“Kanku” Erport—Makit-an Apan Dili Hidunggan

SINULAT SA KORESPONSAL SA PAGMATA! SA HAPON

SA NAGKAHIDUOL sa Kansai International Airport sakay sa ayroplano, makita nimo ang usa ka isla nga may tatak nga “Kansai” sa Iningles.a Kining isla sa Hapon nahimutang sa mga 5 ka kilometros gikan sa baybayon sa Osaka Bay. Walay laing makita gawas sa erport ug nalangkit nga mga pasilidad. Sa pagkatinuod, ang isla gituyo-paggama aron gamiton nga erport. Gibuksan niadtong Septiyembre 1994, ang erport gianggaan ug Kanku, pinamubong ngalan niini sa Hapones, nga Kansai Kokusai Kuko.

Usa ka halapad nga taytayan, 3.75 kilometros ang gitas-on, nagkonektar sa isla nga erport sa dakong-yuta, nga naghimo niini nga daling adtoon pinaagi sa karsada ug riles. Ang isla dunay mga pasilidad sa pantalan alang sa mga serbisyo sa barko ug ferry. Apan nganong motukod ug tibuok bag-ong isla alang sa erport?

Usa ka Erport nga Dili Hidunggan

Ang nagakadaghang turista ug mga bisita sa dapit sa Kansai maoy hinungdan sa pagdaghan sa ayroplano nga modahunog ibabaw sa residensiyal nga dapit sa palibot sa Osaka International Airport. Aron ang mga tawo nga nagpuyo didto dili na samokon sa kabanha, nagpahamtang ug curfew gikan sa 9:00 s.g. hangtod sa 7:00 s.b. Wala na itugot nga dugangan ang internasyonal nga mga biyahe sukad niadtong 1974. Sa ingon, gikinahanglan pag-ayo ang usa ka erport nga modumala sa dugang mga pasahero ug kargamento nga dili madungog sa dakong-yuta.

Usa ka erport nga mahimong gamiton sa tibuok adlaw ug gabii nga dili makapahinabog kabanha​—kana usa ka dakong hagit alang niadtong mga nalangkit sa proyekto. Ang bugtong sulbad nga nakita mao ang pagtukod ug isla nga halayo sa gipuy-an sa mga tawo ug himoon kana nga erport. Usa gayod ka higanteng proyekto!

Ang nasyonal ug lokal nga mga kagamhanan uban sa lokal nga mga negosyante maoy migasto sa $15-bilyong proyekto, nga nagmugnag pribadong kompaniya nga motukod ug mopalakaw sa bag-ong erport. Si Gn. Keisuke Kimura, ang ehekutibong bise presidente sa Kansai International Airport Company, nagtug-an sa Pagmata!: “Ingong pribadong kompaniya, dili kami makagugol ug daghang panahon sa paghimog isla. Ang buluhaton kinahanglang buhaton sa madali.”

“Paghimog Isla”

Ang pagtambak ug yuta ubay sa baybayon lisod, apan ang paghimog isla lima ka kilometros gikan sa baybayon mas labawng lisod. Aron makahimog 511-ektaryang isla nga erport, 180,000,000 metro kubiko sa balas ug yuta ang gitambak. “Kana maoy tumbas sa 73 ka piramide​—ang buot nakong ipasabot ang kinadak-ang gihimo ni Haring Khufu,” pahayag ni Gn. Kimura.

Sa tugkaran sa dagat, sa aberids nga giladmong 18 metros, nahimutang ang usa ka lut-od sa humok nga kolonon nga kinahanglang pahubsan ug tubig. “Usa ka milyong mga usok sa balas, nga 40 sentimetro [16 ka pulgada] ang diyametro, ang gitagsok sa maong lut-od aron paawason ang tubig ug lig-onon ang pundasyon. Tungod sa gibug-aton sa gitambak nga yuta, ang tubig napuga gikan sa 20-metros [66 piye] nga gibag-on sa humok nga lut-od sa yuta, nga mikupos kini ngadto sa 14 metros [46 piye],” saysay ni Gn. Kenichiro Minami, nga maoy tagdumala sa proyektong pagtambak. “Ang gikuyawan namo pag-ayo mao ang dili-parehong pag-unlod sa yuta. Migamit kami ug mga kompiyuter aron sa tukma makalkulo kon asa dapit ang tambakan aron pareho ang pag-unlod.”

Tanantanan, ang giladmon sa tambak mikabat ug 33 metros, nga maoy tumbas sa 10-andanang tinukod. Hinunoa, ubos sa gibug-aton sa tambak, ang tugkaran sa dagat miunlod ug padayong nagaunlod. Gibanabana nga ang tugkaran sa dagat mounlod pa ug dugang lima ka piye sulod sa 50 ka tuig, nga mohimo sa isla nga upat ka metros ibabaw sa tupong sa dagat.

Niadtong 1991, bisan sa wala pa mahimo ang tibuok isla, gisugdan na ang trabaho sa terminal sa pasahero ug sa control tower. Human sa kapin sa pito ka tuig nga paspas nga trabaho, ang konstruksiyon sa isla, erport, ug langkit nga mga pasilidad nakompleto.

Dako Apan Hipos

Ang mangabot nga mga pasahero masorpresa gayod. “Sa among pag-abot sa kuhaanan sa kargamento, didto na ang among mga maleta,” matod sa usa ka biyahero gikan sa Tinipong Bansa. Unsay hinungdan sa hapsay nga dagan? “Dako ang terminal sa pasahero apan hipos,” matod ni Gn. Kazuhito Arao, nga tagdumala sa terminal sa pasahero. “Ang mga pasahero dili na kinahanglang molikoliko ug daghan, nga maoy kasagaran sa internasyonal nga mga erport.”

Ang gambalay sa terminal sa pasahero yano apan talagsaon. Ang kinadak-ang tinukod gidesinyo aron ang mga pasahero dili na kinahanglan ug daghang lihok. Ang mga pasahero sa lokal nga biyahe mahimong modiretso gikan sa estasyon sa tren ngadto sa ilang check-in counter ug dayon ngadto sa boarding gate nga dili na mosaka-kanaog sa bisan unsang hagdanan.

Gikan sa kinadak-ang tinukod, diin nahimutang ang mga check-in counter, mga buhatan sa imigrasyon, ug mga adwana, duha ka 700 metros nga sumpay nga mga tinukod ang misiwil sa amihanan ug habagatan, nga mosangko ngadto sa 33 ka boarding gate. Ang mga pasahero nga mogamit sa mga ganghaan nga layo gikan sa kinadak-ang tinukod mahimong mosakay sa awtomatikong sistema sa transportasyon, nga gitawag ug Wing Shuttle. Modala kini sa mga pasahero ngadto sa ilang gustong ganghaan sulod sa lima ka minuto​—lakip na sa panahon nga gigugol sa paghulat sa sakyanan.

Erport Aron Makit-an

“Ingong erport nga sa bug-os anaa sa dagat, walay nagsalipod niini nga bisan unsang butang,” matod ni Gn. Arao. “Oo, madungog namo ang mga piloto nga moingon nga usa kini ka erport nga sayon tugpahan,” miuyon si Gn. Kimura.

Ang uban nakadayeg usab sa dagway niini. Ang makuting desinyo sa terminal sa pasahero nga daw mga pako sa ayroplano nakadani sa daghang turista ngadto sa Kanku. Sila usab malingaw sa pagtan-aw sa mga ayroplano nga manglupad ug molandig sa talagsaong islang erport. “Kinahanglan motukod kami ug lantawanan sa ibabaw sa buhatan sa mentinans alang sa mga turista nga moduaw sa erport, bisan pag sa sinugdan wala kamiy plano sa pagbuhat sa ingon,” matod ni Gn. Kimura. Ang aberids nga 30,000 ka tawo kada adlaw ang moduaw sa erport aron motan-aw lamang sa palibot.

Kon moduaw kamo sa Hapon sa dapit nga duol sa Kansai, nganong dili mosakayg ayroplano nga motugpa o molupad sa Kanku​—usa ka erport nga makit-an apan dili hidunggan sa mga silingan niini.

[Footnote]

[Picture Credit Line on panid 25]

Kansai International Airport Co., Ltd.