Aduna ba Gayod Unyay Kalinaw ug Kahilom?
DIHANG gipangutana kon unsay ilang gipangita sa usa ka pagbakasyon sa laing nasod, halos 3 sa matag 4 ka turista sa Britanya mitubag, “Kalinaw ug kahilom.” Apan tungod sa tibuok-yutang problema sa polusyon sa kalangas, daghan ang nagtuo nga ang tinuod nga kalinaw ug kahilom maoy usa na lamang ka handurawan.
Bisan pa sa kusganong pagsulay sa pagpamenos sa polusyon sa kalangas, ikaw tingali mahibulong kon realistikanhon ba ang pagtuo nga aduna gayoy bug-os nga kalamposan. Komosta ang uban nga wala makig-ambit sa imong kabalaka?
Mga Babag nga Buntogon
Dili sayon ang pagpakigsulti sa mga tawong antipatiko, ilabina ang pagpasabot kanila sa imong mga panglantaw. Sa dihang ang banhang mga grupo sa mga tin-edyer nagpundok gawas sa tinukod nga gipuy-an ni Ron, siya mihimog unang lakang nga makighigala kanila. Nahibal-an niya ang ilang mga ngalan. Siya mitabang pa gani sa pag-ayo sa usa sa ilang mga bisikleta. Sukad niadto, siya wala nay problema kanila.
Tagda ang kahimtang ni Marjorie, usa ka nag-inusarang ginikanan nga may tin-edyer nga anak nga babaye, nga nagpuyo sa usa ka apartment nga natung-an sa banhang mga silingan. Ang mga nagpuyo sa itaas walay alpombra sa ilang salog. Busa, nakakaplag si Marjorie nga ang kabanha sa pagroler-eskeyting sa mga bata sa salog, pagpauntol sa bola, o bisan ang paglukso gikan sa katre nakasamok kaniya. Dugang pa, ang ilang inahan tigsul-ob ug taas-ug-tikod nga mga sapatos sa balay. Miduol nga maluloton si Marjorie sa paghangyo sa iyang silingan nga maghilom, apan nakahatag ug kapakyasan ang dili nila pagkasinabot sa pinulongan. Ang magtatambag sa lokal nga munisipyo nagtanyag nga magpadalag tighubad sa pagtabang nga masulbad ang problema, busa nagpaabot ug kalamboan si Marjorie.
Sa silong niya mao ang tawong kusog magpatokar ug musika tali sa alas siyete ug alas otso kada buntag, ang kompas sa baho kusog kaayo. Ang iyang mataktikanhong pagduol sa tawo nagpatunghag tubag nga kinahanglan niya ang iyang musika ‘aron siya ganahan sa iyang trabaho.’ Sa unsang paagi nakasagubang si Marjorie?
“Ako nagpugong-sa-kaugalingon ug nagpailob,” siya miingon. “Usbon nako ang akong programa, ug ako molingkod aron mobasa bisan pa sa kalangas. Akong nakaplagan nga dali akong malinga sa akong libro. Dayon dili na kaayo ako makamatikod sa kalangas.”
Si Heather, sa laing bahin, nagpuyo sa usa ka apartment nga nag-umbaw sa usa ka naytklab, diin, human sa banha kaayong gabii, magsira sa mga alas sayis sa buntag. Bisag sa kapulihay mireklamo siya sa lokal nga mga awtoridad, wala kaayoy nahimo aron mahunong ang kabanha.
Ang Kataposan sa Kalangas?
“Daghang tawo nakakaplag nga ang bug-os nga kahilom hilabihang makapatugaw ug katingad-an,” nag-ingon si Dr. Ross Coles sa Medical Research Council’s Institute of Hearing Research sa Britanya. Ang matahom nga honi sa mga langgam, ang hinayng pagtapya sa mga balod sa balasong lapyahan, ang sadyang mga tig-ik sa mga bata—kini ug ang ubang mga tingog makapahimuot kanato. Bisag sa pagkakaron tingali nangandoy kita ug kahupayan gikan sa kalangas, kita malipay nga mahiuban sa maayong mga kauban nga makigsulti kanato. Ang Diyos nagsaad ug kalinaw ug kahilom alang sa iyang matinumanong mga alagad.
Sa Bibliya ang salmista miingon: “Ang mga maaghop mismo magapanunod sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:11) Ang langitnong Ginghariang kagamhanan sa Diyos sa dili madugay mosalga sa tawhanong mga kalihokan. (Daniel 2:44) Unya, ubos sa pagmando ni Kristo Jesus, aduna unyay “dagayang pakigdait hangtod mawala ang bulan.”—Salmo 72:7; Isaias 9:6, 7.
Ikaw makatino nga ang pagsalga sa Diyos magpalampos sa kalinaw ug kahilom nga gitinguha natong tanan, sama sa gitagna sa manalagna sa Diyos nga si Isaias: “Ang buhat sa tinuod nga pagkamatarong mahimong pakigdait; ug ang mahimo sa tinuod nga pagkamatarong, kahilom ug kasegurohan sa panahong walay kataposan. Ug ang akong katawhan magapuyo . . . sa wala-masamok nga mga dapit-pahulayan.”—Isaias 32:17, 18.
Bisan karon, ikaw makadiskobre sa espirituwal nga kalinaw ug kahilom diha sa mga panagkatigom sa mga Saksi ni Jehova sa imong lugar. Bisag may panahon nga mga tinagpulo ka linibo ang hiusang magkatigom alang sa pagsimba sa dagkong mga kombensiyon—ug kining panag-ubanay sa tinuod ‘may kalangas sa mga lalaki, babaye, ug kabataan’—ang tingog dili makapatugaw kondili makapahimuot. (Miqueas 2:12) Sinatia kini mismo pinaagi sa pagpakigtigom uban sa mga Saksi sa imong lugar o pinaagi sa pagsulat sa usa sa mga adres sa panid 5 niining magasina aron makontak sila. Pahimusli ang tinuod nga kalinaw ug kahilom sa pagpakig-uban kanila karon ug tingali sa walay kataposan.