Mga Batan-on Nangutana . . .
Mahimo ba Gayod Akong Higala sa Diyos?
MAHIMONG higala sa Diyos? Imposible, maoy pagtuo sa 20-anyos nga si Doris. “Ubos kaayo ang akong pagbati sa kaugalingon ug dili gayod ako takos nga magustohan ni bisan kinsa,” mahay pa niini nga dalaga. “Ako naglikay gani sa pag-ampo kang Jehova nga Diyos tungod kay ako naghunahuna nga ako dili takos diha sa iyang presensiya.” Sa kinailadman, ang pipila ka mga batan-on mobating bug-os nga dili-takos sa panaghigalaay sa Diyos. Samtang ikahinangop tingali nila ang ideya nga mahimong higala sa Diyos, bation nila nga kana dili nila makab-ot. Ingon ba usab niana ang imong gibati?
Usahay, ang iyang kaugalingong mga kahuyangan maghimo sa usa ka batan-on nga mobating dili-takos bisan sa pagduol sa Diyos. Tagda pananglitan ang batan-ong si Michael. Siya nag-ingon nga una pa makadangat sa pagpabili sa diyosnong mga paagi, siya “gihugpaan sa halos tanang makasasala ug makadaot nga hunahuna ug buhat.” Ugaling, ang nakat-onan niya sa iyang pagtuon sa Bibliya ang nagpaamgo kaniya sa kasub-anan ug kahigawad nga iyang gipahinabo sa Diyos. Siya mibatbat: “Ang matag tigom sa kongregasyon nagpadayag kanako sa labing menos dugang usa pa sa akong mga kahuyangan. . . . Dili ko makalaom nga pasayloon ako ni Jehova sa akong daw walay-kataposang mga sala diin ako dili gani makapasaylo sa akong kaugalingon.”
Sa ubang mga kahimtang, ang paagi sa pagtratar sa usa ka batan-on sa uban magpabati kaniyang dili-takos sa panaghigalaay ni Jehova. Pananglitan, si Doris, nga gikutlo sa sinugdan, giabandonar sa iyang inahan sa gamay pa kaayo siya nga bata. Siya mibutyag: “Wala ako magtuo nga may nahigugma kanako. Kon giabandonar ako sa akong kaugalingong inahan ug pamilya, unsay purohan nga aduna pay mahingawa kanako?” Kon ang usa ka batan-on gitratar nga ubos ug dinagmalan sukad pa sa pagkabata, siya tingali sinserong nagtuo nga ang Diyos dili buot kaniya ingong usa ka higala.
Sa laing bahin, ang usa ka batan-on tingalig may panaghigalaay uban sa Diyos apan, tungod sa kahuyangan, nahulog sa grabeng sala. Kini nahitabo kang Tracy. “Naulaw kaayo ako,” mulo niining 21-anyos, “ang akong gibating kasakit ug pagkasad-an dili maantos. Nakapasakit ako uyamot sa akong Amahan, si Jehova.”
Tingalig nakakaplag ka sa imong kaugalingon sa usa ka situwasyon nga susama sa nahisgotan na. Apan adunay paglaom: Mahimo nimo nga higala ang Diyos!
Kon Nganong Mahimo Nimong Higala ang Diyos
Tinuod nga ang makasasalang mga buhat makasanta sa usa gikan sa pagkahimong higala sa Diyos. Maayo na lang, ang atong mahigugmaong Amahan mihimog lakang sa pagtabang kanato. “Nagarekomendar ang Diyos sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato,” misulat si apostol Pablo. (Roma 5:8) Pinaagi sa iyang kamatayon, si Jesus nagbayad sa lukat sa pagtubos sa mga mapabilhon gikan sa bug-os nga pagkaulipon sa sala. (Mateo 20:28) Busa, midugang ang apostol: “Kita mga kaaway sa Diyos, apan siya naghimo kanatong higala pinaagi sa kamatayon sa iyang Anak.”—Roma 5:10, Today’s English Version.
Sa dili pa makadangat sa pagpabili sa mga sukdanan ni Jehova, ang ubang mga batan-on, sama kang Michael nga gihisgotan sa sinugdan, hayan nakahimog daotan kaayo nga buhat. Bisan pa, pinaagi sa halad lukat ni Jesus, ang usa mahimong mapasaylo sa nangaging mga sala, bisan kon unsa pa ka seryoso kining mga salaa. Ang Bibliya naghatag niining makapadasig sa kasingkasing nga pasalig: “Kon atong isugid ang atong mga sala, siya kasaligan ug matarong aron sa pagpasaylo kanato sa atong mga sala ug sa paghinlo kanato gikan sa tanang pagkadili-matarong.” (1 Juan 1:9) Ugaling, ang usa ka tawo kinahanglang magahimog mga lakang aron ipakita sa Diyos nga siya nagapabili sa maong paghinlo. Si apostol Pablo naghisgot sa usa ka prinsipyo nga mahimong ikapadapat: ‘“Hunong na sa paghikap sa dili-hinlong butang,” nag-ingon si Jehova, “ug pasudlon ko kamo. Ug ako mahimong usa ka amahan kaninyo.”’ (2 Corinto 6:17, 18) Pagkamakapatandog gayod nga masayod nga kon ang usa ka tawo motalikod gikan sa maong daotang buhat ug tinuod nga mahinulsolon, ang Diyos andam sa pagdawat kaniya ngadto sa Iyang pag-uyon ingong usa ka higala.
Komosta ang mga batan-on nga gimatuto diha sa madagmalong palibot? Hibaloi nga dili isipon sa Diyos ang mga tawo nga sad-an tungod kay gibuhatan sila ug daotan nga supak sa ilang kabubut-on. Kini sila maoy mga biktima inay kay mga sumasalmot sa sala. Hinumdomi, usab, nga ang imong bili ingong usa ka tawo wala magadepende sa paghukom sa ubang tawo. Si Jehova mahimo nimong Higala bisan pa sa imong mga sirkumstansiya. Si Maureen gimatuto sa usa ka Kristohanong inahan diha sa usa ka panimalay nga puno sa kapintasan tungod sa iyang alkoholikong amahan. Bisan pa siya miingon: “Sa tunga niining malisod nga situwasyon, sa gihapon ako nakahimo sa pag-ugmad ug usa ka relasyon uban kang Jehova. Ako nakadangat sa pagkahibalo kaniya ingong Usa nga dili gayod mosalikway kanako.”
Komosta Kon Mahulog Ka sa Seryosong Sala?
Si Doug, nga gipadako sa diyosnong mga ginikanan, nalangkit sa seksuwal nga imoralidad sa edad nga 18. Tungod kini sa iyang daotang panagkauban. “Nahibalo ako nga kadto sayop, apan padayon ko kining gihimo tungod kay buot kong maglipaylipay,” miangkon si Doug. Pipila ka panahon sa ulahi, nakita ni Doug ang kakawangan sa iyang dalan. Siya miadmiter: “Ako misugod sa pagkakita nga gigamit lang ako sa tanan kong mga higala-kunohay aron hukhukan o aron maglipaylipay.” Siya dayon misugod sa paghimog mga lakang aron mapasig-uli ang panaghigalaay kang Jehova. Apan usa ka dakong ali ang nakababag sa iyang pag-uswag.
“Ang dakong butang nga nagpalisod pag-ayo aron makabalik mao nga gibati ko nga sobrang pagkadili-takos,” miingon si Doug. “Gibati ko nga ang tanan kong nahimo maoy daotan sa mga mata ni Jehova. Sanglit nahibalo kon unsa siya ka maayo ug unsa ka dako ang iyang pag-antos kanako, daw wala na gayoy paagi nga pasayloon niya ako tungod kay ako daotan kaayo.” Bisan pa niana, nabuntog ra ni Doug kining babaga uban sa tabang sa usa ka ansiano sa kongregasyon ug pinaagi sa mainampingong pagtagad sa asoy sa Bibliya bahin kang Manases.
Kinsa si Manases? Usa ka hari sa karaang Juda. Ang Bibliya nagpakita nga siya gitudloan sa iyang diyosnong amahan, si Hezekias, sa paghigugma kang Jehova. Apan human mamatay ang iyang amahan ug siya nahimong hari sa edad nga 12, siya naghunahuna nga mabuhat na niya ang iyang gusto. Siya mitalikod sa pagsimba kang Jehova aron sa pagsimba kang Baal. Ang maong pagsimba gitiman-an sa sobra ka imoral ug mapatuyangong kahilayan sa sekso. Si Manases “nagbuhat ug daotan kaayo sa mga mata ni Jehova, aron pasuk-on siya.” Pinaagi sa matinumanong mga tigpamaba, “si Jehova padayong nakigsulti kang Manases ug sa iyang katawhan, apan sila wala mamati.” Unya, ingong usa ka pasundayag sa paghukom ni Jehova, si Manases gidala ngadto sa Babilonya ingong ginapos nga binilanggo.—2 Cronicas 31:20, 21; 33:1-6, 10, 11.
Sa dihang namalandong si Manases sa iyang nangaging mga buhat ug gitandi kini uban sa iyang nahinumdoman nga mga balaod ni Jehova, nahupngan siya sa pagkasad-an ug nangayog pasaylo. Gipaubos niya ang iyang kaugalingon atubangan sa Diyos ug “nagpadayon sa pag-ampo kaniya.” Ug ang Diyos “nalukmay kaniya ug gipatalinghogan Niya ang iyang mga hangyo sa pag-uyon ug gipasig-uli siya sa Jerusalem ngadto sa iyang pagkahari.” Oo, “ang Amahan sa mahigugmaong mga kaluoy” andam sa pagtugot niining mahinulsolong makasasala nga magpasuod pag-usab Kaniya. Human makadawat sa maong kaluoy, si Manases, pinaagi sa kaugalingong kasinatian, karon “nakahibalo nga si Jehova mao ang matuod nga Diyos.”—2 Cronicas 33:12, 13; 2 Corinto 1:3.
Kon gidawat ug balik ni Jehova si Manases, sa pagkatinuod siya magtugot usab sa nahisalaag nga batan-on karon nga makabaton pag-usab ug relasyon uban Kaniya kon ang batan-on nagpakitag usa ka mahinulsolong tinamdan. Si Doug misanong sa tabang sa espirituwal nga mga magbalantay sa iyang kongregasyon. Siya gitabangan aron tin-awng makakita nga ang Diyos “dili mangitag sayop sa tanang panahon, ni magtipig siya ug kasuko hangtod sa walay kataposan.”—Salmo 103:9.
Pagpabiling Higala sa Diyos
Sa dihang ang Diyos mahimo nimong Higala, kinahanglang imong pabilhan kining relasyona aron makapabilin diha niana. Usa ka 18-anyos bawtismadong dalaga napaangkan. Bisan pa niana, siya gitabangan nga itul-id ang mga butang uban kang Jehova. (Tan-awa ang Isaias 1:18.) Ang hinungdan sa iyang pagkapasig-uli? “Akong nakat-onan nga si Jehova maoy usa ka mahigugmaong Amahan ug dili usa ka tigpatay,” siya miingon. “Akong naamgohan nga siya gisakitan sa akong nahimo. Hinungdanon kaayo ang pagtan-aw sa Diyos ingong usa ka Higala, usa nga may mga pagbati, ug dili lamang usa ka lisod masabtan nga Espiritu nga pagasimbahon apan wala gayod higugmaa.” Sama kang Manases, siya naaghat aron malangkit sa bug-os pa sa pagsimba kang Jehova. (2 Cronicas 33:14-16) Kini nagpamatuod nga usa ka panalipod kaniya. Siya nagtambag sa ubang mga batan-on: “Padayon sa pagpaningkamot sa pagdayeg kang Jehova bisan pag malisod ang situwasyon. Si Jehova mahigugmaong magatul-id sa imong mga dalan pag-usab.”
Hinungdanon usab nga imong pangitaon ang panaghigalaay uban niadtong kinsa mga higala sa Diyos. Apan, bug-os likayi kadtong kinsa walay pagtahod sa diyosnong mga prinsipyo. (Proverbio 13:20) Ang batan-ong si Linda nalangkit sa seksuwal nga imoralidad uban sa usa ka batan-on kansang panaghigalaay nahimong “mas hinungdanon kay sa bisan unsa.” Human nga naulian sa espirituwal, si Linda miadmiter: “Imong madaot ang imong tibuok kinabuhi pinaagi sa dili pagbaton nianang personal nga bugkos tali kang Jehova ug kanimo.”
Ikaw ba aduna niana nga bugkos? Kon wala, paningkamot nga makabaton niana. Si Linda nagsumaryo sa bili sa pagpakighigala sa Diyos pinaagi sa pag-ingon: “Ang labing hinungdanong butang sa tibuok kalibotan mao ang usa ka maayong personal nga relasyon uban kang Jehova. Walay lalaki o babaye o bisan unsa niining kalibotana nga mas hinungdanon kay niana. Kon wala ang panaghigalaay uban kang Jehova, nan walay hinungdan ang ubang mga butang.”
[Hulagway sa panid 15]
Ang ubang mga batan-on tingali nagtuo nga dili takos nga mahimong higala sa Diyos