Paglakaw sa Balas—Mga Tikang Ngadto sa Labaw nga Kahimsog

SINULAT SA KORESPONSAL SA PAGMATA! SA HAWAII

ANG abtik nga paglakaw gitawag nga usa sa kinamaayohang mga matang sa ehersisyo. Gikaingon nga, apil sa ubang mga benepisyo, ang abtik nga paglakaw magpauswag sa cardiac output o ang gidaghanon sa dugong ipagawas sa walang bahin sa kasingkasing sa usa ka minuto, magpaus-os sa presyon sa dugo, magpauswag sa sirkulasyon ug kahunit sa tisyu sa panit, ug magpalig-on sa kabukogan ug kaunoran sa kusog.

Ugaling, sumala sa nasayran ni bisan kinsang nakasulay na niini, ang abtik nga paglakaw makadaot usab sa mga tiil​—mga kubal, mga kalyo, mga pagluto, ug sa grabe pang mga kadaot sa tiil. Kasagarang resulta kini sa pagsul-ob ug guot nga igdudulang sapatos. Kon naluthan ka sukad ug mga tiil, nasayod ka kon unsa kana ka alingasa, nga gani sakit pa. Sa tinuoray, ang kahimtang sa imong mga tiil makaapektar sa kahimsog sa imong tibuok nga kasko.

Kinamaayohan sa Duruha ka Kalibotan

Dili kinahanglan nga ikaw mag-antos. “Ang mga pagtuon sa dili-tigsapatos nga mga katawhan sa Aprika ug Asia mihinapos nga ang mga tawong dili magsapatos adunay mas himsog nga mga tiil, mas diyutayng mga depekto, ug mas sayon nga makalihoklihok kay sa mga tawo sa tigsapatos nga mga katilingban,” mitaho ang usa ka doktor sa kabukogan. Busa mopatim-aw nga makabaton ka sa mga benepisyo sa pagsapatos ug sa samang panahon makabaton sa mga benepisyo sa mga nagpuyo sa dili-tigsapatos nga mga katilingban kon abtik kang makaehersisyo samtang magtiniil sa paglakaw. Sa pagkatinuod, ang maong kapilian bukas sa tanang tawo​—paglakaw sa ugang balas sa mahinlong baybayon o sa mga bungtod sa balas.

“Ang pagtiniil sa paglakaw sa balasong baybayon maoy usa ka maayong ehersisyo nga may nagamasaheng epekto,” matud sa The Arthritis Exercise Book, “ilabina kon ang balas mainit. Ang paglakaw sa halhag, ugang balas magaehersisyo sa matag unod sa tiil, kay ang tiil mopahiuyon sa dili-patag nga dapit.” Gawas pa, ang paglakaw sa balas mogastog halos dobleng enerhiya kay sa paglakaw sa kasagbotan o sementadong dalan. Ngani, sulayi ang pagdalagan sa ugang balas, ug sa taudtaod makamatikod ka sa kahago nga gikinahanglan niini! “Sa pagkamatuod, ang abtik nga paglakaw ubay sa baybayon motaganag labing maayong bug-at nga ehersisyo sa mga programang gidesinyo sa ‘pag-ut-ot’ sa mga kaloriya o pagpauswag sa kahimsog sa lawas,” mihinapos ang librong Exercise Physiology​—Energy, Nutrition, and Human Performance.

Busa, ang pagtiniil sa paglakaw sa balas dili lamang motagana sa mga benepisyo sa usa ka makapahimsog nga rutina sa ehersisyo kondili makapakunhod usab sa kadaot sa mga lutahan sa tiil ug batiis. Alang niadtong adunay dili grabeng artraytis, makapakunhod kini sa kaul-ol nga ipahinabo sa ehersisyo.

Pahimatngon

Hinunoa, sa dili ka pa moadto dayon sa kinadul-ang baybayon o bungtod sa balas, hinumdomi kining maong mga pahimatngon. Tinoa nga ang balas nga imong laktan nga magtiniil maoy limpiyo ug walay hait nga mga butang. Kon duna kay seryosong mga suliran sa panglawas, sama sa diyabetes o sakit sa kasingkasing, angayng mokonsulta ka sa imong doktor sa dili pa himoon ang bisan unsang bag-ong matang sa ehersisyo. Ug sama sa bisan unsang programa sa ehersiyo, sugdi ang imong paglakaw sa balas sa hinay o kasarangang katulinon, ug anam-anam nga pauswagi ang imong katulinon latas sa mga semana nga yugto. Lagmit mosangpot kini sa mas luwas ug mas makalingawng rutina sa ehersisyo alang kanimo.

Ang pagtiniil sa paglakaw sa balas dili lamang makalingaw; kini basin mahimong sinugdanan sa mga tikang ngadto sa labaw nga kahimsog alang kanimo ug sa imong mga tiil. Ug kinsay nasayod kon unsa pa ang tingali imong hidiskobrehan sa baybayon o sa mabawng katubigan​—mga kinhason, gagmayng mga isda, gagmayng mga kasag, tanang matang sa kalanggaman ug mga insekto. Busa magmaigmat, ug kahimut-i ang imong paglakaw!