Ikaw ba Nagapabili sa Relihiyosong Kagawasan?

Sinulat sa koresponsal sa Pagmata! sa Estonia

ANG Pärnu maoy usa ka dunggoanang siyudad ug bakasyonang lugar sa gamayng nasod sa Baltic sa Estonia, nga kaniadto maoy usa ka republika sa Unyon Sobyet. Ang siyudad adunay populasyon nga kapin sa 50,000. Ang mga tawo karon didto nagatagamtam sa kagawasan sa pagsubay sa relihiyon nga ilang pinili​—usa ka kagawasan nga wala nila mabatoni sa pipila ka tuig nga nanglabay. Niadtong Hunyo 17, 1995, ang Pärnu Leht, usa ka lokal nga mantalaan, miingon nga ang Pärnu adunay 11 ka relihiyon ug ang mantalaan nagplano sa pagpatik ug seryal nga mga artikulo mahitungod kanila.

Ang unang artikulo nagbatbat: “Magsugod kita sa kongregasyon kansang kalihokan dayag nga nakaapekto kanatong tanan​—mga Saksi ni Jehova​—nga karon naghimo sa ilang mga tigom diha sa tigomanan sa himoanag serbesa. . . . Niadtong 1931 ang mga Estudyante sa Bibliya nagsugod sa pagtawag sa ilang kaugalingon nga mga Saksi ni Jehova, ug mao gihapon kanang ngalana ang ilang gihuptan hangtod karon. Adunay kapin sa lima ka milyong mga Saksi ni Jehova sa tibuok kalibotan. Ang punoang mga buhatan sa mga Saksi ni Jehova sa Estonia nahimutang sa Tallinn.”

Ang artikulo nagpadayon: “Ang kongregasyon sa mga magwawali ni Jehova natukod sa Pärnu sa usa ka tuig ug tunga nang milabay. Sa sinugdan dihay 25 ka membro; karon kini mitubo ngadto sa 120 . . .

“Ang unang impresyon may pagkapositibo. Ang mga tawo​—kasagaran mga batan-ong magtiayon​—maoy mahigalaon, limpiyog pamiste, ug bukas ug hunahuna. Katingalahan nga ang mga bata disiplinado kaayo, tungod kay dili sayon alang sa usa ka gamayng bata sa pagpadayon sa paglingkod sa usa ka lugar sulod sa usa ka oras ug tunga​—apan nahimo nila kana.”

Nagbatbat kon unsay kalainan sa mga Saksi ni Jehova gikan sa ubang mga relihiyon, ang mantalaan nagpatin-aw: “Ilang gipasiugda ang Paraiso nga anaa sa unahan. Talagsaon usab ang pagkasinati kaayo sa kongregasyon sa Bibliya, ug ilang kutloon kini sa matag posibleng higayon.” Sa paghinapos ang artikulo nag-ingon: “Kadtong 120 ka tawo, kinsa mga magwawali ni Jehova, nakahimo sa ilang desisyon; ug sila segurado nga kini mao ang husto nga desisyon. Ang ilang pagtuo ug pagwali niini mao ang sentro sa ilang kinabuhi.”

Dili tanan sa Pärnu nahimuot niining una sa gilaraw nga seryal sa mga artikulo maylabot sa mga relihiyon sa siyudad. Niadtong Hulyo 8, 1995, ang Pärnu Leht nagtaho: “Buot namong ipatik ang usa ka petisyon nga among nadawat gikan sa upat ka iglesya maylabot sa sinugdan sa usa ka bag-ong tudling.” Kining petisyona, o sulat, ngadto sa mantalaan gipirmahan sa mga hawas sa Orthodox Church sa Estonia, sa Estonian Evangelical Lutheran Church, sa Estonian Union of Evangelical Christians and Baptists, ug sa Estonian Methodist Church.

Kining upat ka relihiyosong mga hawas nagreklamo: “Katingalahan gayod kaayo alang kanamo nga inyong gisugdan ang seryal ug artikulo bahin sa mga Saksi ni Jehova.” Dugang pa, sila miingon: “May kalabotan niining mga seryala, buot namong ipahayag nga giisip namo nga imposible ang paghatag ug usa ka interbiyo sa Pärnu Leht.”

Ang relihiyosong mga hawas mihinapos: “Sa usa ka komunidad diin daghan ang naglibog tungod sa kusganong pag-ipit gikan sa nagkalainlaing bag-ong mga relihiyon ug mga sekta nga nagasangyaw ug ‘espirituwalidad,’ nakita namo nga kinahanglang konsiderahon sa mga publikasyon ang lokal nga relihiyosong kahimtang ug sa pag-ila sa makasaysayanhong mga iglesya gikan sa mga sekta ug sa ekstremistang mga kalihokan. Ang mga membro sa Estonian Council of Churches, nga naghawas sa Kristohanong mga iglesya kinsa nagatagamtam ug ekumenikanhong kooperasyon, kinahanglang magtagana ug usa ka tin-aw kaayong giya alang niini.”

Apan, human niining sulata, ang magsusulat sa Pärnu Leht mihatag niining makataronganong mga hunahuna: “Ang tanan nga among giisip nga husto tingali dili husto. Ug ang hunahuna sa Diyos ug mga opinyon bahin sa nagkalainlaing mga kongregasyon tingalig dili sama sa mga hunahuna niining upat ka halangdong mga iglesya, ug maingon man nga tinuod ang baliskad. Walay usa kanato ang dili-masayop, dili bisan ang mga iglesya nga may kasiglohan na ka daang mga tradisyon.”

Unsay imong gibati bahin sa nausab nga tinamdan nganha sa relihiyon diha sa mga republika niadto sa Unyon Sobyet? Kami masaligon nga ang mga tawo nga nagapangitag kamatuoran bisan diin nagapabili sa relihiyosong kagawasan nga ginatagamtam didto.

[Mapa sa panid 23]

PINLANDIA

Helsinki

Baltic Sea

ESTONIA

Tallinn

Pärnu

LATVIA

Riga

RUSYA

St. Petersburg

Moscow

LITHUANIA

Vilnius

BELARUS

Minsk

[Mga hulagway sa panid 24]

Ang kongregasyon sa mga Saksi ni Jehova sa Pärnu