Pagpanalipod sa Panglawas sa mga Bata

ANG usa ka bag-ong taho sa United Nations Children’s Fund (UNICEF), ang The Progress of Nations, nagpakita ug makahuloganong kauswagan sa kahimtang sa panglawas alang sa mga bata sa daghang nasod. Pinaagi sa duyog nga mga paningkamot sa mga gobyerno ug internasyonal nga mga organisasyon, ang gidaghanon sa nangamatay nga mga bata ubos sa singko anyos mius-os sa daghang nasod. Bisan pa niana, ang The Progress of Nations nagpakita usab nga kada tuig dugang minilyon ka batan-ong mga kinabuhi ang maluwas unta pinaagi sa yano ug baratong mga paagi, ilabina diha sa nagakaugmad nga mga nasod. Ang mga ginikanan niining mga nasora ug bisan diin mahimong makakaplag nga makatabang ang mosunod nga mga sugyot sa taho.

Pagpasuso. “Ang pagpasuso mao ang kinamaayohang posibleng sinugdanan ngadto sa maayong panglawas ug nutrisyon,” mitambag ang taho. Sumala sa World Health Organization (WHO), “kapin sa 1 ka milyong kinabuhi sa masuso ang maluwas unta kon ang tanang bata eksklusibong gipasuso sulod sa mga unang unom ka bulan.” Sanglit ang mga ospital ug mga yunit sa angkanan adunay gamhanang impluwensiya, ang UNICEF ug WHO nagpasiugda ug “inisyatibo nga mahigalaon-sa-bata nga ospital.” Ang ilang tumong mao ang pagpalihok sa mga ospital sa paghatag sa mga inahan sa mga bag-ong natawo ug pagpaluyo ug tukmang tambag maylabot sa pagpasuso.

Pagkahinlo ug hinlong tubig. “Ang nakalas sa sakit mahimong maus-osan pag-ayo pinaagi sa luwas nga tubig, pinaagi sa paggamit ug mga kasilyas, pinaagi sa pagpanghugas sa mga kamot una mohikap ug pagkaon, ug pinaagi sa pagluto ug pagtipig sa pagkaon sa luwas nga paagi,” matod sa taho. Bisan tuod sa daghang komunidad dakong paningkamot ang gikinahanglan sa pagbaton ug igo niana, ang hinlong tubig kinahanglanon sa panglawas sa bata ug sa pamilya.

Nutrisyon. Ang pagsuplemento ug bitamina A makasanta sa kamatayon sa gidaghanon nga tulo ka milyong bata kada tuig, sumala sa taho. Ang solusyon sa suliran mabatonan ug maarangan, kini nag-ingon, ug mahimong matuman pinaagi sa pagpauswag sa mga pagkaon, paghimong sustansiyado sa mga pagkaon, o pag-apod-apod ug mga kapsula sa bitamina A. Ang pag-apod-apod ug tagduha ka cent nga kapsula sa bitamina A matag upat o unom ka bulan ngadto sa mga bata napamatud-an nang epektibo sa mga nasod diin ang kakulang sa bitamina A maoy komon. Gisugyot usab ang mga pagkaon sama sa mga kapayas, mangga, karot, berdeng utanon, ug itlog.

Oral Rehydration Therapy. Ang UNICEF nag-ingon nga katunga sa tinuig nga kamatayon sa bata nga gipahinabo sa kalibang mahimong masanta sa tabang sa barato ug sayon-andamon nga mga sinagol sa hinlong tubig, asin, ug asukar o pinulbos nga bugas.a Ang mga ginikanan angayng mopadayon sa paghatag sa bata ug pagkaon. Sa pagkakaron, ang gibanabana nga usa ka milyong kinabuhi kada tuig naluwas pinaagi niini.

[Footnote]

[Picture Credit Line sa panid 11]

WHO