Usa ka Walay-Krimen nga Kalibotan Duol Nang Moabot!
INIGLANTAW nato sa kahimtang sa kalibotan karong adlawa, madayag nga lisod kaayo ang paglikay nga maimpluwesiyahan sa pagbuhat kon unsay daotan. Sa tinuoray, kitang tanan natawong dili hingpit, nga makiling sa pagbuhat sa daotang mga butang. (1 Hari 8:46; Job 14:4; Salmo 51:5) Ug sukad nga si Satanas nga Yawa gipalagpot gikan sa langit, siya labaw pang nagapaningkamot kay sukad masukad sa pagpahinabog kasamok.—Pinadayag 12:7-12.
Ang mga resulta maoy makalilisang. Pananglitan, usa ka pagsurbi sa 4,000 ka bata sa Scotland nagpadayag nga dos-tersiya niadtong tali sa mga edad 11 ug 15 nakahimo nag mga krimen. Ang usa ka surbi sa tibuok Britanya nagpailang halos matag ikatulong tin-edyer dili mabalaka mahitungod sa pagpangawat sa mga baligya. Ug kapig katunga miangkon nga kon sila masobrahan ug sukli, dili nila kana iuli.
Ang Italyanhong libro nga L’occasione e l’uomo ladro (Ang Kahigayonan ug ang Kawatan) naghatag ug katin-awan kon nganong mangawat ang mga tawo. Ang libro nag-ingon nga ang mga kawatan adunay “menos nga pagpugong-sa-kaugalingon” ug sila “dili makaarang sa pagpalangan sa pagpatagbaw.” Ang libro nagdugang nga sa kadaghanang kawatan ang pagpangawat dili maoy ilang pangita apan sila yanong “mga oportunista nga andam nga magpahimulos sa mga situwasyon.”
Makaiikag, ang libro nag-ingon usab kon nganong daghang tawo “molikay sa paglapas sa mga balaod.” Kini mihinapos nga ang katarongan dili tungod kay sila “nahadlok sa legal nga mga silot kondili tungod kay sila adunay moral nga mga prinsipyo nga nagpugong kanila sa pagbuhat niana.” Asa hikat-oni sa mga tawo ang maong tukmang moral nga mga prinsipyo?
Edukasyon nga Gikinahanglan
Buweno, palandonga kon unsay makat-onan gikan sa daghang kanal sa komunikasyon. Pananglitan, ang mensahe nga kasagarang ipasabot sa mga pelikula ug telebisyon mao nga ang kapintasan, panapaw, ug mapasipad-anong panggawi maoy dalawaton. Busa, dili katingad-ang ang mga tawo adunay ubos kaayong sukod sa pagpugong-sa-kaugalingon. Ang Bibliya, sa laing bahin, maalamong nagtudlo: “Siya nga mahinay sa kasuko labi pang maayo kay sa usa ka tawong gamhanan, ug siya nga nagapugong sa iyang espiritu kay sa usang nagbihag sa usa ka siyudad.”—Proverbio 16:32.
Sa pagpalandong sa propaganda karong adlawa, dili katingalahang daghan ang “dili makapalangan sa katagbawan.” Subsob, ang mga tawo makabati: “Pamalit karon ug bayri sa ulahi.” “Mahimong maayo sa imong kaugalingon.” “Takos ka sa labing maayo.” “Atimana ang numero uno.” Ang pagtagbaw-sa-kaugalingon gipadayag ingong normal ug angay. Apan kanang mahunahunaon-sa-kaugalingon nga panghunahuna supak sa pagtulon-an sa Bibliya bahin sa ‘pagtan-aw, dili sa personal nga interes nianang mga butang labot sa inyong kaugalingon lamang, apan usab sa personal nga interes nianang ila sa uban.’—Filipos 2:4.
Dili ka ba mouyon nga ang kadaghanang dili-matinud-anon maoy mga oportunista? Ikasubo, adunay nagkadaghang tawo nga gustong magpahimulos sa mga kahimtang alang sa ila mismong kaayohan. Dili sila mangutana kon ang usa ka tinong buhat matarong sa moral. Ang bugtong nilang gihunahuna mao, ‘Makalingkawas kaha ako sa silot?’
Unsay gikinahanglan? Sumala sa gipahayag sa ibabaw, ang moral nga mga prinsipyo gikinahanglan. Kini mopugong sa mga tawo sa paghimo sa kriminal nga mga buhat, sa dili paglapas sa pagkabalaan sa kinabuhi, dili pagpakabana sa pagkabalaan sa kaminyoon, paglapas sa mga utlanan sa tukmang panggawi, ug sa ubang paagi paglapas sa mga katungod sa uban. Kadtong dili makakat-on sa maong mga prinsipyo, sumala sa giingon sa Bibliya, “nawad-an na sa tanang moral nga pagbati.” (Efeso 4:19) Ang kriminal nga panggawi sa maong mga dili-diyosnon nagpugong sa atong pagtagamtam ug walay-krimen nga kalibotan.
Kon sa Unsang Paagi Moabot ang Usa ka Bag-ong Kalibotan
Hinuon, daghang tawo maningkamot kutob sa ilang labing mahimo nga magmatinud-anon, magtratar sa ilang isigkatawo uban sa pagtahod ug konsiderasyon, ug maglikay sa malapasong mga buhat. Apan pagkainosentehon nga hunahunaong ang tanan sa kalibotan mohimo sa maong paningkamot. Daghan ang dili, ingon nga ang kadaghanan nga nagkinabuhi sa mga adlaw sa matarong nga tawong si Noe walay tinguha nga mobuhat kon unsay matarong. Niadtong kalibotana nga punog kapintasan, si Noe lamang ug iyang pamilya ang milikay sa dili-diyosnong panggawi, sa ingon nakaangkon sa pag-uyon sa Diyos. Pinaagi sa paglaglag sa dili-diyosnon diha sa tibuok-yutang Lunop, ang atong Maglalalang nagpatungha sa usa ka kalibotan nga temporaryong walay krimen.
Hinungdanon nga hinumdoman nga ang asoy sa Bibliya bahin sa Lunop ug pagkalaglag sa dili-diyosnon dili lamang kay makaiikag nga sugilanon. Si Jesu-Kristo mipatin-aw: “Maingon sa nahitabo sa mga adlaw ni Noe, mao man usab unya sa mga adlaw sa Anak sa tawo.” (Lucas 17:26; 2 Pedro 2:5; 3:5-7) Maingon nga ang Diyos naglaglag niadtong mapintasong kalibotan sa wala pa ang Lunop, iyang laglagon usab kining punog-krimen nga kalibotan.
Atong nabatonan ang mosunod nga kamatuoran pinasukad sa kasaligang awtoridad, ingon sa gipahayag sa minahal ni Jesus nga si apostol Juan: “Ang kalibotan mahanaw maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.” (1 Juan 2:17) Ang kalaglagan niining kalibotana mohatag ug dalan alang sa usa ka bag-ong kalibotan diin, ang Bibliya nag-ingon, “[ang Diyos] mopuyo uban [sa katawhan], ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa.”—Pinadayag 21:3, 4.
Sa paghubit kon sa unsang paagi motungha ang maong bag-ong kalibotan, ang Bibliya nag-ingon usab: “Mahitungod sa mga tuman-kadaotan, sila pagaputlon gikan sa yuta mismo; ug mahitungod sa mga maluibon, sila pagalangkaton gikan niini.” (Proverbio 2:22) Kay ang mga matul-id lamang maoy nahibilin sa yuta, kining tagnaa sa Bibliya matuman: “Ang mga maaghop mismo magapanunod sa yuta, ug sila makakaplag gayod sa ilang tumang kalipay sa kadagaya sa pakigdait.”—Salmo 37:11.
Sa bag-ong kalibotan sa Diyos, bisan ang kahayopan mahimong dili na mapintason. Ang Bibliya nagtagna: “Ang lobo mopuyo gayod sa makadiyot uban sa nating karnero, ug ang leopardo mismo molubog uban sa laking kanding, ug ang nating baka ug ang lambungayong nating leyon ug ang pinatambok nga hayop magkauban tanan; ug ang usa lamang ka batang lalaki ang mangulo kanila. . . . Sila dili mohimo sa bisan unsang kadaot o magpahinabog kagun-oban sa tibuok kong balaang bukid; tungod kay ang yuta mapuno gayod sa kahibalo kang Jehova sama sa katubigan nga nagatabon sa dagat mismo.”—Isaias 11:6-9; 65:17; 2 Pedro 3:13.
Ang Bag-ong Kalibotan sa Diyos Haduol Na
Ang maayong balita mao nga ang maong malinawong mga kahimtang duol nang matuman sa tibuok yuta. Nganong makapaneguro kita? Tungod sa gitagna ni Jesus nga mahitabo sa dayon na sa kalaglagan sa kalibotan. Lakip sa ubang mga butang, siya mitagna: “Ang nasod motindog batok nasod ug gingharian batok gingharian, ug aduna unyay mga kakulang sa pagkaon ug mga linog sa nagkalainlaing dapit.” Siya midugang: “Tungod sa pag-uswag sa kalapasan mobugnaw ang gugma sa kadaghanan.”—Mateo 24:7, 12.
Usa ka apostol ni Jesus mitagna usab: “Sa kataposang mga adlaw [niining kalibotana] moabot ang makuyaw nga mga panahong lisod sagubangon. Kay ang mga tawo unya maoy mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, . . . walay pagpugong-sa-kaugalingon, mabangis, walay gugma sa pagkamaayo, . . . mga mahigugmaon sa kalipayan inay nga mga mahigugmaon sa Diyos.” (2 Timoteo 3:1-5) Segurado, kita nagkinabuhi sa “kataposang mga adlaw” niining kalibotana! Busa, sa duol na, pulihan kini sa matarong nga bag-ong kalibotan sa Diyos!
Ang usa ka pagtuon sa Bibliya nakakombinsir sa minilyon nga ang usa ka kalibotan nga walay krimen posible, ug ilang ginadawat ang imbitasyon nga matudloan sa mga dalan sa atong Maglalalang, si Jehova nga Diyos. (Isaias 2:3) Buot ba nimong mokuyog kanila? Andam ka ba nga maningkamot aron maangkon ang kinabuhi diha sa walay-krimen nga bag-ong kalibotan?
Una sa tanan gipakita ni Jesus kon unsay gikinahanglan. Mipatin-aw siya: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” Sa ingon, ang imong walay-kataposang kaayohan nagdepende sa imong pagtuon sa Pulong sa Diyos ug sa pagpadapat kon unsay imong nakat-onan.—Juan 17:3.
[Hulagway sa panid 8, 9]
Ang Bibliya naghubit sa walay-krimen nga bag-ong kalibotan ug nagsugid kon sa unsang paagi atong matagamtam kini