Gikan sa Among mga Magbabasa
Holocaust Ako nahibulong kanunay kon nganong walay usa ang mibutyag mahitungod sa Holocaust. Ang seryal nga “Ang ‘Holocaust’—Kinsay Mibutyag?” (Agosto 22, 1995) nagtubag sa akong pangutana. Ang mga Saksi ni Jehova mibutyag, ug ako mapagarbohon kaayo sa akong kaubang mga Saksi!
C. B., Tinipong Bansa
Ako—nga di-membro—nagpahalipay kaninyo sa paghisgot bahin sa ulohang Holocaust. Ang inyong di-mapihigong pagtagad bahin niining daotang kapasundayagan sa kabangis sa tawo ngadto sa tawo madan-agon kaayo nga akong nabasa sukad. Ang kaisog sa inyong kaubang mga Saksi niadtong panahona maoy butang nga niana, ikasubo, ang kalibotan wala kaayoy nahibaloan.
L. B., Inglaterra
Ang akong amahan namatay sa Sachsenhausen. Ang akong kinamagulangang igsoong lalaki namatay usab ingong resulta sa pagkabilanggo sa Nazi. Lunhaw pa gihapon sa akong mga panumdoman ang Nazi nga paglutos sa mga Saksi ni Jehova. Sa ingon ako natandog sa pagpadayag sa akong apresasyon alang sa mga artikulo. Maayong pagkasulat!
F. D. J., Canada
Ako nakadayeg pag-ayo sa mga artikulo. Apan dili ako mouyon nga ang mga Saksi ni Jehova mao lamang ang bugtong “tingog sa tunga sa kahilom.” Ang mga Komunista usab nagpasidaan sa mga tawo batok kang Hitler sa wala pa siya nakabaton sa gahom. Daghan ang misangko sa mga kampo konsentrasyon.
B. W., Alemanya
Ang “Pagmata!” andam moadmiter nga si Hitler may daghang kaaway sa politika. Apan, ang mga artikulo espesipikong naghisgot sa kapakyasan sa relihiyosong mga organisasyon, nga ang kadaghanan nakigkombuya sa rehimeng Nazi. Ang mga Nazi mismo miila sa mga Saksi ni Jehova ingong ilang pangunang relihiyosong mga kaaway. Busa ang mga Saksi mao lamang ang relihiyosong grupo nga gihatagan ug ilang kaugalingong identipikasyon nga simbolo sa pagkabilanggo sa mga kampo konsentrasyon—ang gidungog nga purple triangle.—ED.
Linog sa Hapon Naghilak ako nga nagbasa sa artikulong “Ang Kalit nga Katalagman sa Hapon—Kon Giunsa Pagsagubang sa Katawhan.” (Agosto 22, 1995) Namatyan akog suod nga Kristohanong igsoong babaye niadtong linoga. Siya masiboton kaayo. Nahibalo ako nga siya pagabanhawon ug makita ko siya pag-usab. Ako mapasalamaton kaayo sa tanang espirituwal ug materyal nga tabang nga nadawat namo gikan sa kongregasyon ug sa Sosyedad. Apan, ako makahilak gihapon sa mamalandong ako sa nahitabo niadtong adlawa.
T. M., Hapon
Ang organisado ug dihadihang paglihok sa bahin sa mga Saksi nakapahibulong gayod kanako. Sa dihang gibasa ko ang mahigugmaong mensahe gikan sa mga igsoon sa kongregasyon sa Korea, mihilak ug mihilak lang ako. Ako malipayon kaayo sa pagpalandong nga nahisakop niining usa ka mahigugmaong organisasyon.
M. K., Hapon
Seksuwal nga Panghasi Salamat sa inyong artikulong “Mga Batan-on Nangutana . . . Seksuwal nga Panghasi—Sa Unsang Paagi Mapanalipdan Nako ang Akong Kaugalingon?” (Agosto 22, 1995) Ako 17 anyos, ug nahimamat ko ang usa ka di-Kristohanong lalaki sa tunghaan. Misalig ako kaniya, apan sa kadugayan ako gihasi niya ug sa iyang mga higala pinaagi sa law-ayng mga pasumbingay ug mga panghulga. Napugos ako sa pagbiya niadtong tunghaana aron makalingkawas sa situwasyon. Daghan akog nakat-onan gikan niining artikuloha. Karon nahibalo na ako kon unsay buhaton kon bahin sa pagpakiglabot uban sa kaatbang nga sekso.
T. G., Portugal
Ako seksuwal nga gihasi ug gihulga sa usa ka kauban sa trabaho. Kay giabusohan sa bata pa, sagad maglisod ako sa pagbarog alang sa akong kaugalingon. Hinuon, daghang higayong gihangyo ko siya sa paghunong na sa pagsamok kanako. Sa kataposan gisumbong ko siya sa among amo, ug dayon siya mihunong sa pagsamok kanako. Giapresyar ko gayod ang artikulo. Kinahanglang mahibalo ang mga babaye kon unsaon sa pagdumala niining sulirana.
V. A., Tinipong Bansa