Ang Hunahuna sa Bibliya

Nagahatag ba ang Diyos ug mga Ganti?

OO, SIYA nagahatag. Kon mao, hinakog ba ang pag-alagad sa Diyos nga naghunahuna ug ganti? Dili, kay siya mismo nagbutang ug mga ganti atubangan sa iyang matinumanong mga alagad. Sa pagkamatuod, ingong usa ka Diyos sa hustisya ug gugma, si Jehova nag-obligar sa iyang kaugalingon nga gantihan kadtong nag-alagad kaniya. Ang iyang Pulong, sa Hebreohanon 11:6, nag-ingon sa bahin niini: “Ang tawo nga moduol sa Diyos kinahanglang magatuo sa duha ka butang, una nga ang Diyos naglungtad ug ikaduha nga ang Diyos magaganti niadtong magapangita kaniya.”​—Phillips.

Ang pagpasundayag ug tiunay nga pagtuo sa Diyos modangat sa panaghigalaay uban kaniya, ug kining maong panaghigalaay mosangpot sa usa ka ganti. Ang Diyos magapanalangin niadtong tinuoray nga nagtinguha sa iyang pag-uyon.

Ang mga Ganti Maoy mga Buhat sa Gugma

Buot ni Jehova nga kita masayod nga siya mao ang matang sa Diyos nga magaganti niadtong nahigugma kaniya. Pananglitan, ang mahunahunaong mga ginikanan mangitag mga paagi nga makaganti sa ilang anak nga kinabubut-ong mobuhat sa mga buluhaton diha sa balay tungod kay gipalihok sa gugma alang sa mga ginikanan. Ang mga ginikanan mahimong magtagana ug labaw pa kay sa mga kinahanglanon sa kinabuhi, nga magaganti sa bata ug usa ka linaing gasa. Usahay ang gasa mahimo ganing salapi nga ihulog sa bangko sa pagtagana ug kasegurohan sa umaabot sa bata. Busa, ang Diyos dili sama sa mga tawo nga walay apresasyon o konsiderasyon niadtong mobuhat sa mga butang tungod sa gugma o pagkamaunongon. Si Jehova mabination ug makigsuod sa iyang mga higala. Kon ikaw hugot nga magatuo kaniya, “dili gayod ikaw pagabiyaan [niya] ni sa bisan unsa mang paagi magatalikod kanimo.”​—Hebreohanon 13:5.

Ang Diyos nagaapresyar ug nagauyon niadtong tanan nga mohimo bisan sa kinagamyang pag-alagad kaniya, nga nagahatag kanilag dugang mga kahigayonan nga makaila kaniya. Ang mga pulong ni Jesus sa Mateo 10:40-42 nag-ilustrar sa punto: “Siya nga nagadawat kaninyo nagadawat usab kanako, ug siya nga nagadawat kanako nagadawat usab kaniya nga nagpadala kanako. Siya nga nagadawat ug propeta tungod kay usa siya ka propeta makadawat ug ganti sa propeta, ug siya nga nagadawat ug tawong matarong tungod kay usa siya ka tawong matarong makadawat ug ganti sa tawong matarong. Ug si bisan kinsa nga magahatag sa usa niining mga gagmay ug usa lang ka kopa sa bugnawng tubig aron imnon tungod kay siya usa ka tinun-an, sultihan ko kamo sa pagkamatuod, dili gayod siya mawad-an sa iyang ganti.”

Si Jesus gipadala sa iyang Amahan, si Jehova. Busa, ang usa ka tawo nga moabiabi pag-ayo sa mga tinun-an ni Kristo​—sila man mga propeta, matarong nga mga tawo, o mga gagmay—​nagadawat kang Kristo maingon man sa Diyos, kinsa nagpadala kang Kristo. Sa pagkatinuod kanang tawhana panalanginan; dili mahitabo nga siya dili gantihan. Ang tinigom niyang espirituwal nga mga bahandi mahimo pang modaghan. Ngano? Tungod kay si Jehova mahinumdom bisan sa kinagamyang buhat sa pag-alagad nga gihimo sa pagpaluyo sa iyang Gingharian, ug kanang buhata dili mahitabong dili pagagantihan.​—Hebreohanon 6:10.

Makaiikag, si Pedro, nga usa ka tinun-an ni Jesus, direktang nangutana kang Jesus kon aduna bay ganti alang kaniya ug sa kauban niyang mga apostol: “Tan-awa! Amo nang gibiyaan ang tanang butang ug misunod kanimo; unsa man sa tinuod ang anaa unya alang kanamo?” (Mateo 19:27) Si Jesus wala mag-isip sa pangutana nga dili tukma kondili naghatag hinuon siya ug positibong tubag, nga nag-ingon: “Ang matag usa nga nagbiyag mga balay o mga igsoong lalaki o mga igsoong babaye o amahan o inahan o mga anak o mga yuta tungod ug alang sa akong ngalan magadawat ug pilo-pilo pa ug magapanunod ug kinabuhing walay-kataposan.”​—Mateo 19:29.

Mga Ganti Karon ug sa Umaabot

Ang tubag nga gihatag ni Jesus nagpakita nga ang iyang mga sumusunod gantihan karon ug sa umaabot. Ang usa ka ganti karon mao ang ilang pagkahimong bahin sa usa ka nagakadakong internasyonal nga pamilya sa espirituwal nga mga igsoong lalaki ug babaye. Samtang ang mga iglesya sa Kakristiyanohan nagareklamo bahin sa nagakamenos nga membro ug kakulang sa pagpaluyo, ang mga tigomanan sa mga Saksi ni Jehova nagasugwak. Ginatos ka linibo ka bag-ong mga Saksi ang nabawtismohan matag tuig.

Ang lain pang ganti mao ang kalinaw sa hunahuna uban ang katagbawan ug kalipay nga ipahinabo sa pakighigalaay sa Diyos ug kahibalo kaniya. Oo, ang “diyosnong pagkamahinalaron inubanan sa pagkaadunay-igo-sa kaugalingon” maoy dakong ganansiya. (1 Timoteo 6:6) Kini magabanaag gayod ug usa ka malipayong kahimtang sa hunahuna sa dihang ang usa makapahayag, sama sa gisulti ni apostol Pablo: “Akong nakat-onan, sa unsa man nga kahimtang ako, nga magpaigo-sa-kaugalingon,” buot ipasabot, tagbaw.​—Filipos 4:11.

Una pa siya mamatay, si Pablo misulat bahin sa umaabot nga ganti alang sa “gamayng panon” sa dinihogang mga sumusunod ni Jesus​—ang ganti sa usa ka pagkabanhaw sa langitnong kinabuhi: “Sukad niining panahona adunay gigahin alang kanako nga purongpurong sa pagkamatarong, nga ihatag kanako sa Ginoo, ang matarong nga maghuhukom, isip ganti nianang adlawa, ngani dili lamang kanako, apan usab sa tanan kanila nga nahigugma sa iyang pagpadayag.”​—Lucas 12:32; 2 Timoteo 4:7, 8.

Ang minilyon sa mga sumusunod ni Jesus nga maoy iyang “ubang karnero” nagahulat sa umaabot nga ganti nga walay-kataposang kinabuhi diha sa usa ka yuta nga nahimong usa ka paraiso. (Juan 10:16) Ug si Jesus nagpasalig nga ang iyang mga sumusunod nga mamatay “pagabayran unya sa pagpamanhaw sa mga matarong.”​—Lucas 14:14.

Handurawa ang Ganti

Tukma ang paghanduraw sa maong mga panalangin, bisan tuod walay tukmang nasayod kon sama sa unsa kini sila. Dili ka ba mobati sa kalipay nga gibatbat sa Isaias 25:8: “Sa pagkamatuod pagalamyon niya ang kamatayon hangtod sa walay kataposan, ug ang Soberanong Ginoong Jehova tinong magapahid sa mga luha gikan sa tanang nawong”? Sulayi sa paghanduraw ang mga pulong sa Isaias 32:17: “Ang buhat sa tinuod nga pagkamatarong mahimong pakigdait; ug ang pag-alagad sa tinuod nga pagkamatarong, kalinaw ug kasegurohan sa walay kataposan.” Oo, ang tanang tawo duyog nga magbuhat diha sa tinuod nga panaghigalaay. (Isaias 65:21-25) Bisan karong adlawa, ang makugihong trabaho magbunga ug maanindot nga mga balay ug mga produkto nga maayo ug kalidad. Unya, sa bag-ong kalibotan sa Diyos, ang himsog nga mga tawo ilalom sa hingpit nga mga kahimtang makapatungha kon unsay gikinahanglan sa paghimo sa kinabuhi nga makalilipay.​—Salmo 37:4.

Ang mga ganti nga ihatag sa Diyos maoy dili gumikan sa bisan unsang takos-pasidunggan nga pag-alagad sa atong bahin kondili nagsumikad sa iyang gugma ingong usa ka gasa bisan pa sa atong napanunod nga makasasalang kahimtang. (Roma 5:8-10) Bisan pa niana, adunay kalangkitan tali sa gipaabot nga ganti ug sa atong kagawian. Kinahanglang malugoton natong pangitaon si Jehova uban ang maisogong pagtuo ug paglahutay. (Hebreohanon 10:35-39) Sa laing pagkasulti, “bisan unsa man ang inyong ginabuhat, buhata kini nga tibuok-kalag ingon nga alang kang Jehova, ug dili alang sa mga tawo, kay kamo nahibalo nga gikan kang Jehova inyong dawaton ang nahiangayng ganti sa panulundon.” Oo, siya nagahatag gayod ug mga ganti.​—Colosas 3:23, 24.