Kon Diin ang Kuwarta Magpabilin sa mga Kahoy

PANANGLIT ang kuwarta nagtubo diha sa mga kahoy ug nga ikaw ang tag-iya sa maong kahoy. Karon handurawa nga ang imong kahoy gitanom diha sa kilid sa usa ka dalan nga agianan sa kadaghanan sa imong mga silingan kada adlaw. Unsa ka dugay sa imong hunahuna nga magpabilin ang kuwarta diha sa imong kahoy?

Kon pulos mga Saksi ni Jehova ang imong mga silingan, walay manghilabot sa imong kahoyng kuwarta. Nganong makaingon man kami niana? Tungod kay ang mga Saksi ni Jehova nagatuman sa kasugoan sa Bibliya sa paggawi sa ilang kaugalingon nga matinud-anon sa tanang butang. (Hebreohanon 13:18) Usa ka dili pa dugayng hitabo nag-ilustrar niini.

Sa Nigeria, sa Kasadpang Aprika, usa ka lima-ka-naira nga papel nga kuwarta ang nakit-an diha sa dalan nga 91 ka metros gikan sa labing duol nga tinukod sa sangang buhatan sa Watch Tower Society. Gisab-it kini sa nakakita diha sa palwa sa usa ka duol nga punoan sa lubi, nga naghunahuna nga ang tawong nawad-an sa kuwarta tingalig mobalik ug pangitaon kini.

Bisag ang kuwarta klarong makita sa daghang mga Saksi ni Jehova nga moagi matag adlaw, walay usa ang miangkon niana. Human sa daghang adlaw kini gitangtang ug gibutang sa kahon sa kontribusyon alang sa Sosyedad.