Gikan sa Among mga Magbabasa
Usag-Ginikanang mga Pamilya Mao pay pagkadawat nako sa akong Oktubre 8, 1995, nga Pagmata! ug gibasa ang seryal nga “Usag-Ginikanang mga Pamilya—Mahimong Unsa ka Malamposon Sila?” Ako mapasalamaton kaayo alang niining mga artikuloha. Kini tukma gayod sa panahon. Nag-inusara ako nga ginikanan sulod sa pito ka tuig ug tunga na karon, ug lisod kaayo kini. Aduna akoy 15-anyos nga dalagita nga nakasinatig usa ka panahon nga malisod ug rebelyoso. Lain pa, ang situwasyon sa akong trabaho dili gayod matag-an. Apan, ako mapasalamaton nga sakop sa usa ka mapaluyohon ug mahigugmaong kongregasyon sa mga Saksi ni Jehova. Sa matag panahong gikinahanglan ko ang tabang sa akong kotse o nagkinahanglan lamang nga adunay ikasulti, ang akong mga igsoon anaa kanunay alang kanako.
D. R., Tinipong Bansa
Nag-inusara ako nga ginikanan sukad pa niadtong 1978. Tungod kay nag-antos sa bipolar depression, dili ako usa ka maayong ginikanan sa tanang panahon. Bisan pa niana, ako mamati kanunay sa mga magasin pinaagig teyp. Nadunggan ko na kaduha kining isyuha, ug kini nagtokar sa akong esteryo niining gutloa mismo. Basta padayon nga adunay ingon niana ka maayong impormasyon ang mga magasin, nagtuo ako nga makalahutay ra ang akong pamilya!
T. O., Tinipong Bansa
Diyos Lisod ba Pahimut-an? Nag-inusara ako nga ginikanan, ug sa dihang nakita ko ang hapin sa Oktubre 8, 1995, nga isyu nga may mga artikulo bahin sa nag-inusarang mga ginikanan, ako mihilak. Apan ang unang artikulo nga akong gibasa mao “Ang Hunahuna sa Bibliya: Ang mga Sukdanan ba sa Diyos Lisod Kaayo nga Kab-oton?” Oo, ingong usa ka inahan nga daw napakyas, kining artikuloha maoy usa ka dakong kahupayan. Gipakita niini kanako nga ako dili pildira. Higayon lamang nako kini sa pagpamatuod nga bakakon si Satanas. Salamat kang Jehova alang niining maayo kaayong artikulo!
R. N., Tinipong Bansa
Usa kini ka artikulo nga nakatandog kaayo kanako. Katingalahang hunahunaon nga bisag gamhanan kaayo si Jehova, siya andam sa pagpasaylo kanato sa kasaypanan nga atong nahimo. Kining artikuloha nakatabang kanako sa pag-apresyar nga kita mahimong malipayon sa pagkinabuhi sumala sa mga sukdanan sa Diyos, bisan tuod may mga panahong kita masayop.
D. C., Tinipong Bansa
Pagkabuta nga Makuha Gikan sa Suba Dili pa dugay, usa ka ahensiya sa kagamhanan nag-apod-apod ug mga tabletas sa pagsanta sa pagkabuta nga makuha gikan sa suba diha sa among baryo. Wala magdugay human niana nadawat nako ang Oktubre 8, 1995, nga isyu uban sa artikulong “Pagkabuta nga Makuha Gikan sa Suba—Pagbuntog sa Ngilngig nga Hampak.” Gipaambit ko kini uban sa akong mga silingan. Sa dihang nakita sa ahente sa kagamhanan ang artikulo, siya miingon: “Ang inyong organisasyon labaw pa kay sa usa ka relihiyon!” Dugang pa, ang lokal nga doktor mikuhag suskrisyon alang sa Ang Bantayanang Torre ug Pagmata! Daghan sa among teritoryo mihangyo ug mga magasin. Nalipay sila sa pagkakita nga naghisgot kini bahin sa nagakahitabo sa Nigeria.
A. A., Nigeria
Iditarod Mao pay pagkatapos nako pagbasa sa artikulong “Ang Iditarod—Napulo ka Siglo ang Kaugmaran” (Oktubre 8, 1995), ug natukmod ako sa pagpasalamat kaninyo alang sa impormatibo kaayo ug makapakutaw-sa-hunahunang artikulo! Gilarawan niini nga buhi kaayo ang hulagway aron malingaw ang magbabasa. Gibati ko mismo nga usa ako sa mga musher diha sa 1,800 kilometros nga panaw! Nakabaton usab ako ug mas lalom nga pagpabili kang Jehova—kansang mga hiyas makita diha sa iyang linalang tawo man ug hayop.
J. H., Tinipong Bansa
Legal nga Kadaogan Akong gibasa ang artikulong “Usa ka Kadaogan sa Minoriya—Diha sa Usa ka Nasod sa Panagsama.” (Oktubre 8, 1995) Sa hayskul pa ako, wala ako moapil sa mga saring sa karate. Ako nadasig sa dihang nabasa ko nga ang mga igsoon sa Kobe nakig-away sa isyu diha sa mga korte aron panalipdan ang ilang kagawasan sa pagsimba ug ang ilang katungod nga makadawat ug edukasyon. Karon nga ang tunghaan miapelar sa Korte Suprema, nag-ampo ako nga ang mga igsoon makadawat ug paborableng paghukom.
Y. K., Hapon