Mga Batan-on Nangutana . . .
Nganong Gitugotan sa Diyos nga Mahitabo ang Daotang mga Butang?
SI Lidija tin-edyer pa lamang sa dihang miulbo ang gubat sa iyang yutang-natawhan—ang nasod nga sa nangagi nailhang Yugoslavia. “Akong gigugol ang daghang adlaw ug gabii sa ngitngit nga salipdanan,” nahinumdom siya. “Kasagaran ako natental nga modalagan sa gawas, bisan pag kadto magkahulogan sa akong pagkamatay! Sa wala pay gubat, nakabaton ka sa tanan nimong gusto, apan niadtong panahona nalipay ka na lang nga buhi ka.”
Ang mga kalisdanan ug kapit-osan sa gubat sa wala madugay nakadaot sa espirituwalidad ni Lidija. Siya nag-ingon: “Dili kami makasangyaw o makatambong sa mga tigom sulod sa daghang semana. Naghunahuna gayod ako nga gipasagdan kami ni Jehova. Ako nangutana sa akong kaugalingon, ‘Nganong siya wala man magtabang kanamo karon?’”
Mga gubat, krimen, kapintasan, sakit, mga katalagman, mga aksidente—ang daotang mga butang nga sama niini mahimong mahitabo bisan sa mga batan-on. Ug sa dihang personal nga maapektahan sa trahedya, ikaw mahimong mahibulong, ‘Nganong gitugotan sa Diyos nga mahitabo ang maong daotang mga butang?’
Ang mga tawong diyosnon sa karaang kapanahonan misukna sa maong mga pangutana. Pananglitan, sa dihang nakita ni propetang Habacuc ang salawayong mga kahimtang nga naglungtad taliwala sa katawhan sa Diyos, siya mimulo: “Hangtod kanus-a, Oh Jehova, nga ako magatuaw alang sa tabang, ug ikaw dili mamati? Hangtod kanus-a nga ako magasangpit kanimo alang sa hinabang gikan sa kapintasan, ug ikaw dili magaluwas? Ngano ba nga ako imong gipatan-aw sa kon unsay makadaot, ug ikaw nagpadayon sa pagtan-aw lamang sa kasamok?” (Habacuc 1:2, 3) Ang pipila ka Kristohanong batan-on karong adlawa nakasinatig susamang emosyonal nga kasakit.
Tagda kon unsay gibati sa usa ka batan-ong Kristohanon human sa hinanaling pagkamatay sa iyang amahan. Matod niya: “Ako nabuangbuang, nga misiyagit sa may bentana, nga gisinggitan si Jehova nga Diyos. . . . Gipasanginlan ko siya alang sa tanan. Nganong nahitabo man kini? Si Papa maoy talagsaong amahan ug mahigugmaong bana, ug karon siya namatay—wala bay pagtagad si Jehova?” Sa kahimtang nga sama niini, normal lamang nga mobatig kalibog, kasakit, o kasuko pa. Hinumdomi, ang matinumanong propetang si Habacuc nalibog usab nga gitugotan nga naglungtad ang tumang-pagkadaotan. Bisan pa niana, kon ang usa ka tawo magpadayon sa paghambin ug mga kayugot, adunay kapeligrohan. Siya mahimong “masuko batok kang Jehova mismo.”—Proverbio 19:3.
Nan, sa unsang paagi makalikay ka nga madaog sa kapungot ug kayugot? Una, kinahanglang hisabtan mo kon diin gikan ang kadaotan.
Daotang mga Butang Dili Gikan sa Diyos
Gitin-aw sa Bibliya nga dili gayod katuyoan sa Diyos nga kita magaantos sa ingon. Gibutang niya ang unang magtiayon sa usa ka paraisong puy-anan nga walay kasakitan ug pag-antos. (Genesis 1:28) Pihong nasayod ka kon sa unsang paagi nadaot ang kahimtang: Usa ka dili-makitang espiritung linalang, kinsa sa ulahi nailhang Yawa ug Satanas, naghaylo kang Adan ug Eva nga magmasupilon sa Diyos. (Genesis, kapitulo 3; Pinadayag 12:9) Sa pagbuhat niini, si Adan nagbalhog sa tanan niyang kaliwat ngadto sa sala ug sa malaglagong mga epekto niini.—Roma 5:12.
Tin-aw, dili ang Diyos ang nagdalag kadaotan sa katawhan, kondili ang tawo mismo. (Deuteronomio 32:5; Ecclesiastes 7:29) Sa pagkatinuod, ang tanang kadaotan nga giantos sa katawhan karong adlawa—ang sakit, ang kamatayon, ang mga gubat, ang mga inhustisya—maoy sangpotanan sa tinuyong buhat ni Adan sa pagkamasupilon. Dugang pa, kitang tanan nailalom sa gitawag sa Bibliya nga “panahon ug wala-hisayri-daang hitabo.” (Ecclesiastes 9:11) Ang tuman-kadaotan ug ang matarong makasinatig takulahaw nga mga aksidente ug mga trahedya.
Pagtugot sa Diyos sa Tumang-Pagkadaotan
Bisan pag makapahupay ang pagkahibalo nga ang Diyos dili mao ang tinubdan sa tumang-pagkadaotan, basin mahibulong ka gihapon, ‘Nganong gitugotan niyang magpadayon ang tumang-pagkadaotan?’ Sa makausa pa, kini nalangkit sa mga isyu nga gipatungha sa Eden. Ang Diyos nagsulti kang Adan nga kon siya magmasupilon, siya mamatay. (Genesis 2:17) Ang Yawa, hinunoa, misulti kang Eva nga kon siya mokaon gikan sa gidili nga kahoy, siya dili mamatay! (Genesis 3:1-5) Sa pagkatinuod, si Satanas nagngalan sa Diyos nga bakakon. Dugang pa, gipasabot ni Satanas nga ang tawo makabatog labawng kaayohan kon mohimo siya sa iyang kaugalingong mga desisyon ug dili kay ang Diyos magsulti kaniya kon unsay buhaton!
Dili mahimong ang Diyos dili magtagad sa maong mga pagbutangbutang. Nakakita ka na bag usa ka kasaring nga mihagit sa awtoridad sa usa ka magtutudlo? Kon siya dili disiplinahon, ang ubang estudyante mosugod sa pagminaldito usab. Sa susamang paagi, mahimong mosilaob unta ang tibuok-kalibotang kagubot kon si Jehova wala moharong nga direkta kang Satanas. Gihimo kana ni Jehova pinaagi sa pagtugot sa tawo sa pagsunod sa paagi ni Satanas sa paggawi. Nakapahimulos ba ang tawo sa samag-diyos nga independensiya nga gisaad ni Satanas? Wala. Ang pagmando ni Satanas nagpatunghag kadaot ug katimawa, nga nagpamatuod nga siya usa ka madinaotong bakakon!
Itugot ba sa Diyos nga ang tumang-pagkadaotan magpadayon sa walay kataposan? Dili. Aron mahusay ang mga isyu nga gipatungha ni Satanas, ang Diyos magtapos sa dili na madugay sa tanang tumang-pagkadaotan. (Salmo 37:10) Apan sa unsang paagi makasagubang kita kasamtangan?
Usa ka Isyu nga Naglangkit Kanimo
Amgoha, una sa tanan, nga nalangkit ka niining isyu tali sa Diyos ug kang Satanas! Sa unsang paagi? Tagda ang basahon sa Bibliya nga ginganlan sumala sa matarong nga tawong si Job. Sa dihang gipunting sa Diyos si Job ingong panig-ingnan sa usa ka matinumanong magsisimba, si Satanas mitubag: “Simbahon ka ba ni Job kon wala siyay makuha gikan niana?” (Job 1:9, Today’s English Version) Tinuod, si Satanas nangatarongan nga kon tugotan siya sa paggamit sa pagpit-os, siya makapatalikod kang bisan kinsa nga tawo gikan sa pagsimba sa Diyos!—Job 2:4, 5.
Busa gipakaulawan ni Satanas ang tanang mahadlokon-sa-Diyos nga katawhan. Siya nagpakaulaw kanimo. Bisan pa niana, ang Proverbio 27:11 nag-ingon: “Magmaalamon ka, anak ko, ug lipaya ang akong kasingkasing, aron ako makatubag niya nga nagatamay kanako.” Oo, kon ikaw magaalagad sa Diyos bisan pa sa makaguol nga mga suliran, ikaw aktuwal nga makatabang sa pagpamatuod nga si Satanas bakakon!
Tinuod, kon mag-atubang ug daotang mga butang, dili sayon ang paghunahuna sa mga isyu nga nalangkit. Si Diane, kinsa diyes anyos pa lang sa dihang namatay ang iyang inahan, nag-ingon: “Nahadlok ako nga ako magmagahion o mayugot tungod sa mga pagsulay sa akong kinabuhi.” Hinunoa, ang pagkahibalo kon nganong gitugotan sa Diyos ang tumang-pagkadaotan nakatabang niya sa pagbaton ug hustong panud-ong bahin sa iyang mga suliran. Karon siya nag-ingon: “Bisan pag adunay mga butang nga lisod nga sagubangon sa akong kinabuhi, ang kamot ni Jehova kanunayng nag-uban kanako.”
Si Diane nagpahinumdom kanato sa usa ka hinungdanon kaayong kamatuoran: Si Jehova wala magdahom nga atong sagubangon ang maong mga kapit-osan sa atong kaugalingon. Ang Salmo 55:22 nagpasalig kanato: “Itugyan ang imong palas-anon kang Jehova mismo, ug siya mismo magapalig-on kanimo. Dili gayod niya itugot nga matarog ang usang matarong.” Ang batan-ong si Kotoyo nakasinati nga kini matuod. Siya miatubang sa trahedya sa pagkamatay sa iyang mga ginikanan sa 1995 nga linog nga mihapak sa Kobe, Hapon. Sa pagpahayag alang sa iyang kaugalingon ug sa iyang mga manghod, siya nag-ingon: “Sanglit ang akong inahan nagtudlo kanamo nga mosalig kang Jehova, kami makaantos.”
Komosta si Lidija, ang batan-ong babaye nga gihisgotan sa sinugdan? Sa ngadtongadto, nakaamgo siya nga wala gayod siya biyai ni Jehova. Siya karon nag-ingon: “Si Jehova kanunayng anaa alang kanamo. Siya nag-agak kanamo ug nagtultol sa among mga lakang.”
Si Jehova—Mahigugmaong Diyos nga May Pagtagad
Ikaw usab makasinati sa tabang sa Diyos inigkahitabo sa daotang mga butang kanimo. Ngano? Tungod kay si Jehova may pagtagad kanimo! Ug bisan pag gitugot niyang mahitabo ang daotang mga butang nganha sa maayong mga tawo, gitagana usab niya ang mahigugmaong paghupay. (2 Corinto 1:3, 4) Usa ka paagi nga iyang ginabuhat kana maoy pinaagi sa Kristohanong kongregasyon. Imong hikaplagan dinha ang ‘mga higala nga mounong nga suod pa kay sa usa ka igsoon,’ kinsa makapalig-on kanimo inighapak sa usa ka suliran. (Proverbio 18:24) Si Kotoyo nahinumdom: “Sukad sa unang adlaw human sa linog, nangadto kami sa dapit diin nagtapok ang mga igsoon, ug among nadawat ang pagpalig-on ug ang kinahanglanong mga butang. Tungod niadto gibati ko ang kasegurohan. Samtang nabatonan namo si Jehova ug ang mga igsoon, gibati ko nga maantos namo ang bisan unsang butang.”
Tungod kay si Jehova nakaila kanimo ingong usa ka indibiduwal, siya makaatiman usab sa imong mga panginahanglan inigkahitabo sa daotang mga butang. Si Daniel nahinumdom kon giunsa niya pagsagubang ang pagkamatay sa iyang amahan, nga nag-ingon: “Si Jehova mahimong usa ka amahan alang kanimo, ug ang iyang organisasyon nagtagana sa mga lalaking espirituwal ingong mga sulondan. Si Jehova kanunayng naghatag ug mga tubag sa akong mga pangutana nga kinaiyanhong ipakigsulti nako sa akong amahan.” Si Diane susamang nakasinati sa mahigugmaong pag-atiman ni Jehova sukad sa pagkamatay sa iyang inahan. Siya nag-ingon: “Pinaagi sa mas tigulang, hamtong sa espirituwal nga mga tawo nga naghatag ug pagdasig, direksiyon, ug tambag, siya naggiya kanako ug nagtabang kanako sa pagsagubang sa bisan unsang butang nga makapaluya.”
Hinuon, ang pagkasinatig daotang mga butang dili gayod kahimut-anan. Apan magkalipay sa pagkahibalo kon nganong gitugotan sa Diyos kanang mga butanga. Sa kanunay pahinumdomi ang imong kaugalingon nga sulbaron sa Diyos ang suliran sa dili na gayod madugay. Aw, ang tanang timaan sa daotang mga butang nga atong nasinati sa ngadtongadto mapapas na! (Isaias 65:17; 1 Juan 3:8) Pinaagi sa pagpahimulos sa tanang tagana nga ginahimo sa Diyos sa pagtabang kanato sa pagsagubang, makahimo ka sa imong bahin sa pagpamatuod nga si Satanas bakakon. Sa nahaigong panahon, ‘pahiran sa Diyos ang tanang luha gikan sa imong mga mata.’—Pinadayag 21:3, 4.
[Mga hulagway sa panid 19]
Sa dili na madugay si Jehova magatapos sa tanang daotang mga butang