Gikan sa Among mga Magbabasa
Panalipdi ang Inyong mga Anak Nahibalag ko ang usa ka babaye nga misagop ug pipila ka kabataan nga giabusohan sa sekso. Gitanyag ko kaniya ang Oktubre 8, 1993, nga isyu nga may mga seryal nga “Panalipdi ang Inyong mga Anak!” Sa dihang giduaw ko siya pag-usab, siya miingon: “Ang mga artikulo nakatabang kanako sa pagpakiglabot niining bag-ong situwasyon. Gidala ko ang magasin sa dihang ako may alatubangon sa korte sa kabataan ug gipakita kini ngadto sa tigdemanda. Siya, ingon man ang huwes, nakadayeg sa mga artikulo ug buot nga moapod-apod niini taliwala sa ubang mga abogado.” Kining batan-ong babaye mihangyo ug dugang pang literatura ug karon nagatuon na sa Bibliya uban kanamo.
E. T. V., Brazil
Crossword Puzzles Pipila ka adlaw nga miagi, ang akong apo ug ako nagpakli sa Disyembre 8, 1995, nga Pagmata! sa dihang nakita namo ang crossword puzzle. Siya miingon, “Gusto ko ang crossword puzzles!” Busa gipangita namong duha ang mga teksto, ug gipasagdan ko siya nga maoy mangita sa mga tubag mismo. Gigugol namo ang makapalipay kaayong tunga sa oras o kapin pa nga magkauban. Ipadayon kini! Kami naglaom sa sunod nga crossword puzzle.
M. G., Canada
Ako nuybe anyos. Gusto ko ang inyong magasin, apan labaw sa tanan gusto ko ang crossword puzzles tungod kay kini nagtabang kanako nga mahinumdoman ang mga hitabo ug katawhan sa Bibliya. Salamat kaayo alang niining bahina.
J. M. T., Brazil
Mga Sakit nga Mamumuno Salamat sa malukpanon, tin-aw, ug tukmang mga seryal nga “Mga Sakit nga Mamumuno—Ang Gubat Taliwala sa Tawo ug sa Mikrobyo.” (Pebrero 22, 1996) Wala ko gayod hunahunaa ang hilabihan ka komplikado nga mikrobyo ug ang gidak-on sa kadaot nga ikahatag niini sa lawas.
C. L., Tinipong Bansa
Ang magasin miabot nga untop gayod sa panahon, sanglit natakboyan ako ug pulmonya ug kinahanglang motomar ug mga antibiotiko. Ang mga artikulo nagtabang kanako nga makasabot kon nganong gibati nako nga migrabe imbes kay moarang-arang sa unang pagtomar sa tambal. Mapasalamaton ako niining materyal, nga gipresentar sa ingon niini ka sayon-sabton nga paagi.
I. W., Alemanya
Etiopia Human basaha ang artikulong “Makaiikag nga Etiopia” (Pebrero 22, 1996), ang akong kasingkasing napuno sa pagpasalamat. Daghan akog Etiopianong mga paryente nga dili mga Saksi ni Jehova. Kining artikuloha maanindot kaayo nga ako masaligon nga makaaghat kini sa ilang kaikag sa pagkat-on bahin sa atong dakong Diyos, si Jehova.
J. R., Luxembourg
Kanhing Geisha Natandog ako pag-ayo sa artikulong “Ang Anak sa Usa ka Baki.” (Pebrero 22, 1996) Tungod sa impluwensiya sa akong inahan, nagtuon ako ug klasikal nga ballet sukad pa sa akong pagkabata. Sa dihang nahimo akong usa sa mga Saksi ni Jehova, mihukom ako sa pagtalikod sa ballet, bisag gimahal ko kini. Kini nga artikulo nagdasig kanako. Nakatabang kini kanako nga makita nga dunay ubang mga Kristohanon nga mihimo sa susamang mga pagsakripisyo. Ako nagpasalamat kaninyo sa tibuok kong kasingkasing.
Y. S., Hapon
Dili nako mapugngan ang paghilak sa dihang nakita ko ang letrato ni Sawako Takahashi uban sa iyang malipayon, teokratikanhong pamilya. Ang pag-antos nga akong naagoman sa nangagi dugayng naghari sa akong kinabuhi, ug ang pagbati nga nabiktima nakahatag kanako ug dakong kasub-anan. Sa pagkasayod nga si Jehova mopasaylo sa akong nangaging mga kahuyangan naghatag kanako ug kaisog nga maningkamot ngadto sa pagkahimong usa ka bawtismadong Kristohanon.
M. K., Hapon
Usa kadto sa labing matulon-anon ug maayong sugilanon nga akong nabasa sukad. Nakatabang usab kini kanako nga makasabot kon unsay nalangkit sa pagsimba sa katigulangan. Wala gayod nako hisabti kining matanga sa pagsimba hangtod nga nabasa nako kini nga sugilanon sa kinabuhi.
P. Y., Tinipong Bansa