Mga Gang sa Babaye—Usa ka Peligrosong Kiling
“WALAY kaluoy, pintas ug mangtas” mao ang mga pulong nga gigamit sa pamantalaan nga The Globe and Mail sa paghubit sa mga gang sa babaye nga nagsukad sa mga hayskul sa Canada. Gikapoyan na ingong sakop sa mga gang sa lalaki, ang nagtubong gidaghanon sa mga babaye namugos sa ilang kagawasan. Usa ka sekreta nga polis sa Toronto, nga nag-espesyalisar sa mga gang sa batan-on, nakamatikod nga ang mga babaye “namugos sa ilang kaugalingon sa labing pintas nga paagi.” Andam silang “mogamit ug mga hinagiban ug ‘hingaping’ puwersa” ug “kasagaran mas walay kaluoy ug agresibo kay sa ilang katugbang nga mga lalaki,” matod pa ni Dr. Fred Mathews diha sa Globe. Ngano? Ang kasagarang panglantaw taliwala sa malinapasong mga batan-on, matod pa sa usa ka polis, mao nga ang mga babaye “maorag mugbo rag mga sentensiya kon sila madakpan.” Ang tigpamaba sa polisya miingon sa Globe nga ang “mga babayeng ingon ka batan-on sa 11 nalangkit sa ginagmayng krimen ug pagpayuhot sa mga droga ug mga hinagiban sa mga hayskul.”
Si Dr. Mathews, usa ka sikolohista ug awtoridad sa maong kapintasan, miinterbiyo ug mga kaanib sa gang sa babaye sulod na sa kapin sa napulo ka tuig ug nakakaplag nga sila “masuk-anon ug rebelyoso, kadaghanan gumikan sa madagmalon o gubot nga pamilya.” Unsay nakadani sa maong mga batan-on ngadto sa mga gang? Ang mga gang nagtanyag ug “pagbati sa panag-ubanay ug seguridad,” matod pa sa kanhing kaanib. Apan, sa dihang giinterbiyo sa pamantalaan, siya miadmitir ug duha ka pagsulay sa paghikog aron makalingkawas sa gang ug midugang: “Daghan nianang gitawag ug aksidenteng mga kamatayon ug mga paghikog sa kasilinganan maoy mga pagbuno pinaagig mga gang. Panalipdan ninyo ang usag usa batok sa laing gang kon naa kamo sa gang. Ang problema mao nga dili kamo makapanalipod sa usag usa gikan sa kaugalingong kaanib sa gang.”
Usa ka nabalakang magtutudlo sa hayskul miingon: “Ang mabangis nga mga babaye nga among gikasugat dili gayod matag-an. Kon masuko sila, dili ka masayod kon asa sila moatake. Ug kon ikaw usa ka magtutudlo, makahahadlok kana kaayo.” Mahitungod sa “kataposang mga adlaw,” gitagna sa Bibliya nga ang mga panahon mahimong “lisod sagubangon” tungod kay ang katawhan, lakip na ang mga batan-on, mahimong “walay pagpugong-sa-kaugalingon, mabangis.”—2 Timoteo 3:1-5.