Anaa sa Unahan—Ang Kinamaayohang Panahon!
SUMALA sa Bibliya, maoy katuyoan sa Diyos nga ang tawhanong rasa mabuhing walay kataposan diha sa tibuok-yutang paraiso. (Genesis 1:28; 2:8, 9) Dayag, kita halayo na gikan sa orihinal nga katuyoan sa Diyos. Unsay nahitabo?
Ang unang tawhanong magtiayon misupak sa Diyos, nga miresultag pagkadili-hingpit ug kamatayon alang sa ilang kaugalingon ug sa tanan nilang kaliwat. (Genesis 2:16, 17; 3:6, 7, 17-19; Roma 6:23) Ang Bibliya nagbatbat: “Ang sala misulod sa kalibotan pinaagi sa usa ka tawo, ug ang iyang sala nagdalag kamatayon. Tungod niini, ang kamatayon mikaylap ngadto sa tibuok tawhanong rasa tungod kay ang tanan nakasala.”—Roma 5:12, Today’s English Version.
Bisan pa niining situwasyona, ang katuyoan sa Diyos nagpabiling wala-mausab. “Ang akong pulong sama sa niyebe ug sa ulan nga mangahulog gikan sa langit sa pagpatubig sa yuta. Kini magpatubo sa mga tanom ug magahatag binhi nga ikapugas ug pagkaon nga pagakan-on. Ingon man usab niana ang pulong nga akong ginapamulong . . . Tumanon niini ang tanang butang nga akong gisugo niini nga pagabuhaton.” (Isaias 55:10, 11, Today’s English Version.) Unsay gisaad sa Diyos nga pagabuhaton alang kanato?
MGA PANALANGIN UBOS SA GINGHARIAN SA DIYOS
Kasegurohan
“Sa dili na madugay, ug ang mga daotan mangawala; ug pagasusihon mo sa dakong kakugi ang iyang dapit, ug siya mawala diha.”—Salmo 37:10.
Kinabuhing Walay Kataposan
“Ang mga matarong magapanunod sa yuta, ug sila magapuyo sa ibabaw niini sa walay kataposan.”—Salmo 37:29.
“Wala na unyay kamatayon, ni pagbangutan ni pagtiyabaw ni may kasakit pa.”—Pinadayag 21:4.
Makapatagbaw nga Buluhaton
“Ang mga tawo magatukod ug mga balay ug magapuyo diha niana—kini dili pagapuy-an sa laing mga tawo. Sila magatanom ug kaparasan ug magapahimulos sa bino—kini dili pagaimnon sa uban. Sama sa mga kahoy, ang akong katawhan hataas ug mga kinabuhi. Ilang kapahimuslag maayo ang mga butang nga ilang gihagoan.”—Isaias 65:21, 22, TEV.
Panglawas
“Walay molupyo ang mag-ingon: ‘Ako may sakit.’ Ang mga tawo nga magpuyo sa yuta mao unya kadtong pagapasayloon sa ilang mga kalapasan.”—Isaias 33:24.
Walay mga Depekto sa Lawas
“Ang mga mata sa mga buta mangabuka, ug ang mga igdulungog sa mga bungol makadungog. Nianang panahona ang piang molukso sama sa lagsaw, ug ang dila sa amang magaawit sa kalipay.”—Isaias 35:5, 6.
Dagayang Pagkaon
“Aduna unyay daghang trigo sa yuta; sa tumoy sa kabukiran adunay pag-awas.”—Salmo 72:16.
Pakigdait
“Umari kamo, tan-awa ang mga buhat ni Jehova, kon giunsa niya pagpahinabo ang katingalahang mga hitabo sa yuta. Siya nagapahunong sa mga gubat ngadto sa kinatumyan sa yuta.”—Salmo 46:8, 9.
KON UNSAY IMONG KINAHANGLANG BUHATON
Unsay imong kinahanglang buhaton aron makatagamtam niining mga panalangina nga gisaad sa Diyos? Ang Bibliya nagtubag diha sa Juan 17:3: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” Oo, pinaagi sa pagkat-on bahin sa Diyos—sa iyang ngalan, sa iyang katuyoan, ug sa iyang kasugoan—kita makabaton ug pagsabot sa direksiyon. Dugang pa, pinaagi sa pagkat-on bahin kang Jesus—sa iyang kinabuhi sa yuta, sa iyang halad lukat sa atong mga sala, sa iyang posisyon ingong Magmamando sa Gingharian sa Diyos—kita makasalig nga ang katuyoan sa Diyos matuman.
Ang pagtugot sa Diyos sa pagkadaotan nagsilbi aron sa pagpasundayag sa tino nga ang tawo, sama sa usa ka biyahedor sa usa ka dili-pamilyar nga lugar, dili makatultol sa iyang kaugalingong mga lakang. (Jeremias 10:23) Sa pagkatinuod, pinaagi sa daghang kagamhanan—gikan sa mga diktadora ngadto sa mga demokrasiya—ang tawo nakasulay na sa tanang dalan nga mahanduraw. Bisan pa, ang iyang kalamposan limitado lamang bisan pa sa kinamaayohang kahimtang.
Pagkamapasalamaton nato nga tubagon sa Gingharian sa Diyos ang pag-ampong gibungat sa minilyon: “Ipahinabo ang imong kabubut-on, maingon sa langit, nganhi usab sa yuta.” (Mateo 6:10) Ang mga panalangin sa Gingharian sa Diyos pagatagamtamon sa yuta sa dihang kini sa dili madugay mopuli sa tanang mga kagamhanan sa tawo. Ang Bibliya nagsaad: “Sa mga adlaw niadtong mga haria ang Diyos sa langit magatukod ug usa ka gingharian nga dili gayod malumpag. Ug ang gingharian mismo dili igapasa ngadto sa laing katawhan. Kini magadugmok ug magaut-ot niining tanang gingharian, ug kini mismo molungtad sa walay kataposan.” —Daniel 2:44.
Pagkamalipayong panahon unya kana! Ang kahibalo sa Bibliya sa pagkatinuod maghatag kanatog paglaom. Oo, kini maoy magubot nga mga panahon—ug nagkasamot pa. Apan kana nagpakita lamang nga kita nagkinabuhi na sa kataposang mga adlaw niining daotang sistema sa mga butang. Sa dili madugay kining labing daotan nga mga panahon pagapulihan sa labing maayong panahon ubos sa Gingharian sa Diyos!