Ang Hunahuna sa Bibliya

Imong Bahin Diha sa Imong mga Pag-ampo

SA USA ka bakilid nga nag-ambo sa siyudad, ang gihasi nga hari mihunong sa makadiyot sa pagpalandong sa iyang halangdong palasyo, sa mauswagong kaulohan, ug sa makapasubong kahimtang sa iyang panimalay. Usa ka dakong panon sa kasundalohan ang nagtigom sa habagatan ug nianang panahona nagmartsa na paingon sa siyudad. Ang tag-as-ug-ranggong mga opisyal sa gobyerno mibiya kaniya, ug kadaghanan sa mga tawo mipabor sa mga rebelde. Kay nasubo, ang hari miampo sa Diyos. Sanglit usa ka relihiyoso kaayong tawo, midako ang iyang pagsalig nga ang Diyos makadungog sa iyang hangyo ug pakgangon ang mga plano sa mga naglaraw-ug-kadaot. Unya, nga mitalikod sa iyang matahom nga siyudad, midulhog siya sa bukid ug mipadulong sa amihanan sa direksiyon sa kamingawan saylo sa suba. Unsa pay iyang mahimo? Ang kahimtang anaa na niadtong tungora sa mga kamot sa Diyos.

Sa samang paagi, ang mapaubsanong mga magtutuo karong adlawa modangop sa Diyos pinaagi sa pag-ampo sa mga panahon sa kalisod uban sa makapahupayng pasalig nga duyog sa pagtagana ug tin-aw nga mga giya sa kon sa unsang paagi moampo, ang Bibliya nagpadayag nga si Jehova nga Diyos mao ang “Tigpatalinghog sa pag-ampo.” (Salmo 65:2) Kita gipasaligan nga ang tanang matinud-anog-kasingkasing nga mangita sa Diyos pagadunggon.

Bisan pa niana, ang pagtuo ug pag-ampo igo na ba? Unsay atong bahin diha sa sangpotanan sa atong mga pag-ampo?

Sa Unsang Paagi Kita Makaamot?

Ang hari nga gihisgotan sa sinugdan mao si Haring David sa karaang Israel. Kay miatubang sa daotang laraw sa iyang nakigkonsabong anak lalaki nga si Absalom ug ang iyang salingkapawng tigtambag nga si Ahithophel, gipili niyang mokalagiw sa Jerusalem ug modangop sa kinutaang siyudad sa Mahanaim sa kamingawan sa sidlakang dapit sa Subang Jordan. Lagmit nabug-atan sa kahigawad, depresyon, ug kabalaka, siya mihangyo kang Jehova diha sa pag-ampo, nga nag-ingon: “Himoa, palihog, ang tambag ni Ahithophel nga kabuangan, Oh Jehova!” (2 Samuel 15:11-15, 30, 31) Bisan pa niana, si David mihimog labaw pa kay sa pag-ampo lamang. Siya miamot sa positibong paagi alang sa malamposong sangpotanan sa iyang pag-ampo. Sa unsang paagi?

Ang iyang amot nagsugod dugay na una pa sa mga pagsulay nga iyang giatubang. Sulod sa daghang katuigan, bisan sa wala pa siya mahimong hari, gipamatud-an ni David ang iyang kaugalingon nga maunongong magsisimba ni Jehova. (1 Samuel 16:12, 13; Buhat 13:22) Nahimo siyang suod sa Diyos. Busa, sa dihang nakaagom sa pagsulay si David nagtuo nga maminaw si Jehova sa iyang pag-ampo ug mosanong sa tukmang paagi.

Sama usab karong adlawa. Kasagaran ang pangunang paagi sa pag-amot ngadto sa sangpotanan sa atong mga pag-ampo mao ang pagsunod sa tambag sa Bibliya ingong regular nga bahin sa kinabuhi. Ang maong maunongong pagsunod sa hinatag-Diyos nga mga prinsipyo magpahinabog suod nga relasyon uban kaniya. Kining maong kasuod sa Diyos ug pagkamatinuohon angayng maanaa diha una pa magsugod ang mga pagsulay. Angayng mahisama kana sa usa ka lig-ong pundasyon nga pagatukoran sa usa ka balay; angayng anaa na kana diha una pa ang gibug-aton sa tinukod ipahimutang ibabaw niana. Busa kita​—bisan karon, una moabot ang mga pagsulay​—makaamot sa malamposong sangpotanan sa kadaghanan sa atong mga pag-ampo.

Pagbaton ug Aktibong Bahin!

Bisan pag tinuod nga ang relasyon ni David uban sa Diyos may mahinungdanong papel, giila usab niya nga siya dili mahimong walay-gibuhat nga tigpaniid sa katumanan sa iyang pag-ampo. Sa kaatbang, si David nagbaton ug aktibong bahin ingon sa gipakita sa maalamong dalan nga gisubay human sa iyang pag-ampo.

Taliwala sa maunongong mga higala ni David mao ang Arkitanhon nga ginganlag Hushai. Nahibalag ni Hushai ang mikalagiw nga hari sa Bukid sa mga Olibo. Bisan tuod buot nga mouban kang David sa pagkadestiyero, si Hushai miuyon sa awhag ni David nga siya magpabilin sa siyudad. Siya magpakaaron-ingnon nga maunongon kang Absalom, maningkamot nga pakyason ang tambag sa maluibong tigtambag nga si Ahithophel, ug pahibaloon si David sa mga panghitabo. (2 Samuel 15:​32-37) Ingon sa gidahom, si Hushai milampos sa pag-angkon sa pagsalig ni Absalom. Niadtong tungora si Jehova motabang.

Ang mamugnaon, apan daotan, nga si Ahithophel mitanyag ug inantigong plano. Giawhag niya si Absalom nga hatagan siya ug 12,000 ka lalaki aron sulongon si David nianang gabhiona mismo samtang si David mikalagiw, dili organisado ug walay-panalipod​—usa ka pagpatay nga magtino sa usa ka malamposong rebolusyon! Hinunoa, sa katingala sa daghan si Absalom nangayo sa tambag ni Hushai bahin sa maong butang. Iyang gitambagan si Absalom nga mogugol ug panahon sa pagtigom sa hilabihan ka daghang kasundalohan, nga pagamandoan mismo ni Absalom. Pinaagi sa pagtultol ni Jehova, gidawat ang tambag ni Hushai. Si Ahithophel, nga dayag nakaamgo nga ang pagsunod sa tambag ni Hushai nagkahulogan ug seguradong kaparotan, mipauli sa iyang balay ug naghikog.​—2 Samuel 17:​1-14, 23.

Walay duhaduha nga si Jehova nagtubag sa pag-ampo ni David​—sumala gayod sa iyang giampo. Ang panig-ingnan ni David sa paglihok uyon sa iyang pag-ampo nagtagana ug bililhong leksiyon alang sa tanan nga mangayog tabang sa Diyos pinaagi sa pag-ampo.

Si Jehova Mohimo sa Iyang Bahin

Tinuod, si Jesus nagtudlo sa iyang mga sumusunod nga mag-ampo alang sa ilang adlaw-adlaw nga pagkaon ug misaad nga kon ilang unahon ang mga intereses sa Diyos, Siya mag-atiman sa ilang mga panginahanglan. (Mateo 6:​11, 33) Pananglitan, kon ang usa ka tawo walay trabaho, kinahanglan siyang molihok kaharmoniya sa iyang pag-ampo alang sa panginabuhi pinaagi sa pagbuhat sa tanan nga iyang maarangan sa pagpangita o pagmugna ug trabaho.

Bisan unsa ang ulohan sa atong mga pag-ampo, ang atong katakos sa pag-amot alang sa sangpotanan nagkadaiya kaayo. May mga panahon nga dako ang atong mahimo ug mga panahon nga diyutay ra ang atong mahimo, kon aduna man. Ang hinungdanong punto dili mao ang atong maamot o dili maamot kondili kon gibuhat ba nato ang kinamaayohan nga atong mabuhat.

Makaseguro kita nga si Jehova nahibalo sa atong mga kahimtang ug mga katakos. Mailhan niya sa bug-os kon unsay posible natong mahimo, ug dili gayod siya magkinahanglan nga mohimo kita ug labaw kay sa atong malampos. Makahimo man kita ug daghan o diyutay kaayo, si Jehova ang mopuno sa bisan unsang nakulang. Iyang pabilhan ug paluyohan ang atong mga paningkamot ug mobuhat duyog niana sa pagkab-ot sa labing maayong sangpotanan alang sa tanang nalangkit.​—Salmo 3:​3-7.

Sa taliwala sa kalisdanan, si Haring David nakapahayag uban ang pagsalig: “Ang kaluwasan iya ni Jehova. Ang imong panalangin anaa sa ibabaw sa imong katawhan.” (Salmo 3:8) Hinaot nga ang atong pagsalig sa gahom ni Jehova duyog sa atong pag-amot sa atong bahin, dako o gamay, motultol sa malamposong sangpotanan sa atong mga pag-ampo.