Nahibulong Ka ba Sukad?

UNSAY usa sa kinadak-ang mga babag nga nag-ulang sa mga Muslim ug mga Hudiyo gikan sa mga relihiyon sa Kakristiyanohan? Kini mao ang pagtulon-an sa “Santisima Trinidad.” Unsay ginaingon niining maong pagtulon-an? Ang Trinidad gihubit sa Kredong Athanasian ingong ang pagsimba sa “usa ka Diyos diha sa Trinidad . . . Ang Amahan Diyos, ang Anak Diyos, ug ang Espiritu Santo Diyos; ug bisan pa sila dili tulo ka diyos, kondili usa ka Diyos.” Ang kada usa gikaingong walay kataposan, labing gamhanan, nga walay labaw o ubos sa usag-usa; ang matag usa gitawag nga Diyos, ug bisan pa silang tanan usa lamang ka Diyos. Ang mga teologo naghubit niini ingong usa ka misteryo.

Ang Bibliya ba dunay ikasulti bahin sa Trinidad?a Ang mosunod nga mga pangutana hayan motultol kanimo ngadto sa pipila ka makapainteres nga mga panghinapos. Ang Biblikanhong mga tubag makita sa panid 12.

1. Kon ang Diyos mao ug kanunayng usa ka Trinidad, nakita ba sa mga Hudiyo kana nga pagtulon-an diha sa Hebreohanong Kasulatan (“Daang Tugon”)?

2. Unsay giingon sa Hebreohanong Kasulatan mahitungod sa Diyos?​—Deuteronomio 6:4; Salmo 145; Zacarias 14:9.

3. Ang Hebreohanong Kasulatan naghisgot ba sa balaang espiritu?​—Maghuhukom 15:14; Zacarias 4:6.

4. Sa Hebreohanong Kasulatan, ang balaang espiritu gihisgotan ba ingong usa ka persona o ingong aktibong gahom sa Diyos?​—Maghuhukom 14:6; Isaias 44:3.

5. Ang Hebreohanong Kasulatan naghisgot ba sa usa ka gisaad nga Mesiyas, o Dinihogang Usa?​—Daniel 9:25, 26.

6. Duna bay bisan unsang teksto sa Hebreohanong Kasulatan nga nagpakasama sa Mesiyas uban sa Diyos?​—Salmo 2:2, 4-8; Isaias 45:18; 61:1.

7. Duna bay teksto sa Hebreohanong Kasulatan nga naghatag ug lig-ong pasikaran sa pagtuo nga si Jehova maoy tulo ka persona sa usa ka Diyos?​—Isaias 44:6; 46:9, 10.

8. Kinsay nagpadala kang Jesus sa yuta? Nan kinsay labaw?​—Juan 5:19, 23, 30; 8:42; 14:28; 17:3.

9. Nag-ingon ba gayod si Jesus nga siya mao ang Diyos?​—Juan 7:28, 29; 14:6.

10. Daghan ang nakakita kang Jesus, apan duna bay tawo nga nakakita gayod sa Diyos?​—Juan 1:18; 6:46.

11. Si Jesus ba nag-ingon nga siya maoy ‘Anak sa Diyos’ o nga siya maoy ‘Diyos nga Anak’?​—Juan 10:36; 1 Juan 4:15; 5:5, 13.

12. Nag-ingon ba gayod si Jesus nga siya maoy tupong sa Amahan?​—Juan 14:28; 20:17.

13. Ang mga pulong ba nga “Ako ug ang Amahan usa ra” nagpamatuod sa usa ka Trinidad?​—Juan 10:30; 17:21; Mateo 24:36.

14. Giunsa paglantaw sa unang mga tinun-an si Jesus?​—Juan 1:29, 34, 41, 49; 6:69; 1 Corinto 11:3.

15. Unsay panglantaw sa Diyos kang Jesus?​—Marcos 9:7; Lucas 2:9-11.

16. Ang Gregong Kasulatan (“Bag-ong Tugon”) nagsupak ba sa Hebreohanong Kasulatan maylabot sa balaang espiritu ingong aktibong gahom sa Diyos?​—Mateo 3:11; Lucas 1:41; Juan 14:26; Buhat 1:8; 4:31; 10:38.

17. Sa panahon sa bawtismo ni Jesus, diin man ang Amahan, ang Anak, ug ang balaang espiritu? Sila ba tulo sa usa?​—Mateo 3:16, 17.

18. Unsang posisyon ang giokupar ni Jesus sa mga langit?​—Buhat 7:55, 56; Roma 8:34; Colosas 3:1; Hebreohanon 12:2.

19. Kinsay naghatag kang Jesus nianang tinuboy nga posisyon?​—Filipos 2:9-11.

20. Kana ba naghimo kang Jesus nga Diyos o ikaduha lamang sa Diyos diha sa uniberso?​—1 Corinto 11:3; Filipos 2:9-11.

21. Kinsay Supremong Soberano sa Uniberso?​—Deuteronomio 3:24; Buhat 4:24-27; 1 Corinto 15:28.

Nahibulong Ka ba Sukad? Ang mga Tubag sa Bibliya

“Human bawtismohi mihaw-as gilayon si Jesus sa tubig; ug, tan-awa! nabuksan ang mga langit, ug iyang nakita nga nanaog sama sa usa ka salampati ang espiritu sa Diyos paingon diha kaniya. Tan-awa! Usab, dihay tingog gikan sa mga langit nga miingon: ‘Kini ang akong Anak, ang hinigugma, si kinsa akong giuyonan.’”​—Mateo 3:16, 17.

Ang mosunod maoy pipila ka teksto nga nagatubag sa mga pangutanang gisukna sa panid 11:

1. Gidawat sa The Encyclopedia of Religion nga: “Ang mga teologo karon nagkauyon nga ang Hebreohanong Bibliya wala maundi sa doktrina sa Trinidad.” Ang New Catholic Encyclopedia nag-ingon usab: “Ang doktrina sa Santisima Trinidad wala itudlo diha sa D[aang] T[ugon].”

2. “Patalinghog, Oh Israel: Si Jehova nga atong Diyos maoy usa ka Jehova.” (Deuteronomio 6:4) “Si Jehova magahari sa tibuok nga yuta. Niadtong adlawa usa lamang si Jehova, ug usa ra ang iyang ngalan.”​—Zacarias 14:9.

3. “Ang espiritu ni Jehova naglihok diha [kang Samson], ug ang mga gapos nga diha sa iyang bukton nahimo nga ingon sa lino nga nasunog sa kalayo, mao nga ang iyang mga bugkos nangahulog gikan sa iyang mga kamot.” (Maghuhukom 15:14) “Kini mao ang pulong ni Jehova kang Zorobabel, nga nagaingon, ‘“Dili pinaagi sa kusog, ni pinaagi sa gahom, kondili pinaagi sa akong espiritu,” miingon si Jehova sa mga panon.’”​—Zacarias 4:6.

4. “Ang espiritu ni Jehova nagalihok diha [kang Samson], mao nga iyang gigisi kini sa duha, nga daw siya nagagisi sa nating kanding sa duha, ug wala siyay gikuptan sa iyang kamot.” (Maghuhukom 14:6) “Ako magabubo sa akong espiritu sa ibabaw sa imong kaliwat, ug ang akong panalangin sa imong kaanakan.”​—Isaias 44:3.

5. “Hibaloi ug sabta nga gikan sa paggula sa sugo sa pagpasig-uli ug pagtukod pag-usab sa Jerusalem hangtod sa Mesiyas nga Pangulo, mapito ka semana, kan-umag duha ka semana usab. . . . Ug tapos sa kan-umag duha ka semana ang Mesiyas pagaputlon, nga walay bisan unsa alang sa iyang kaugalingon.”​—Daniel 9:25, 26.

6. “Kini mao ang giingon ni Jehova, ang Maglalalang sa mga langit, Siya ang matuod nga Diyos, ang Mag-uumol sa yuta ug Magbubuhat niini, Siya ang Usang lig-ong mitukod niini, kinsa wala maglalang niini sa walay kapuslanan, kinsa nag-umol niini aron puy-an: ‘Ako mao si Jehova, ug wala nay lain.’”​—Isaias 45:18.

7. “Hinumdomi ang unang mga butang sa karaan, nga ako mao ang Balaang Usa ug walay laing Diyos, ni may lain pa nga sama kanako.”​—Isaias 46:9.

8. “Dili ako makahimog usa ka butang sa akong kaugalingong pagbuot; sumala sa akong madunggan, ako magahukom; ug ang paghukom nga akong ipakanaog matarong, tungod kay akong gitinguha, dili ang akong kaugalingong kabubut-on, kundili ang kabubut-on niya nga nagpadala kanako.” (Juan 5:30) “Kon kamo nahigugma kanako, kamo magmaya nga ako moadto sa Amahan, tungod kay ang Amahan labaw pa kanako.”​—Juan 14:28.

9. “Ako wala moanhi sa akong kaugalingong pagbuot, apan siya nga nagpadala kanako maoy tinuod, ug kamo wala makaila kaniya. Nakaila ako kaniya, tungod kay ako usa ka hawas gikan kaniya, ug kana Siya nagpadala kanako.”​—Juan 7:28, 29.

10. “Walay tawo nga nakakita sa Diyos sa bisan unsang panahon; ang bugtong-gianak nga diyos kinsa anaa sa dughan nga pagkabutang uban sa Amahan mao ang nagpatin-aw kaniya.” (Juan 1:18) “Dili nga may tawo na nga nakakita sa Amahan, gawas kaniya nga gikan sa Diyos; kini siya nakakita sa Amahan.”​—Juan 6:46.

11. “Moingon ba diay kamo kanako kinsa gibalaan sa Amahan ug gipadala nganhi sa kalibotan, ‘Ikaw nagapasipala,’ tungod kay ako miingon, ako Anak sa Diyos?”​—Juan 10:36.

12. “Kon kamo nahigugma kanako, kamo magmaya nga ako moadto sa Amahan, tungod kay ang Amahan labaw pa kanako.”​—Juan 14:28.

13. “Mahitungod niana nga adlaw ug takna walay nahibalo, ni ang mga anghel sa kalangitan ni ang Anak, gawas sa Amahan lamang.” (Mateo 24:36) “Aron nga sila [mga sumusunod ni Jesus] mahimong usa, maingon nga ikaw, Amahan, nahiusa kanako ug ako nahiusa kanimo, nga sila [mga sumusunod ni Jesus] usab mahiusa kanato, aron nga ang kalibotan motuo nga ikaw nagpadala kanako.”​—Juan 17:21.

14. “Tan-awa, ang Kordero sa Diyos nga nagakuha sa sala sa kalibotan!” (Juan 1:29) “Among gituohan ug nahibaloan nga ikaw mao ang Balaang Usa sa Diyos.”​—Juan 6:69.

15. “Usa ka tingog ang migula gikan sa panganod: ‘Kini mao ang akong Anak, ang hinigugma; pamati kamo kaniya.’”​—Marcos 9:7.

16. “Kamo magadawat ug gahom sa dihang ang balaang espiritu moabot nganha kaninyo.” (Buhat 1:8) “Ang Diyos nagdihog [kang Jesus] ug balaang espiritu ug gahom.”​—Buhat 10:38.

17. Tan-awa ang ilustrasyon, sa wala, ug ang teksto sa ibabaw ug sa panid 12.

18. “Samtang kita nagatutok sa Pangulong Ahente ug Maghihingpit sa atong pagtuo, si Jesus. Tungod sa kangaya nga gibutang atubangan kaniya siya miagwanta ug sakitanang estaka, nagpakawalay-bili sa kaulaw, ug milingkod na sa tuong kamot sa trono sa Diyos.”​—Hebreohanon 12:2.

19. “Tungod niini mismong katarungana usab ang Diyos mibayaw kaniya ngadto sa usa ka labaw nga katungdanan ug sa maluloton mihatag kaniya sa ngalan nga labaw sa tanang uban pa nga ngalan.”​—Filipos 2:9.

20. “Ang ulo sa matag lalaki mao ang Kristo; sa baylo ang ulo sa usa ka babaye mao ang lalaki; sa baylo ang ulo sa Kristo mao ang Diyos.”​—1 Corinto 11:3.

21. “Oh Soberanong Ginoong Jehova, . . . kinsa bay diyos sa mga langit o ibabaw sa yuta nga makahimo sama sa imong mga buhat?” (Deuteronomio 3:24) “Sa dihang ang tanang butang mapasakop na ngadto kaniya [Jesus], niana ang Anak mismo magpasakop usab sa iyang kaugalingon ngadto sa Usa nga nagpasakop sa tanang butang ngadto kaniya, aron ang Diyos mahimong tanang butang ngadto sa tanan.”​—1 Corinto 15:28.

[Footnote]

[Hulagway sa panid 13]

Ang Diyos ba nagbubo ug balaang espiritu diha sa iyang kaugalingon?