Pagbuntog sa Trahedya Pinaagi sa Kusog ni Jehova

SINULAT SA KORESPONSAL SA PAGMATA! SA ESPANYA

NIADTONG Pebrero niining tuiga, daghan nga gikan sa Bailén nga Kongregasyon sa mga Saksi ni Jehova sa Espanya ang nalipay sa usa ka maanindot nga adlaw sa panag-ubanay diha sa duol nga Sierra Nevada Mountains. Apan lima lang ka kilometro gikan sa balay, ang nagsingabot nga kotse mitabok sa linya nga diha niana nagdagan ang ilang gisakyang bus, nga nagpahinabog pagkabangga sa atubangan. Dihay mibuto, ug ang bus gilamon sa kalayo. Ang ubang mga pasahero nakagawas dayon, apan daghan nga didto sa likod sa bus ang wala makaginhawa sa aso ug nangamatay.

Tanantanan, 26 ka Saksi ang nawad-an sa ilang mga kinabuhi, lakip sa upat ka bug-os-panahong ministro ug ubay-ubayng kabataan​—halos ikaupat ka bahin sa Bailén nga Kongregasyon. Ang hari sa Espanya, si Juan Carlos, nagpatugbaw sa mga hunahuna sa kadaghanang mga Katsila sa dihang siya misulat diha sa iyang telegrama ngadto sa mayor sa Bailén: “Nakurat pag-ayo sa makapasubong aksidente. Magmasaligon sa among tim-os nga mga pahasubo. Palihog ipaabot sa mga pamilya sa mga biktima ang among kinasingkasing nga mga simpatiya ug pagpaluyo sa panahon niining masakit nga mga yugto.”

Ang pangutana sa mga hunahuna sa pipila sa libolibong mitambong sa serbisyo sa paglubong mao, Nganong nahitabo ang maong mga trahedya? Tin-aw, ang mga aksidente nga gipahinabo sa “panahon ug wala-damhang panghitabo” makaapektar sa katawhan ni Jehova sama kang bisan kinsa. (Ecclesiastes 9:11, 12) Bisan pa niana, si Jehova nagsaad nga sa dili madugay ang ingon niana nga mga trahedya pagawagtangon.​—Pinadayag 21:4, 5.

Daghang membro sa pamilya sa sanga sa mga Saksi ni Jehova sa Espanya ug libolibong mga Saksi gikan sa ubang bahin sa nasod nangadto sa Bailén aron sa paghupay ug sa pagpaluyo sa lokal nga mga igsoon. Ang mga tawo sa Bailén, lakip ang lokal ug rehiyonal nga mga awtoridad, miambit usab sa kasubo sa mga pamilya sa mga Saksi. Daghang tigpaniid nakadayeg sa kalig-on sa namatyang mga Saksi.

“Nakaila ko ang mga Saksi sa daghang tuig,” mikomento si Antonio Gómez, ang mayor sa Bailén, “ug bisan tuod sa personal ako agnostiko, ako nakadayeg sa inyong pagtuo. Sa dihang nahitabo ang aksidente, ako naghunahuna dayon nga ang inyong relihiyoso ug tawhanong pagkasuod makaarang kaninyo sa pagbuntog sa trahedya nga mas maayo kay sa ubang mga grupo. Nakita ko kon sa unsang paagi ang tibuok lungsod nagpaluyo sa namatyang mga pamilya. Tingali sa miagi, ang mga tawo may sayop nga mga pagsabot bahin sa inyong baroganan, apan ikalipay ko nga isulti nga kini nawala. Kamo may kalig-on sa sulod nga lisod hisabtan sa usa nga dili Saksi.”

Si José Borrell, ang ministro sa obras pubrikas nga mitambong sa paglubong ingong hawas sa gobyerno sa Espanya, miadmitir: “Unsay imong ikasulti niadtong kinsa nawad-an sa tibuok nilang pamilya sa usa ka aksidente? Wala nay mas maayong paghupay kay sa ilang nakita diha sa ilang pagtuo. . . . Kamo adunay maayo kaayong pagtuo.”

“Padayon sa Paghupayay sa Usag Usa”

Unsay ilang “nakita diha sa ilang pagtuo”? Labaw sa tanan, sila nakakaplag ug paghupay gikan kang Jehova, “ang Diyos sa tanang paghupay, kinsa nagahupay kanamo sa tanan namong kasakitan.” (2 Corinto 1:3, 4) Bisan pa sa ilang kasubo, sila nakabaton ug kusog sa paghupay sa usag usa, nga nagbutang sa kasingkasing sa mga pulong ni Pablo ngadto sa mga taga-Tesalonica: “Padayon sa paghupayay sa usag usa ug paglinig-onay sa usag usa.”​—1 Tesalonica 5:11.

Makapatandog kadto nga kasinatian nga makitang ang Kristohanong mga igsoong lalaki ug babaye, nga ang pipila kanila namatyan ingon ka daghan sa walo ka paryente, miduaw sa ubang namatyang mga membro sa kongregasyon. “Sa dihang nakita namo ang usag usa, kami nanghilak. Apan pinaagi sa mga luha among gipahinumdoman ang among kaugalingon sa paglaom sa pagkabanhaw, ug gibati namo nga nahupayan,” mibatbat si Francisco Saez, ang nagadumalang magtatan-aw, kinsa namatyan tanan sa iyang duha lamang ka anak.

“Wala namo pasagdi ang among pagsangyaw nga buluhaton, ug mihimo kamig linaing paningkamot sa pagduaw sa mga paryente sa mga namatyan nga dili mga Saksi, nga nagagamit sa brosyur nga Sa Dihang ang Imong Minahal Mamatay.” Si Francisco nagpadayon: “Sa personal, gusto ko nga mosangyaw, kay ako nasayod nga pinaagi sa pagsangyaw sa uban moarang-arang ang akong pagbati. Ug tinuod man, bisag ako migawas nga nagbakho, ako mipauli sa balay nga nahupayan.”

Ang mga tawo sa Bailén maayo kaayo ug pagsanong niining buluhaton sa pagsangyaw. Usa ka semana human sa aksidente, si Encarna, kinsa nagbangotan tungod sa kamatayon sa duha ka anak nga babaye ug upat ka apo, miduaw sa usa ka babaye nga bag-o lang niyang gisugdan sa pagtuon sa Bibliya. Si Encarna naghatag ug Kasulatanhong paghupay ngadto niini nga babaye, kansang bana namatay sa upat ka bulang miagi. “Karon kita maghupayay sa usag usa,” matod niya, samtang sila nagpadayon sa ilang paghisgot sa brosyur nga Sa Dihang ang Imong Minahal Mamatay.

Ang pagpaluyo gikan sa tibuok-yutang panag-igsoonay dihadiha nangabot usab. “Ang tibuok kongregasyon nadasig pag-ayo sa libolibong mga sulat ug mga telegrama nga among nadawat,” miingon si Francisco Capilla, ang sekretaryo sa kongregasyon. “Ang buhatan sa koreyo kinahanglang magpadalag van direkta sa among balay adlaw-adlaw sa paghatod niining tanan. Kami nalipay kaayo sa mahigugmaong kabalaka sa mga igsoon.”

Paglaom Luyo sa Trahedya

Aduna bay bisan unsang maayong bunga sa maong trahedya? “Ang kasingkasing sa mga maalamon anaa sa balay sa nagbalata,” misulat ang karaang Haring Solomon. (Ecclesiastes 7:4) Uyon niini nga prinsipyo, ang trahedya sa Bailén nagpahunahuna ug maayo sa mga tawo bahin sa ilang relasyon sa Diyos. Si Faustino, usa ka di-magtutuo nga bana nga namatyag duha sa iyang unom ka anak sa aksidente, miingon sa iyang asawang si Dolores: “Aduna akoy maayong balita nga isulti kanimo. Magsugod na ako sa pagtuon sa Bibliya, sanglit buot ko nga makita ang akong mga anak sa bag-ong kalibotan.”

Bisag ang atong mga igsoong lalaki ug babaye sa Bailén dili dayon makabuntog sa ilang kasubo, sila nagahupay sa uban ug nahupayan. Si Jehova nagpalig-on kanila pinaagi sa iyang espiritu ug uban sa pagpaluyo sa daghang mahigugmaong mga igsoong lalaki ug babaye. Ang among mga pag-ampo padayon nga nagasaka ngadto sa atong langitnong Amahan alang kanila.

[Mga hulagway sa panid 26]

Upat niadtong nangamatay