Usa ka Katawhan nga Ginatudloan sa Paghigugma

ANG gugma maoy pagbati nga gipasikad sa pagdayeg, pagkamaluloton, o parehong mga interes. Ang gugma maoy mainitong pagbati. Kini dili hakog, maoy maunongon, ug nagpakitag malulotong kabalaka alang sa kaayohan sa uban. Ang gugma mao ang kaatbang mismo sa pagdumot. Ang usa ka tawo nga gipalihok sa pagdumot nalinga pag-ayo sa iyang kaugalingong dulot nga pagbati; ang usa nga gipalihok sa gugma maghunahuna sa uban.

Gugma o pagdumot​—unsa ang nagdominar sa imong kinabuhi? Kini dili lang usa ka makahuloganong pangutana tungod kay ang imong walay-kataposang kaugmaon nagdepende sa tubag. Samtang nagkinabuhi sa usa ka kalibotan nga gitudloan sa pagdumot, minilyong tawo ang nakakat-on sa paghigugma. Kini gibuhat nila pinaagi sa pagsul-ob sa bag-ong personalidad. Wala lamang sila maghisgot bahin sa gugma; sila naningkamot pag-ayo sa pagbuhat niana.

Kon nakatambong ka na ug tigom sa mga Saksi ni Jehova, lagmit nakadayeg ka sa imong nakita. Bisan unsay nasyonalidad, ang mga Saksi ni Jehova nahiusa sa pagsimba. Sila naglangkob sa usa ka tinuod internasyonal nga panag-igsoonay. Kini mapanid-an diha sa ilang lokal nga mga kongregasyon ug diha sa ilang mga kombensiyon apan tingali labi pang maayo diha sa ilang gitawag ug mga pamilyang Bethel. Kini maoy mga grupo sa mga boluntaryo nga magkauban sa pagpuyo ug pagtrabaho, ingong pamilya, sa paggama ug pagpanagtag ug literatura sa Bibliya. Sa matag nasod, ang pipila kanila nagdumala sa buluhaton nga gihimo sa mga Saksi ni Jehova didto. Kini dili gamayng trabaho, sanglit kini naglangkit​—sa 1997​—sa kapin sa 82,000 ka kongregasyon sa 233 ka kayutaan. Sa pagtagana niining maong panginahanglan, kapin sa 16,000 ka tawo ang nag-alagad sa mga pamilyang Bethel sa tibuok kalibotan, lakip sa tibuok-kalibotang hedkuwarter ug sa lainlaing mas gagmayng mga pasilidad sa sanga sa 103 ka kayutaan.

Kadaghanan sa pamilyang Bethel nalangkoban kadaghanan sa mga lungsoranon sa nasod nga nahimutangan sa usa ka sangang buhatan. Apan dili bug-os. Ang pipila ka pamilyang Bethel nalangkoban sa mga Saksi sa lainlaing nasodnon, etniko, o rasanhong mga kagikan maingon man sa kanhing lainlaing relihiyosong mga kagikan. Pananglitan, sa pamilyang Bethel sa duolan sa 1,200 ka tawo nga nahimutang sa Selters, Alemanya, mga 30 ka nasyonalidad ang gihawasan. Unsay nakapaarang kanila sa pagkinabuhi, pagtrabaho, ug pagsimba nga magkauban diha sa pakigdait ug panaghiusa, sa usa ka atmospera nga walay pagdumot? Ilang gisunod ang tambag sa Bibliya sa Colosas 3:14, nga nag-ingon:

“Isul-ob sa Inyong Kaugalingon ang Gugma”

Walay natawo nga bug-os nasul-oban, ni may usa ka tawo nga nasul-oban pinaagi lamang sa pagsulti bahin niana. Ang pagsul-ob naglakip sa paghimog tinong mga desisyon ug unya pagpanglimbasog sa pagsunod niana. Sa susama, walay usang natawo nga nasul-oban sa gugma. Ang pagsulti bahin niana dili igo. Gikinahanglan ang paningkamot.

Ang sinina nagsilbig daghang katuyoan. Kini manalipod sa lawas, magtago sa dili maayong mga bahin sa lawas o mga apan, ug sa usa ka sukod magpadayag sa personalidad sa usa ka tawo. Ingon niana ang gugma. Kini nagsilbing proteksiyon tungod kay ang gugma alang sa matarong nga mga prinsipyo ug alang sa hustong kaubanan magpalihok sa usa sa paglikay sa kaubanan o mga dapit nga lagmit peligroso. Kini magsilbing panalipod sa personal nga mga relasyon, nga angayng mahalon nato. Siya nga nahigugma lagmit nga higugmaon sa baylo, ug siya nga maglikay sa pagdaot sa uban lagmit kaayong walay modaot sa iyang kaugalingon.

Ang gugma magatabon usab sa labi pang ngil-ad nga mga bahin sa atong personalidad, nga makapatugaw unta sa mga isigkatawo. Dili ba kita mas makiling sa pagpalabay sa gagmayng sayop sa mga tawo nga mahigugmaon kay sa mga indibiduwal nga mapahitas-on, hambogiro, mahunahunaon sa kaugalingon, ug walay gugma?

Ang mga tawo nga nagsul-ob sa ilang kaugalingon ug gugma nagpadayag sa katahom sa samag-Kristong personalidad. Samtang ang pisikal nga katahom kutob sa panit lamang, ang espirituwal nga katahom mosuhop sa tibuok pagkatawo. Lagmit nakaila ka ug mga tawo nga imong giisip nga matahom, dili tungod sa ilang pisikal nga panagway, kondili tungod sa ilang tinuod mainitong personalidad. Sa laing bahin, kadaghanan kanato nakahibalag ug matahom nga mga babaye o ambongang mga lalaki nga nawad-an sa tanang timailhan sa kamadanihon sa atong panan-aw sa dihang napadayag ang ilang tinuod nga personalidad. Pagkaanindot nga maanaa taliwala sa mga tawo nga nagsul-ob sa ilang kaugalingon sa gugma!

Pulihan ang Pagdumot sa Gugma

Nga ang pagdumot mapulihan sa gugma ikailustrar sa usa ka surbi nga gihimo sa 1994 sa 145,958 ka Saksi ni Jehova sa Alemanya.

Ang hinobrang pag-inom, pag-abuso sa droga, krimen, pagsugal, ug batok-katilingban o mapintas nga panggawi ngatanan, sa usa ka paagi o sa lain, maoy mga kapahayagan sa kahakog, nga dali rang magpukaw sa pagdumot. Apan 38.7 porsiyento niadtong giinterbiyo miingon nga aron matuman ang taas nga mga sukdanan sa Bibliya nga gipasiugda sa mga Saksi, ilang gibuntog ang usa o dugang pa niining mga sulirana. Ang gugma alang sa Diyos ug sa iyang matarong nga mga sukdanan sa panggawi nagpalihok kanila sa pagbuhat niana. Ang mahigugmaong tabang gitanyag sa mga Saksi ni Jehova, kasagaran sa tinagsatagsa nga paagi. Sulod sa milabayng lima ka tuig (1992-1996), 1,616,894 ka tawo sa 233 ka kayutaan ang natabangan sa paghimog mga kausaban, nga nagbuntog sa pagdumot pinaagi sa nagabuntog-sa-tanan nga gugma.

Pinaagi sa pagpadapat sa dili-mahakogong gugma diha sa ilang mga kaminyoon, ang mga Saksi ni Jehova nakabaton ug lig-ong mga relasyon. Sa pipila ka nasod ang usa ka kaminyoon sa matag duha o tulo matapos sa diborsiyo. Apan ang gihisgotan sa ibabaw nga surbi nagpakita nga sa pagkakaron 4.9 porsiyento lamang sa mga Saksi ang diborsiyado o nahimulag sa ilang mga kapikas. Apan, dili hikalimtan nga igoigong gidaghanon niini ang nagdiborsiyo una sila mahimong mga Saksi ni Jehova.

Sanglit ang Diyos sa gugma mao ang Dakong Magtutudlo nga nagtudlo sa iyang mga dalan niadtong nahigugma kaniya, ang mga Saksi ni Jehova nagtumong sa ilang gugma, una sa tanan, ngadto kaniya. Dili sama sa ubang mga tawo, kinsa tingali maoy “mga mahigugmaon sa kalipayan inay nga mga mahigugmaon sa Diyos,” ang mga Saksi ni Jehova nag-una sa Diyos. (2 Timoteo 3:4) Kasukwahi sa mga dalan niining walay prinsipyong kalibotan, ang kasagarang Saksi mogugol ug 17.5 ka oras kada semana sa relihiyosong mga kalihokan. Ang mga Saksi dayag nga mahunahunaon sa espirituwal. Mao kanay nakapalipay kanila. Si Jesus miingon: “Malipayon kadtong mahunahunaon sa ilang espirituwal nga panginahanglan, sanglit ilaha ang gingharian sa mga langit.”​—Mateo 5:3.

Ang matuod nga alagad sa Diyos, nag-ingon ang magsusulat sa Salmo 118, dili angayng mahadlok sa mga tawo. “Si Jehova dapig kanako; dili ako mahadlok. Unsay arang mabuhat sa yutan-ong tawo kanako?” (Bersikulo 6) Ang bug-os nga pagsalig sa Diyos magwagtang sa usa sa mga hinungdan sa pagdumot ug kahadlok sa ubang mga tawo.

Ang usa ka Kristohanon, nga nasayod nga ang Diyos “mahinay sa kasuko ug dagaya sa mahigugmaong-kalulot ug sa kamatuoran,” maningkamot sa pagpapha sa kasuko gikan sa iyang kinabuhi, kay kana mahimong dugang hinungdan sa pagdumot. Ang pag-ugmad sa mga bunga sa espiritu sa Diyos, lakip ang kalumo ug pagpugong-sa-kaugalingon, motabang kaniya sa pagkab-ot niini.​—Salmo 86:15; Galacia 5:22, 23.

Ang usa ka tinuod nga Kristohanon mapainubsanon ug dili maghunahuna ug labaw pa sa iyang kaugalingon kay sa angay niyang hunahunaon. (Roma 12:3) Iyang ugmaron ang gugma sa iyang pakiglabot sa uban. Kasukwahi sa pagdumot, ang gugma “dili mapasuko. Kini dili magahambin ug talaan sa kadaot.”​—1 Corinto 13:5.

Oo, ang kahadlok, kasuko, o pagbati nga may kadaot magpahinabo sa mga tawo nga magdumot. Apan ang gugma, pinaagi sa paghikaw sa pagdumot sa pasikaranan niini, modaog ibabaw niini. Sa pagkatinuod, ang gugma mao ang kinalig-onang puwersa sa uniberso tungod kay “ang Diyos gugma.”​—1 Juan 4:8.

Ang Pagdumot sa Dili Madugay Mahanaw sa Walay Kataposan

Sanglit dili kini bahin sa personalidad ni Jehova nga Diyos, ang kahakog ug pagdumot dili magpabilin sa walay kataposan. Kini angayang, kinahanglang, kuhaon, aron ilisan sa gugma, nga magpabilin hangtod sa kahangtoran. Kon ang usa ka kalibotan nga walay pagdumot, ug puno sa gugma, mao ang matang sa kalibotan nga imong gipaabot, pasaysaya kanimo ang mga Saksi ni Jehova gikan sa Bibliya sa mga kinahanglanon aron mabuhi nga makakita niana.

Oo, ang matag usa kanato maayong mangutana, ‘Unsang kalidad ang nagdominar sa akong kinabuhi, gugma o pagdumot?’ Kini dili lang kay usa ka makahuloganong pangutana. Ang kasingkasing nga mosunod sa kaaway sa Diyos, usa ka diyos sa pagdumot, dili magdugay. Ang kasingkasing nga mosunod kang Jehova, ang Diyos sa gugma, magpabilin hangtod sa kahangtoran!​—1 Juan 2:15-17.

[Hulagway sa panid 10]

Bisan karong adlaw ang mga tawo makasul-ob sa ilang kaugalingon sa gugma