Ang Hunahuna sa Bibliya

Ang mga Sukdanan ba sa Diyos Lisod Kaayo nga Kab-oton?

“ANG DIYOS DILI MAGSUKOD SA MGA TAWO PINAAGIG MGA PULGADA.”—KARAANG SANGLITANAN SA SCOTLAND.

ANG mga pasulit sa eskuylahan, mga interbiyo sa trabaho, ug medikal nga mga pagsusi maoy pila lamang sa mga lisoanong punto sa kinabuhi nga niana gisukod ang usa ka tawo. Apan kon bahin sa adlaw-adlawng pagkinabuhi sumala sa mga sukdanan sa Diyos, daghang tawo ang mobati nga sa usa ka paagi napakyas sila pagkab-ot niana. Kana ba usab ang imong pagtuo? Makab-ot ba nimo ang mga sukdanan sa Diyos?

Sa pagtubag, tan-awon nato pag-una ang mga sukdanan nga gibutang sa Diyos alang sa iyang mga magsisimba. Ang Bibliya nagtin-aw kon sa unsang paagi kita angayng magagawi sa kinabuhi. (Salmo 119:105) Ang magsusulat sa Bibliya nga ang maalamong Haring Solomon mihinapos nga ang “tibuok nga katungdanan” sa tawo mao nga “kahadloki ang matuod nga Diyos ug bantayi ang iyang mga sugo.” (Ecclesiastes 12:13) Ang propetang Miqueas mipahayag: “Unsa ang gipangayo ni Jehova gikan kanimo kondili mao ang pagtuman sa hustisya ug paghigugma sa kalulot ug mahimong makasaranganon sa paglakaw uban sa imong Diyos?”​—Miqueas 6:8.

Si Jesu-Kristo, ang kaugalingong Anak sa Diyos, nagpahayag nga walay mga sugo ang labaw kay sa “higugmaon si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog” ug “higugmaon ang imong silingan ingon sa imong kaugalingon.” (Marcos 12:​30, 31) Dugang pa, ipakita nato nga atong gihigugma ang Diyos pinaagi sa pagsugot sa tanan niyang sugo.​—1 Juan 5:3.

Sa pagpahayag sa yano, ang mga tawo angayng mahigugma ug magtahod sa Diyos, magsugot sa iyang mga sugo, molihok nga makiangayon, magmaluloton sa tanan, ug maglikay sa garbo. Ang maong mga sukdanan ba dili nato makab-ot?

Ang Diyos Mohatag ug Konsiderasyon

Ang Diyos tukmang magdahom nga kab-oton sa mga tawo ang iyang mga sukdanan. Apan, sa bug-os nga kamatinud-anon, may tawo ba nga makasunod sa hingpit niining mga sukdanana sa tanang panahon? Dayag nga wala, kay nakapanunod kitag di-kahingpitan gikan sa atong katigulangan nga si Adan. (Roma 5:12) Busa, lagmit nga kita makasala. Apan kini wala maghimo kanatong dili-takos nga mag-alagad sa Diyos sa dalawatong paagi.

Sa pag-ilustrar, tagda ang mga suliran sa pagkakat-on sa pagmanehog kotse. Gikinahanglan ang makanunayong pagbantay ug ang panahon sa pagmanehog maayo aron makapasar sa pasulit sa pagmaneho. Siyempre, kinahanglang manlimbasog gihapon kita nga magmanehog maayo bisan human makakuhag lisensiya. Samtang makabaton kitag kasinatian, atong mabaid ang atong mga kahanas. Apan wala ing hingpit nga mga tigmaneho!

Ikalipay, ang Diyos mohatag ug konsiderasyon sa atong mga kahuyangan. Siya dili ingon nga dili-makataronganon, nga mangayo sa butang nga dili nato matuman, ni siya magpadayon sa pagpangitag sayop. Nakasabot siya sa atong mga kaluyahon ug mga kahuyangan. Si Haring David, kinsa nakasalang grabe, misugid: “Siya wala magbuhat kanato bisan sumala sa atong mga sala; ni sumala sa atong mga sayop nga gipahamtang niya kanato kon unsay takos kanato.” Tungod sa unsang katarongan? “Kay maingon nga ang mga langit mas hataas kay sa yuta, ang mahigugmaong-kalulot [sa Diyos] maoy labaw ngadto niadtong nahadlok kaniya.” Bisan pag si Jehova nahibalo nga kita makasala, siya andam sa pagbutang sa atong mga kalapasan “sa halayo ingon sa pagkalayo sa pagsubang sa adlaw gikan sa pagsalop sa adlaw.”​—Salmo 103:​10-14.

Ayaw Pag-angka

“Kon ako masulob-on kaayo,” misaysay ang usa ka sinserong magsisimba sa Diyos, “usahay moingon ako nga dili gayod ako molampos sa pagsunod sa mga sukdanan sa Diyos diha sa kinabuhi. Apan kon maugmad nako ang mas positibong panglantaw, bation nako nga ako makahimo sa pagkinabuhi sumala sa gusto sa Diyos kanako. Apan kana dili gayod sayon!” Apan ayaw kaluya kon kini ang imong gibati. Ikaw dili mao ang una, ni ikaw mao ang kataposan, nga nakaagom sa maong mga pagbati.

Ang Kristohanong apostol Pablo prangkang miangkon: “Dihang buot kong buhaton ang maayo, ang daotan ania uban kanako. Ako nahimuot gayod sa balaod sa Diyos sumala sa akong pagkatawo sa sulod, apan akong nakita sa akong mga sangkap ang laing balaod nga nagapakigbugno batok sa balaod sa akong kaisipan ug nagadala kanakong bihag ngadto sa balaod sa sala . . . Alaot ako nga tawo!” Apan wala siya mohinapos nga ang gidahom sa Diyos lisod kaayo, kay siya midugang: “Kinsa ang magaluwas kanako gikan sa lawas nga nagaagom niining kamatayon? Salamat sa Diyos pinaagi kang Jesu-Kristo nga atong Ginoo! Busa, uban sa akong kaisipan ako mismo usa ka ulipon ngadto sa balaod sa Diyos, apan uban sa akong unod ngadto sa balaod sa sala.” (Roma 7:​21-25) Sa ingon gibati niya nga makapahimuot sa Diyos bisan pag usa ka makasasala.

Si Jehova, ang atong mahigugmaong Maglalalang, magpasaylo sa atong mga sayop ug mga sala pinaagi sa bili sa halad lukat sa iyang minahal nga Anak, si Jesus. “Kon aduna may makahimo ug sala,” misulat si apostol Juan, “aduna kitay magtatabang uban sa Amahan, si Jesu-Kristo, usa nga matarong. Ug usa siya ka pangpasig-uli [nagatabon] nga halad alang sa atong mga sala.” (1 Juan 2:​1, 2) Ang babag nga gibutang sa sala ug nga magpugong kanato sa pagkab-ot sa sukdanan sa Diyos alang sa panaghigala gikuha na o giguba sa gahom sa halad ni Kristo. Sa ingon ang pakig-uban sa Diyos napasig-uli.

Ang mapainubsanong pagdawat niining mahigugmaong kahikayan magpahinabog kapasayloan, kay ang Diyos nagpuyo “uban sa usang magul-anon ug maluya sa espiritu.” (Isaias 57:15) Kita makasalig Kaniya sa pagpabuhi sa atong mga espiritu. Siya misaad nga ‘bangonon ang usang ubos gikan sa abog mismo.’ Dili na kinahanglang magpabilin kita nga magul-anon kaayo kon mapakyas kita sa pagsugot sa hingpit sa Diyos. Hinunoa, kita mahimong masaligon nga dili gayod hikalimtan sa Diyos ang mga paningkamot nga atong gihimo sa pagsunod sa iyang mga sukdanan diha sa kinabuhi.​—Salmo 113:7; Hebreohanon 6:​10-12.

Bisan pag usa kini ka pakigbisog, imong mapanid-an nga ikaw mas malipayon nga magabuhat kon unsay makapahimuot sa Diyos. Ang pagkamahinalaron ngadto sa Diyos maghimo sa kinabuhi nga mas maantos alang kanimo ug alang niadtong alirong kanimo. Hunahunaa usab ang umaabot. Ang pagpaningkamot sa pagsunod sa mga sukdanan sa Diyos karon maghatag sa kalaoman nga kinabuhing walay kataposan ubos sa paraisonhong mga kahimtang.​—Isaias 48:17; Roma 6:23; 1 Timoteo 4:8.

Ang sinating mga tigkatkat ug bukid nakaamgo nga sa dihang tua na sa tuktok, sila anaa pa lamang sa tungatunga. Kinahanglan pa nga sila modulhog nga luwas. Sa susama, kadtong nahadlok sa Diyos kinahanglang makakab-ot sa mga sukdanan sa Diyos ug unya molahutay sa pagsunod niana sa kinabuhi.​—Lucas 21:19; Santiago 1:4.

Magbatog kalipay gikan sa kahibalo nga ang mga sukdanan sa Diyos dili lisod kaayo nga kab-oton. Kon usahay mapakyas ka sa pagsunod sa hingpit kanila, pangayo sa iyang kapasayloan. Salig sa iyang mahigugmaong pagpaluyo. (Salmo 86:5) Busa, uban kang Jehova ug sa iyang Anak ingong imong mga Magtatabang, makakab-ot ka sa mga sukdanan sa Diyos ug makaangkon sa iyang pag-uyon.​—Proverbio 12:2.