Mga Batan-on Nangutana . . .

Nakahimo ba Ako ug Sala nga Dili-Mapasaylo?

“WALA pa gayod ako mobati ug kasubo nga sama niini. Wala na ako ing pagtahod sa kaugalingon, ug ako naghunahuna nga dili gayod ako pasayloon sa Diyos.”​—Marco.a

“Nahigawad kaayo ako. Gilumsan ang akong kasingkasing sa pagbati sa sala. Ako naghunahuna nga ako nakahimo ug pipila ka dili-mapasaylong mga kalapasan.”​—Alberto.

“Walay tawo nga dili makasala,” matud sa Bibliya. (1 Hari 8:46) Apan usahay ang usa ka batan-on mobati tingali nga siya nakahimo ug labaw pa kay sa yanong sayop. Sama kang Marco ug Alberto, hayan siya nabug-atan sa walay-hunong nga pagbati sa pagkasad-an. Tingali mobati siya nga ang iyang nahimo ngil-ad kaayo, tuman-kadaotan, nga ang Diyos dili gayod makapasaylo kaniya.

Komosta na man kon ang mga pagbati nga sama niini maghasol kanimo? Magmadasigon ka. Ang imong kahimtang adunay paglaom.

Kon Nganong ang Atong Konsensiya Magsakit Kanato

Kinaiyanhon lamang nga masubo sa dihang ikaw nakahimo ug usa ka binuang nga sayop. Kitang tanan natawo uban sa katakos sa gitawag sa Bibliya nga “konsensiya.” Kini maoy usa ka pansulod nga pagbati sa husto ug sayop, usa ka pansulod nga pasidaan nga sagad motingog sa dihang kita makahimo ug usa ka daotang butang. (Roma 2:14, 15) Pananglitan, tagda si Haring David. Siya nakapanapaw uban sa asawa sa laing tawo. Sa ulahi, gipahinabo niya nga ang iyang bana nga si Uria seguradong mamatay. (2 Samuel 11:2-17) Ang epekto diha kang David?

“Sa adlaw ug sa gabii ang kamot [sa Diyos] mabug-at ibabaw kanako,” miangkon si David. Oo, gibati niya ang kabug-at gumikan sa dili pag-uyon sa Diyos. Si David miingon usab: “Walay kalinaw sa akong mga bukog tungod sa akong sala. Kay ang akong kaugalingong mga kalapasan milapaw sa akong ulo; ingon sa usa ka mabug-at nga palas-anon sila hilabihan da kabug-at alang kanako. . . . Sa tibuok adlaw naglakaw ako nga masulob-on.” (Salmo 32:4; 38:3-6) Ang konsensiya ni David nagpadayon sa paghasol kaniya hangtod nga siya napalihok sa paghimog positibong aksiyon ug paghinulsol sa iyang kalapasan.

Sa samang paagi, kon ikaw natudloan sa Kristohanong mga ginikanan ug ikaw mipalayo sa mga sukdanan sa Bibliya, ikaw mobatig kasubo. Kining pagbati sa pagkahasol maoy normal, maayo. Kini makapalihok sa usa ka tawo sa pagtul-id sa iyang kaugalingon o sa pagpangayo ug tabang una pa ang usa ka sayop mahimong nakagamot nga bisyo. Sa laing bahin, ang usa ka tawo nga magpadayon diha sa sala magadaot sa iyang konsensiya. Ngadtongadto mahimo kining kubalan, sama sa gikubalang panit. (1 Timoteo 4:2) Ang moral nga kadunotan seguradong mosunod.​—Galacia 6:7, 8.

Diyosnong Kaguol

Nan, dili ikatingala nga ang Bibliya naghisgot sa “usa ka sala nga makamatay.” (1 Juan 5:16; itandi ang Mateo 12:31.) Ang maong sala dili lamang usa ka kahuyangan sa unod. Kini gihimo nga tinuyo, sa katig-a, sa kagahian. Dili ang sala mismo kondili ang kahimtang sa kasingkasing sa makasasala ang maghimo sa maong sala nga dili mapasaylo.

Apan, ang kamatuoran nga ikaw mibatig kahasol ug naguol gumikan sa imong dili maayong kagawian nagpakita nga ikaw wala makahimo ug usa ka sala nga dili mapasaylo. Ang Bibliya nag-ingon nga “ang kasubo sa diyosnong paagi mopasangpot sa paghinulsol ngadto sa kaluwasan.” (2 Corinto 7:10) Aw, matikdi ang tambag nga gihatag sa Santiago 4:8-10: “Hinloi ang inyong mga kamot, kamong mga makasasala, ug lunsaya ang inyong mga kasingkasing, kamong mga maduhaduhaon. Panagkaguol kamo ug pagbangutan ug panghilak. Himoa nga pagbangutan ang inyong pagkatawa, ug ang inyong kangaya nga kaminghoy. Ipaubos ang inyong kaugalingon sa mga mata ni Jehova, ug siya magbayaw kaninyo.”

Tinuod, ang sayop tingali maoy seryoso kaayo. Ang batan-ong si Julie, pananglitan, nalangkit sa hapyoranay ug hinagkanay uban sa usa ka hinigugma. “Sa sinugdan gibati ko ang hilabihang pagkasad-an,” siya mitug-an, “apan sa paglabay sa panahon, naanad na ako niini. Wala na kini maghasol kaayo sa akong konsensiya.” Ngadtongadto, ang mahugawng mga buhat miuswag ngadto sa punto sa pagpakigsekso. “Mibati ako ug hilabihang kaguol,” matud ni Julie. “Ang akong konsensiya nahuyang hangtod sa punto nga kini nahitabo sa makadaghan.”

Wala na bay paglaom ang maong kahimtang? Dili kay walay paglaom. Komosta si Manases, nga usa sa mga hari sa Juda? Nakahimo siya ug seryoso kaayong mga sala, lakip ang espiritismo ug paghalad ug mga bata. Bisan pa niana, gipasaylo siya sa Diyos tungod kay sinsero siyang naghinulsol. (2 Cronicas 33:10-13) Komosta si Haring David? Kay naghinulsol sa iyang daotang mga buhat, nakaplagan niya si Jehova ingong usa ka Diyos nga “maayo ug andam mopasaylo.”​—Salmo 86:5.

Ang mga Kristohanon karong adlawa gipasaligan niini: “Kon atong isugid ang atong mga sala, siya kasaligan ug matarong aron sa pagpasaylo kanato sa atong mga sala ug sa paghinlo kanato gikan sa tanang pagkadili-matarong.” (1 Juan 1:9) Ngadto kang kinsa nga ang usa mosugid? Una, kang Jehova nga Diyos. “Sa iyang atubangan ibubo ang imong kasingkasing.” (Salmo 32:5; 62:8) Tingali makatabang kanimo ang pagbasa sa mahinulsolong pagsugid ni David sa Salmo 51.

Dugang pa, ang Bibliya nag-awhag sa mga Kristohanon nga nahulog sa seryosong sala sa pagpakigsulti sa mga ansiano sa kongregasyon. (Santiago 5:14, 15) Ang ilang tiunay nga tambag ug mga pag-ampo makatabang kanimo sa pagtukod pag-usab sa imong relasyon uban sa Diyos ug sa pagbaton pag-usab ug hinlong konsensiya. Sila makaila sa kalainan taliwala sa kahuyangan ug tuman-kadaotan. Kinahanglang tinoon usab nila nga makadawat ka sa gikinahanglang tabang aron malikayan ang pagbuhat pag-usab sa imong kalapasan. Si Julie, kay mihimo niining maisogon nga lakang mismo, misugyot: “Gisulayan ko ang ‘pagbadlong sa akong kaugalingon’ ug naghunahuna pa gani nga kana misaler sa usa ka sukod. Apan tapos sa usa ka tuig akong nahibaloan kon unsa ako ka sayop. Dili nimo masulbad ang seryosong mga suliran kon walay tabang gikan sa mga ansiano.”

Pagbati sa Pagkasad-an sa Gagmayng mga Sala

Usahay, hinuon, ang usa ka batan-on “mohimo ug sayop nga lakang sa dili pa niya himatngonan kini.” (Galacia 6:1) O siya motugot sa unodnong awhag nga maoy mogahom. Ang usa ka batan-ong anaa niining kahimtanga mag-antos tingali ug dulot nga mga pagbati sa sala​—tingali labaw pa nga pagbati sa sala kay sa angay sa maong kasaypanan. Ang wala kinahanglanang pagkaguol mosangpot. Ang maong hilabihang mga pagbati sa pagkasad-an mahimong maoy resulta sa usa ka maayo apan sobra ka sensitibong konsensiya. (Roma 14:1, 2) Hinumdomi, sa dihang kita makasala “aduna kitay magtatabang uban sa Amahan, si Jesu-Kristo, ang usa nga matarong.”​—1 Juan 2:1, 2.

Tagda, pag-usab, ang kaso sa batan-ong si Marco, nga gikutlo sa sinugdanan. Kining batan-ong Kristohanon nagtuo nga siya nakahimo ug sala nga dili mapasaylo. Kanunay niyang gisultihan ang iyang kaugalingon kaniadto: ‘Nasayod ako pag-ayo sa mga prinsipyo sa Bibliya, apan dili ako makahunong sa pagpakasala!’ Unsay iyang sala? Ang suliran sa masturbasyon. ‘Sa unsang paagi ako pasayloon sa Diyos kon dili nako maundang ang bisyo?’ mangatarongan si Marco. Si Alberto, kinsa susamang may mga pagsugmat sa pag-abuso sa kaugalingon, miingon: “Gibati nako ang sala sa akong kahiladman kay dili ako makabiya sa sala.”

Ang masturbasyon maoy usa ka mahugaw nga bisyo. (2 Corinto 7:1) Hinunoa, ang Bibliya wala maglakip niana sa seryosong mga sala sama sa pakighilawas. Sa pagkatinuod, wala gayod kini maghisgot niini. Busa, ang pagsugmat sa masturbasyon dili gayod kay dili mapasaylo. Ang pag-isip niana nga daw kini dili mapasaylo sa pagkatinuod mahimong peligroso; ang usa ka batan-on hayan mangatarongan nga walay kapuslanan ang pagpaningkamot sa pagbuntog sa suliran. Apan ang mga prinsipyo sa Bibliya nagpakita nga ang usa ka Kristohanon kinahanglang maningkamot pag-ayo sa pagpakigbisog niining maong bisyo.b (Colosas 3:5) Si Jehova nasayod nga “kita masayop sa makadaghan.” (Santiago 3:2) Kon mahitabo ang pagsugmat, ang usa ka batan-on dili kinahanglang mobati nga hinukman.

Ang susama matuod sa ubang mga sipyat ug mga kalapasan. Si Jehova wala magkinahanglan nga silotan nato pag-ayo ang atong kaugalingon pinaagi sa hilabihang pagbati sa sala. Hinunoa, siya mahimuot sa dihang mohimo kitag mga lakang sa pagtul-id sa suliran.​—2 Corinto 7:11; 1 Juan 3:19, 20.

Mga Tuboran sa Tabang ug Paghupay

Apan, kalagmitan magkinahanglan ka ug personal nga tabang sa pagbuhat niana. Ang mahinadlokon-sa-Diyos nga mga ginikanan sagad dakog mahimo sa pagtabang ug pagpaluyo sa ilang mga anak. Ug ang Kristohanong kongregasyon magatanyag ug ubang mga paagi sa pagpaluyo. Si Marco nahinumdom: “Ang usa ka butang nga nakatabang gayod kanako mao ang pagpakigsulti sa usa ka ansiano. Kinahanglan akong makabaton ug kaisog sa pagpakigsulti ug pagtug-an kaniya sa akong labing pribadong mga hunahuna. Apan ang pagpakigsulti nakapasalig nako kaniya, busa nangayo ako sa iyang tambag.” Si Alberto, usab, mihangyog tambag gikan sa usa ka ansiano. “Dili nako malimtan ang iyang makapadasig nga tambag,” matud ni Alberto. “Iya kong giingnan nga sa dihang batan-on pa siya, may sama usab siyang suliran. Dili gayod ako makatuo niana. Namati ako kaniya uban sa dakong apresasyon sa iyang pagkamatinud-anon.” Uban sa maong tabang ug pagpaluyo, si Marco ug Alberto nakabuntog sa ilang mga suliran. Ang duha sa pagkakaron adunay mga katungdanan sa ilang tagsatagsa ka mga kongregasyon.

Ang malugotong pag-ampo maoy laing tabang. Sama kang David, makaampo ka alang sa “usa ka putli nga kasingkasing” ug “usa ka bag-ong espiritu, usa ka lig-on nga espiritu.” (Salmo 51:10) Ang pagbasa sa Pulong sa Diyos maoy laing tuboran sa kahupayan. Pananglitan, makapadasig kanimo ang pagkahibalo nga si apostol Pablo may mga panagbangi usab sa kahiladman. Siya miangkon: “Dihang buot kong buhaton ang maayo, ang daotan ania uban kanako.” (Roma 7:21) Si Pablo milampos sa pagkontrolar sa iyang sayop nga mga kiling. Molampos ka usab. Hayan makaplagan nimong sa linain makapahupay ang pagbasa sa mga salmo, ilabina kadtong naghisgot sa pagpasaylo sa Diyos, sama sa Salmo 25, 86, ug 103.

Bisan unsay mahitabo, likayi ang pagpalain sa imong kaugalingon ug pagtugot sa imong kaugalingon nga gamhan sa pagkadili-malaomon. (Proverbio 18:1) Pahimusli sa bug-os ang kaluoy ni Jehova. Hinumdomi, siya ‘madagayaong nagapasaylo’ pinasikad sa halad lukat ni Jesus. (Isaias 55:7; Mateo 20:28) Ayaw pakamenosa ang imong mga sayop, apan ayaw paghinapos nga ang Diyos dili makapasaylo kanimo. Palig-ona ang imong pagtuo ug ang imong determinasyon sa pag-alagad kaniya. (Filipos 4:13) Ngadtongadto makabaton ka ug kalinaw sa hunahuna ug dulot nga kangaya sa kahiladman tungod sa pagkasayod nga ikaw gipasaylo.​—Itandi ang Salmo 32:1.

[Mga footnote]

[Hulagway sa panid 19]

Ang pagpakig-estorya sa mga butang uban sa usa ka takos nga Kristohanon makahatag kanimo ug usa ka bag-ong panglantaw bahin sa mga butang