Usa ka Talagsaong Engkuwentro
“ANG ang labing makalilipay nga butang nga akong nahimo sukad sa akong kinabuhi!” Mao kanay pagsaysay ni Kristie sa iyang tagsaong engkuwentro. Ingon kaha niini ang imong bation kon nakalangoy ka pa uban sa mga lumod diha sa Gulpo sa Mexico?
Ang tanan malingaw kaayong makakitag mga lumod nga naglangoylangoy o nagpasundayag ug mga kalaki diha sa tubig, sama sa paglakaw nga paatras pinaagi sa ilang mga ikog, paglukso nga hilabihang taasa gikan sa tubig, o pagtugot sa mga tawo sa pagsakay kanila. Ang pagtan-aw lamang niining mga pasundayagana makadani sa tawo sa pag-adto sa tubig ug sa pagpakigdula niadtong mga lumora.
Ingon gayod kanunay niini ang bation ni Kristie. Unya usa ka adlaw, samtang nanakayan siya ug naglangoylangoy sa Gulpo sa Mexico, usa ka ulo kalit nga mibutho atubangan kaniya. Wala magdugay, daw kining tulo ka maukit-ukitong mga lumod nagtuo nga sila nakakita ug kadula. Sa sinugdan, gikuyawan ug diyutay si Kristie, apan unya ang iyang kahadlok nahimong dakong kalipay samtang nakigdula siya sa mga lumod. Gipasagdan sila nga maoy magpalakaw sa situwasyon, wala siya molihok nga naghulat kon unsay ilang sunod nga buhaton.
Si Kristie miingon: “Usa ka lumod mikalit lang ug butho sa akong atubangan—ug didto, nagtinan-away kaming duha. Nakita ko ang akong kaugalingon nga naghapohap niana ug nakig-estorya niana—sama gayod sa himoon ko sa akong iro.”
Tungod sa pagkamaalamon sa mga lumod, popular sila nga mga maglilingaw, ug ang kadaghanang mga tigbansay nag-ingon nga tungod sa ilang pagkamahigalaon sa mga tawo, ang mga lumod dili kinahanglang kanunay nga suholan ug pagkaon sa paghimo sa ilang mga kalaki.
Sa dihang gipangutana kon unsa ang labing makalingaw nga butang sa pagtrabaho uban sa mga lumod, si Liz Morris, nga usa ka tigpanukiduki sa batasan sa mga mananap sa Sea World sa Florida, T.B.A., miingon: “Nagtuo ko nga kinaiyahan nila kana. Tungod kay makigdulaon kaayo sila ug kinaiyanhon nga maukit-ukiton, masuod ka gayod kanila . . . Mosanong gayod sila sa paghapohap ug pagmahal.” Diha sa gisaad nga bag-ong sistema sa mga butang sa Diyos, kitang tanan makasinati ug daghang tagsaong mga engkuwentro sama kang Kristie.