agianan sa hangin mahimong angay.