“Nagakadako nga Kal-ang Tali sa Klero ug Layko”
“SA Amerikanhong ebanghelikal nga mga iglesya adunay nagakadako nga kal-ang tali sa klero ug layko,” matod pa ni Robert K. Johnston, usa ka propesor sa teolohiya ug kultura. Sa Ministerial Formation, usa ka magasin sa World Council of Churches, gihisgotan niya ang pipila ka hinungdan nga nagpahinabo niining panagbulag: Sanglit nagakadaghan ang mga kapit-os sa pamilya, ang mga pastor buot ug mga eskedyul sa trabaho nga susama nianang “hinapos sa semana nga relyebohay sa mga doktor.” Kon ang pastor motrabahog sobrang mga oras, dahomon niya nga balosan sa maong paningkamot. Dugang pa, matod sa propesor, “samtang misamot ang etikal ug legal nga mga kapit-os,” ang teolohikal nga mga seminaryo nagpasidaan sa ilang mga graduwado nga santaon ang mga suliran pinaagi sa pagbaton ug “suod nga mga higala taliwala lamang sa ilang ‘klab’ sa ubang klero” ug pagtratar sa ilang mga parokyano ingong “mga kliyente.” Dili ikatingala, daghang parokyano, sa baylo, nag-isip sa ilang mga pastor ingong sakop sa hataas nga hut-ong sa katilingban nga dili makasabot sa mga panginahanglan ug mga suliran sa aberids nga tigsimba.
Unsang matanga sa pastor ang makapahiktin sa kal-ang? Usa ka pagtuon nga nag-analisar kon nganong ang mga pastor napakyas diha sa ilang ministeryo nakakaplag nga ang mga parokyano wala maglantaw sa akademikong kahibalo ug propesyonal nga mga katakos sa pastor ingong hinungdanon. Ang mga membro sa iglesya wala mangita ug usa ka tawo nga adunay talagsaong intelihensiya, usa ka maayong mamumulong, o batid nga administrador. Labaw sa tanan, buot nila nga ang ilang pastor maoy usa ka “tawo sa Diyos” nga nagabuhat kon unsay iyang ginawali. Kon kulang kanang maong hiyas, matod ni Propesor Johnston, “walay gidaghanon sa impormasyon nga gipasa o katakos nga gipasundayag” ang magsumpay sa kal-ang.
Unsay giingon sa Bibliya nga mga kinahanglanon alang sa usa ka ansiyano diha sa kongregasyon? “Ang magtatan-aw kon mao kinahanglang dili-salawayon, bana sa usa ka asawa, makasaranganon sa batasan, mabuot sa hunahuna, mahusay, maabiabihon, kuwalipikado sa pagpanudlo, dili palahubog nga burokinto, dili tigpangdapat, apan makataronganon, dili palaaway, dili mahigugmaon sa salapi, usa ka tawong nagadumala sa iyang kaugalingong panimalay sa maayong paagi, may mga anak nga nagapasakop uban ang bug-os nga kaugdang . . . Dugang pa, kinahanglan nga siya usab adunay maayong panghimatuod gikan sa mga tawo sa gawas, aron nga siya dili mahulog sa pakaulaw ug sa lit-ag sa Yawa.”—1 Timoteo 3:2-4, 7.