Usa ka Sumbanan sa Pagtratar sa mga Kagiw
DIHA sa Kasugoan nga gihatag ni Jehova nga Diyos sa nasod sa Israel, ang mga Israelinhon gipahinumdoman sa ilang kahimtang ingong mga kagiw sa Ehipto. (Exodo 22:21; 23:9; Deuteronomio 10:19) Busa sila gisugo sa pagtratar sa dumuloong nga mga molupyo sa taliwala kanila nga maluloton, sa pagkatinuod ingong mga igsoon.
Ang Kasugoan sa Diyos nag-ingon: “Kon usa ka dumuloong [sagad usa ka kagiw] mopuyo uban kanimo sa inyong yuta, ayaw ninyo siya dagmali. Ang usa ka dumuloong nga nagpuyo uban kaninyo kinahanglang pagaisipon ninyo ingong usa ka lumad sa inyong yuta; ug kinahanglang imong higugmaon siya sama sa imong kaugalingon, kay kamo nahimong dumuloong nga mga molupyo sa yuta sa Ehipto.”—Levitico 19:33, 34.
Nahibalo nga ang dumuloong nga mga molupyo sagad dili-makalaban ug dili-makapanalipod, si Jehova mihatag ug espesipikong mga balaod alang sa ilang kaayohan ug panalipod. Tagda ang mosunod nga mga katungod nga gipasalig kanila.
ANG KATUNGOD ALANG SA USA KA TIMBANG NGA HUSAY: “Kamo adunay usa ka hudisyal nga desisyon nga maayo alang kaninyo. Ang dumuloong nga molupyo kinahanglang isipon nga sama sa usa ka lumad.” “Ayaw pagtuisa ang hukom sa dumuloong nga molupyo.”—Levitico 24:22; Deuteronomio 24:17.
ANG KATUNGOD SA PAG-AMBIT SA IKAPULO: “Sa kataposan sa matag tulo ka tuig dad-a ang tanan nga ikapulo sa imong mga abot nianang tuiga, ug imong ibutang kini sa sulod sa imong ganghaan. Ug ang Levihanon, sanglit siya walay bahin o panulondon sama kanimo, ug ang dumuloong nga molupyo ug ang batang lalaki nga walay amahan ug ang balo nga babaye, nga anaa sa sulod sa imong mga ganghaan, moanha, ug sila magakaon ug magpatagbaw sa ilang kaugalingon.”—Deuteronomio 14:28, 29.
ANG KATUNGOD ALANG SA TIMBANG NGA MGA SUHOL: “Ayaw tikasi ang sinuholang mamumuo nga nagkinahanglan ug kabos, bisan siya usa sa imong mga igsoon o imong dumuloong nga mga molupyo nga anaa sa imong yuta, sulod sa imong mga ganghaan.”—Deuteronomio 24:14.
ANG KATUNGOD SA PAGDANGOP ALANG SA USA KA MAMUMUNO NGA DILI-TINUYO: “Alang sa mga anak sa Israel ug alang sa dumuloong nga molupyo ug alang sa mga lalin sa taliwala kanila kining unom ka siyudad magsilbing usa ka dalangpanan, aron ang bisan kinsa nga makapatay ug kalag nga wala tuyoa makadangop didto.”—Numeros 35:15.
ANG KATUNGOD SA PAGHAGDAW: “Sa dihang mangutlo na kamo sa alanihon sa inyong yuta, ayaw paghutda ug kutlo ang daplin sa imong uma, ayaw usab panghagdaw sa yuta nga imong gianihan. Dugang pa, ayaw kutloa ang salin nga mga bunga sa imong parasan, ug ayaw pamunit sa mga bunga nga nangahulog sa imong parasan. Ibilin kini alang sa kabos ug sa dumuloong nga molupyo. Ako si Jehova nga inyong Diyos.”—Levitico 19:9, 10.
Sa pagkatinuod, ang atong Maglalalang, si Jehova nga Diyos, may kaluoy sa mga kagiw, ug siya dayag nga malipay kon ingon usab kita niana. “Pagkahimong mga tigsundog sa Diyos,” misulat ang Kristohanong apostol Pablo, “ug padayon sa paglakaw diha sa gugma.”—Efeso 5:1, 2.
[Picture Credit Line sa panid 9]
Batang lalaki sa wala: UN PHOTO 159243/J. Isaac