Ang Hunahuna sa Bibliya

Kon Nganong ang Pagpalagpot Usa ka Mahigugmaong Kahikayan

EKSKOMUNIKASYON​—ang maong ideya magtandog ug managsagol nga pagbati taliwala sa daghang relihiyosong katawhan.a Kadaghanang tawo mouyon nga ang mga relihiyon nanginahanglan ug usa ka matang sa disiplina. Apan daghan ang nag-isip sa ekskomunikasyon ingong handomanan sa kagahapon​—usa ka maharason nga estilo sa disiplina nga nagpahinumdom kanila sa paggukod sa mga tawo nga kono ungo ug sa mga inkwisisyon.

Nagdugang sa suliran mao ang kaylap nga impluwensiya sa sekular nga kalibotan. Busa, kadaghanang relihiyon sa Kakristiyanohan misagop ug mas matugotong pag-isip sa sala. Nan, dili ikatingala nga usa ka Episcopalian nga ministro miingon: “Ang ekskomunikasyon maoy bahin sa atong tradisyon, apan wala ako maghunahuna nga gipatuman kini niining sigloha.”

Bisan pa niana, daghang tawo tingali ang matingala sa pagkahibalo nga taliwala sa mga Saksi ni Jehova, ang pagpalagpot (ang katumbas sa ekskomunikasyon) giisip nga ugdang. Tinuod, dili kini sayon nga aksiyong himoon, apan kini maoy mahigugmaong kahikayan. Sa unsang paagi?

Kini Magbayaw sa Ngalan sa Diyos

Si Jehova maoy balaan nga Diyos. Dili niya tugotan ang tinuyong sala sa bahin niadtong nag-angkon nga nagsimba kaniya. Si apostol Pedro misulat sa mga Kristohanon: “Magmabalaan kamo sa tanan ninyong mga panggawi, tungod kay kini nahisulat: ‘Kinahanglan kamong magmabalaan, tungod kay ako balaan.’” (1 Pedro 1:15, 16) Busa ang pagpalagpot sa dili-mahinulsolong mga makasasala magbayaw sa balaang ngalan sa Diyos; kini magpakitag gugma sa maong ngalan.​—Itandi ang Hebreohanon 6:10.

Nagkahulogan ba kini nga kon ang usa ka Kristohanon magpadala sa kahuyangan o mahulog ngadto sa grabeng sala, siya awtomatikong ipalagpot gikan sa kongregasyon? Dili gayod! Si Jehova dili usa ka tig-a-ug-kasingkasing nga diktador. Siya maluluy-on ug masinaboton. Siya nahinumdom nga kita dili hingpit. (Salmo 103:14) Si Jehova miila nga “ang tanan nakasala ug wala makaabot sa himaya sa Diyos.” (Roma 3:23) Ang Diyos mihikay ug espirituwal nga tabang sulod sa kongregasyon aron nga kon ang usa ka Kristohanon mohimog “sayop nga lakang” o bisan gani makahimog seryosong sala, siya mahimong mahigugmaong “ipasibo” sa espiritu sa kalumo. (Galacia 6:1) Pinaagi sa pagdawat sa tambag gikan sa Pulong sa Diyos ug pagpasundayag ug kinasingkasing nga kasubo ug tiunay nga paghinulsol, ang usa nga nahisalaag gikan sa dalan sa pagkamatarong “maayo” sa espirituwal.​—Santiago 5:13-16.

Apan, unsa na man kon ang usa ka bawtismadong Kristohanon seryosong nakasala ug ang tanang paningkamot sa pagpasig-uli kaniya wala molampos? Sa laing pagkasulti, komosta na man kon magginahi siya sa pagdumili sa pagtul-id sa iyang makasasalang dalan?

Gihuptan Niining Luwas ang Kongregasyon

Ang Bibliya nagsugo sa mga Kristohanon: “Hunong sa pagpakig-uban tipon kang bisan kinsang gitawag nga igsoon nga usa ka makihilawason o tawong dalo o tigsimbag idolo o tigsultig pasipala o palahubog o mangingilkil, dili bisan sa pagpakigkaon sa maong tawo.”​— 1 Corinto 5:11.

Kini bang maong balaod sa Bibliya maharason ug nagpakaulaw? Hunahunaa lang kini: Sa dihang ang usa ka bagtikang kriminal ipabilanggo gumikan sa pagsupak sa balaod, kana ba isipong maharason o dili-mabination? Dili, tungod kay ang publiko adunay katungod sa pagpanalipod sa pakigdait ug kasegurohan sa komunidad. Sa pagkatinuod, ang kriminal gipalagpot gikan sa masinundanon-sa-balaod nga sosyedad panahon sa iyang pagserbisyo sa bilanggoan.

Sa susama, ang Kristohanong kongregasyon makataronganong magpalagpot sa dili-mahinulsolong mga mamumuhat ug daotan gikan sa ilang taliwala. Ngano? Tungod kay ang kongregasyon kinahanglang usa ka luwas nga dapit nga walay imoral nga mga tawo ug ubang tinuyong mga makasasala.

Kay nakaamgo nga ang “usa ka makasasala mahimong maglaglag ug daghang maayo,” si apostol Pablo misugo sa kaubang mga magtutuo: “Kuhaa ang tawo nga tuman-kadaotan gikan sa inyong taliwala.” (Ecclesiastes 9:18; 1 Corinto 5:13) Kining maong aksiyon magpugong sa makasasala sa pagpakaylap sa kadunotan diha sa kongregasyon, ug kana manalipod sa maayong ngalan sa kongregasyon.​—Itandi ang 1 Timoteo 3:15.

Panalipod Alang sa mga Indibiduwal

Ang pagpalagpot manalipod usab sa indibiduwal nga mga membro sa kongregasyon. Atong iilustrar: Handurawa nga gipukaw ka gikan sa pagkatulog sa masaba nga busina sa sakyanan o sa alarma. Ang langgis nga tingog lisod nga dili panumbalingon; sa pagkatinuod, kini makapakurat kanimo! Sa susama, sa dihang ang usa ka tawo ipalagpot gikan sa kongregasyon, ang maong aksiyon gilaoman nga makadani sa pagtagad sa matag membro sa panon. Kini maghasol sa ilang mga kaisipan. Dili kini mahimong dili panumbalingon. Sa unsang paagi kini mahimong usa ka panalipod?

“Sa dihang una nakong nadungog sa Kingdom Hall nga may usa ka tawo nga gipalagpot, ang akong unang reaksiyon mao ang kakurat,” matod sa usa ka Saksi. “Unya kini nagpaubos kanako. Kini nagpaamgo kanako nga ako usab mahimong masayop.” Sumala sa gipakita sa iyang mga pulong, ang pagpalagpot mahimong motukmod sa uban nga timbangtimbangon ang ilang panggawi.​—1 Corinto 10:12.

Pinaagi sa pagpangutana sa atong kaugalingon sa mga pangutana sama sa ‘Aduna bay mga bahin sa akong kinabuhi diin ako huyang sa espirituwal?’ kita matabangan sa pagsusi sa atong kaugalingong baroganan uban sa Diyos. Niining paagiha kita makapadayon sa ‘pagpanlimbasog sa atong kaugalingong kaluwasan uban ang kahadlok ug pagpangurog.’​—Filipos 2:12.

Balik sa Diyos

“Bisan tuod lisod,” matod sa usa ka Kristohanong babaye nga napalagpot sulod sa pipila ka yugto, “ang disiplina gikinahanglan ug kinahanglanon kaayo, ug kadto napamatud-ang makaluwas ug kinabuhi.” Kini nagpasiugda sa laing hinungdanong bahin sa pagpalagpot. Kini magpalihok sa kanhing dili-mahinulsolong mga makasasala sa paghimo sa ilang unang mga lakang sa pagbalik sa Diyos.

Si apostol Pablo miingon: “Ang gihigugma ni Jehova iyang ginadisiplina.” (Hebreohanon 12:6) Ug bisan tuod nga tinuod nga “walay disiplina ang daw makapangaya sa pagkakaron, kundili makapaguol; apan human niana ngadto kanilang kinsa nabansay pinaagi niini kini magpatunghag madaitong bunga, nga mao, ang pagkamatarong.”​—Hebreohanon 12:11.

Mao kanay nahitabo kang Richard. Human mapalagpot sulod sa duolan sa duha ka tuig, siya naghinulsol, nagtul-id sa iyang nagpasipala-sa-Diyos nga panggawi, ug gidawat pagbalik ngadto sa Kristohanong kongregasyon. Sa paghinumdom, siya miingon bahin sa kasinatian: “Akong naamgohan nga kinahanglan akong mapalagpot ug nga ako takos sa akong nadawat. Kana gikinahanglan gayod ug nakatabang kanako sa pagsabot kon unsa ka seryoso ang akong dalan ug ang panginahanglan sa pagtinguha sa kapasayloan ni Jehova.”

Ang disiplina tingali dili sayon nga antoson. Ang pagdawat niana nagkinahanglan ug pagkamapainubsanon, apan kadtong nakakat-on gikan niana magaani ug dagayang bunga.

Busa, ang pagpalagpot maoy mahigugmaong kahikayan tungod kay kana magbayaw sa balaang ngalan sa Diyos ug kana manalipod sa kongregasyon gikan sa makapadunot nga impluwensiya sa sala. Dugang pa, kini magpasundayag ug gugma alang sa mamumuhat ug daotan pinaagi sa pagdasig kaniya sa paghinulsol ug sa ‘pagtalikod aron mapapas ang [iyang] mga sala, aron ang mga panahon sa pagpalagsik moabot gikan sa persona ni Jehova.’​—Buhat 3:19.

[Footnote]

[Picture Credit Line sa panid 26]

The New Testament: A Pictorial Archive from Nineteenth-Century Sources, ni Don Rice/Dover Publications, Inc.