Usa ka Saad nga Ako Gayong Tumanon
SUMALA SA GIASOY NI MARIAN TSIBOULSKI
SA Pebrero 1945, ako usa ka 20-anyos nga sundalo sa kasundalohan sa Sobyet, nga nagpugos sa mga Aleman sa pag-atras gatosan ka milya balik ngadto sa ilang kaugalingong nasod. Adlaw-adlaw nakita nako ang makalilisang nga mga hitabo sa gubat, uban sa kaubanan nga nangamatay sa palibot nako. Nakaabot na kami sa Breslau, Alemanya, karon Wrocław, Polandia. Didto usa ka gabii, napul-an na sa pagpamatay ug pag-antos, misaad ako sa Diyos nga kon tugotan niyang makapauli ako sa balay nga luwas, akong ipahinungod ang akong kinabuhi sa pagbuhat sa iyang kabubut-on.
Tulo ka bulan sa ulahi, ang Alemanya naparot. Human mapagawas sa kasundalohan, sa Disyembre 1945 nagbaktas ako paingon sa Rogizno, usa ka balangay nga duol sa Lvov (karon Lviv), Ukraine, lungsod nga pinuy-anan sa akong amahan. Pagkasunod buntag nahimamat nako ang usa sa mga Saksi ni Jehova ug gihatagan ug bug-os nga pamatuod bahin sa Gingharian sa Diyos. Bisan tuod duna na akoy nahibaloan bahin sa Bibliya ug nakabasa na gani ug pipila ka literatura sa Saksi, ang akong kasingkasing niadtong tungora natandog. Akong naamgohan nga kining maong panagtagbo may kalabotan sa akong saad.
Pagtuman sa Akong Saad
Wala madugay nakatrabaho ako ingong magtutudlo sa tunghaang elementarya. Apan kapig usa ka tuig sa ulahi, sa dihang ang dakodako sa opisina sa edukasyon sa distrito nagmando nga ang mga bata kinahanglang tudloan sa pagkaateyista, ako gipalagpot. Sa ingon-ingong panahon, sa Mayo 1947, misugod ako sa pagpakig-ambit sa buluhatong pagsangyaw uban sa mga Saksi ni Jehova. Ang mga Saksi nagdasig kanako sa pagbalhin sa habagatan ngadto sa lungsod sa Borislav, diin nakakaplag dayon ako ug trabaho isip elektrisyan.
Sa Borislav, nakahimamat ako ug mga tawo nga nanga-Saksi sa katuigang 1930. Daghan sila ug mga publikasyon sa Bibliya, nga gibasa nako pag-ayo, lakip ang mga tomo sa Studies in the Scriptures ug ang kadaghanan sa mga libro nga sinulat ni Joseph F. Rutherford, kanhing presidente sa Watch Tower Society. Gibasa usab nako ang karaang mga kopya sa Ang Bantayanang Torre ug The Golden Age (karon Pagmata!), nga nabatonan sa ubang mga Saksi. Apan ang nakapadayeg nako pag-ayo mao ang hugpong sa mga sulat nga gisulat sa Alemang mga Saksi nga gihukman sa kamatayon ubos sa rehimen ni Hitler. Kining mga sulata gihubad ngadto sa Polako, gimimyograp, ug dayon gihimong pulyeto. Sa ulahi, sa paghinumdom sa integridad niadtong Alemang mga igsoon, nakakaplag ako ug kusog sa paglahutay sa mga pagsulay.
Sa kataposan, sa 1949, nabawtismohan ako diha sa usa sa mga lanaw sa Borislav, sa ingon pormal nga nagtuman sa saad nga moalagad sa Diyos nga akong gihimo sa natad sa panggubatan. Apan karon kini maoy saad nga gipasikad sa tukmang kahibalo.
Nagsugod ang Akong mga Pagsulay
Sa wala madugay napalagpot ako sa akong trabaho. Busa sa Pebrero 1950, mibalhin ako sa haduol nga siyudad sa Stry, diin nakatrabaho na usab ako isip usa ka elektrisyan. Mainiton akong giabiabi sa akong Kristohanong mga igsoon ug gidapit pa gani sa pagdumala sa tinuig nga Memoryal sa paghandom sa kamatayon ni Jesu-Kristo nga gihimo pipila ka semana sa ulahi.
Niining panahona, misamot ang paghagit sa mga Saksi ug ang mga hulga batok kanila. Gisunodsunod kami sa tago sa mga membro sa KGB, ang State Security Committee. Busa nag-amping kami samtang nangandam kami sa posibleng pagpanakop ug pagsukitsukit. Ang pag-awit ug mga awit sa Gingharian diha sa mga tigom nakatabang kanamo sa pagpabiling lig-on sa espirituwal.
Sa Hulyo 3, 1950, gipapirma ako sa Stockholm Appeal, usa ka apelasyon batok sa nukleyar nga mga armamento nga gikatahong gipirmahan sa kapin sa 273,000,000 ka tawo, kadaghanan mga lungsoranon sa Komunistang mga nasod. Sa dihang wala ako mopirma, nga nagsaysay nga ako neyutral sa politika, sa makausa pa gipalagpot ako. Human niining hitaboa ako gidakop, gihusay, ug gihukman nga mabilanggo sulod sa 25 ka tuig diha sa usa ka kampo sa pinugos nga trabaho.
Gikan sa Usa ka Kampo Ngadto sa Laing Kampo
Sa Disyembre 1950, daghan kanamo ang gipasakay sa usa ka bagon nga kargahanan ug baka ug gipadala sa mga 3,000 ka kilometro ang gilay-on ngadto sa usa ka dapit nga duol sa amihanang Ural Mountains, nga dili-bug-os nga nagbahin sa Asianhong Rusya gikan sa Uropanhong Rusya. Didto ako gibilanggo sa lainlaing mga kampo. Mao gihapon bisag asa—hago nga trabaho ug nihit nga pagkaon. Ang duha o tulo ka bulan igo na sa paghimo sa batan-on ug himsog nga mga lalaki nga buhing mga patay. Daghan ang nangamatay. Wala kami mangahas paghanduraw nga makalabang-buhi, ilabina kaming tag-as ug mga sentensiya.
Ang tuig nga wala akoy literatura sa Bibliya ug walay kontak sa ubang mga Saksi maoy labing malisod alang kanako. Ang pagkanahilain maoy grabeng pagsakit. Apan ako napalig-on sa espirituwal sa dihang ang ubang mga piniriso mamati samtang ako makigsulti kanila bahin sa Gingharian sa Diyos. Sa kataposan, ang akong kinasingkasing nga pag-ampo gitubag, ug ako gibalhin sa mga 2,000 kilometros habagatan-silangan ngadto sa dakong pundok sa mga kampo sa bag-ong natukod nga siyudad sa Angarsk, sa sidlakang Siberia. Didto usa ka dakong planta sa kemikal ang gikamulo pagtukod, ug kadaghanan sa trabaho gihimo sa mga piniriso.
Giasayn ako sa Kampo 13, duol sa dapit nga gitukoran. Didto nahibalag dayon nako ang ubang mga Saksi, nga naghatag kanako sa kinabag-ohang mga kopya sa Ang Bantayanang Torre ug sa Informant, ingon sa pagtawag niadto sa Atong Ministeryo sa Gingharian. Pagkadakong espirituwal nga kombira! Apan diin gikan kadtong tanan?
Sa Abril 1951, linibong Saksi sa Ukraine ang gidestiyero sa Siberia, daghan kanila ngadto sa mga dapit nga dili layo sa Angarsk. Kining mga igsoona mikuha ug sekretong naghimog mga kopya sa Ang Bantayanang Torre ug ubang mga publikasyon, ug unya gipayuhot kini ngadto sa mga kampo. Nakakuha usab kami ug Bibliya. Gibahinbahin namo kini, nga among giapod-apod sa matag usa kanamo. Busa, en kasong may morekisa, bahin lamang sa Bibliya ang makuha. Nagdumala pa gani kami ug Pagtuon sa Bantayanang Torre ug Tunghaan sa Teokratikanhong Ministeryo diha sa mga kampo!
Sa ulahing bahin sa 1952, gibalhin ako ngadto sa Kampo 8. Pagkasunod Marso gisaulog namo ang Memoryal diha sa usa ka gamayng lawak diin gitipigan sa mga piniriso ang ilang personal nga mga butang. Dose lamang ang mitambong—3 ka Saksi ug 9 ka interesado. Ang mga awtoridad sa usa ka paagi nakahibalo bahin sa among tigom, ug ako gidestiyero ngadto sa Kampo 12 sa bilanggoan tungod sa pagkahimong gitawag nila nga “usa ka daotag tuyo nga tighulhog sa kasamok.” Lima ka laing mga Saksi, nga gisilotan usab tungod sa ilang pagsangyaw, diha na niining kampoha. Samtang didto, gipugos kami sa pagkalot ug dakong luna sa pundasyon pinaagi lamang sa mga piko ug mga pala.
Daghang binilanggo sa Kampo 12 maoy banggiitan kaayong mga kriminal. Ang mga opisyal dayag nga naghunahuna nga ang pagbutang kanamo uban kanila magpaluya kanamo. Apan naghisgot kami bahin sa Gingharian sa Diyos uban kanila, ug diha sa mga kuwartel nag-awit kami ug mga awit sa Gingharian. Kas-a, pagkahuman namo ug awit, ang pangulo sa kampo natukmod sa pagduol sa usa ka Saksi ug miingon: “Kon dunay mangahas sa paghilabot kanimo, patyon nako siya!” Bisan ang pipila sa mga kriminal nakakat-on sa among mga awit sa Gingharian ug miduyog sa pagkanta!
Sa tungatunga sa 1953, daghang Saksi ang gibalhin ngadto sa Kampo 1 gikan sa ubang mga kampo. Sa sinugdan, diha kamiy 48 ka Saksi sa Kampo 1, apan wala dangtig tulo ka tuig, ang among gidaghanon mitubo ngadto sa 64. Oo, niadtong panahona 16 ang mibarog dapig sa kamatuoran sa Bibliya ug nabawtismohan! Bisan tuod ang mga opisyal sa kampo kanunayng nangitag pamatuod sa relihiyosong kalihokan, nakahimo kami sa among mga tigom ug mga pagbawtismo diha sa kaligoanan sa kampo tungod kay ang nagbantay niana usa ka Saksi.
Kagawasan, ug Usa ka Pamilya
Sa 1956 kadaghanang Saksi diha sa mga kampo gibuhian, sa ingon nagpatibulaag sa mga mensahero sa maayong balita ngadto sa tanang bahin sa dakong teritoryo sa Sobyet. Ang akong 25-tuig nga sentensiya sa bilanggoan gipakubsan ngadto sa 10 ka tuig ug ngadtongadto sa 6 ka tuig ug 6 ka bulan. Busa sa Pebrero 1957, ako usab gipagawas.
Miadto una ako sa Biryusinsk, usa ka lungsod sa Siberia, mga 600 kilometros paamihanan-kasadpan sa Angarsk. Daghang Ukrainianong mga Saksi ang gipalayas ngadto sa maong dapit, ug nalingaw ako sa pagpaambit ug mga kasinatian uban kanila ug pagkahibalo bahin sa kaubang mga Saksi nga pareho namong nailhan. Gikan didto mibalik ako sa Borislav, sa Ukraine, diin nagpuyo ang usa ka Ukrainianong Saksi nga ginganlag Eugenia Bachinskaja. Gipagawas siya sa bilanggoan sa tuig una ako gipagawas.
Si Eugenia maoy lig-ong Saksi nga gihukman ug kamatayon niadtong 1950 tungod sa iyang kalihokang pagsangyaw. Bisan pa niana, human sa 18 ka adlaw diha sa prisohan sa mga patyonon, ang iyang sentensiya gipakubsan ngadto sa 25 ka tuig diha sa linaing kampo. Sa hinapos sa 1957, sa pagbalik nako sa Ukraine, gikasal kami. Human sa among kaminyoon, nagplano kami nga mopuyo sa Borislav, diin ako nabawtismohan siyam ka tuig nga sayo pa. Hinunoa, gitagalan akog 48 ka oras sa pagbiya sa Ukraine!
Mibalhin ako sa Caucasus, sa habagatang Rusya, diin gitagbo ako ni Eugenia sa ulahi. Apan, human sa pagpuyo didto sa usa ka gamayng kamalig sulod sa unom ka bulan, milarga kami paingon sa Biryusinsk aron sa pagduyog sa among gidestiyerong Kristohanong mga igsoong lalaki ug babaye. Dihay mga 500 kanila sa Biryusinsk ug lima ka kongregasyon, ug gitudlo ako isip nagadumalang magtatan-aw sa usa sa mga kongregasyon. Sa 1959 ang among anak nga babaye nga si Oksana natawo, ug si Marianna misunod sa 1960. Sukad sa pagkamasuso sila kanunayng magtambongan sa mga tigom, ug sila nagdako nga naanad sa espirituwal nga mga kalihokan sa kongregasyon sa Siberia.
Ang mga awtoridad sa Siberia medyo matugoton sa among mga kalihokan sa kongregasyon, labing menos kon itandi sa grabeng mga pagdili sa among buluhaton sa Ukraine. Sa gihapon, dili sayon alang sa among tibuok kongregasyon sa pagtigom. Ang mga paglubong nagtagana kanamo ug mga kahigayonan sa pagtigom nga dinaghan. Niining mga okasyona, daghang igsoong lalaki ang mohatag ug matulon-anong mga pakigpulong sa Bibliya. Apan sa dihang ang mga awtoridad nakaamgo kon unsay nagakahitabo, milihok sila. Pananglitan, sa usa ka okasyon, usa ka prosesyon sa paglubong ang gipahunong ug ang lungon gipugos pagdala ngadto sa sementeryo ug gilubong.
Balik sa Ukraine
Sa 1965 mibalik kami sa Ukraine, nga mipuyo sa Kremenchug. Kining siyudara, duolan sa 800 kilometros sidlakan sa Borislav, may 12 lamang ka Saksi. Mipuyo kami didto sulod sa mga lima ka tuig; kinadak-ang bahin sa maong panahon, nag-alagad ako sa mga kongregasyon ingong nagapanawng magtatan-aw. Sa 1969, sa dihang ang among mga anak nga babaye nag-edad ug siyam ug napulo ka tuig, gihangyo kami nga mobalhin sa habagatan sa pagtabang sa mga igsoon sa gamayng lungsod sa Molochansk.
Sa Molochansk gipatawag ako sa KGB alang sa panaghisgot nga gidangtag pipila ka oras. Sa pagkatinuod, gipatawag ako ug kaunom! Panahon sa matag panaghisgot, gisaaran ako ug masanag nga kaugmaon kon akong isalikway ang akong pakiglabot sa “mga Jehovista.” Sa kataposan, ang pailob sa KGB naupos, ug ang laing Saksi ug ako gihukmang mabilanggo ug usa ka tuig.
Human maserbisyohi ang akong sentensiya, sa 1973 mibalhin ako uban sa akong pamilya sa usa ka gamayng balangay duol sa Kremenchug. Tinagotago kaming naghimog Kristohanong mga panagkatigom sa among balay, lakip sa pagsaulog sa Memoryal sa kamatayon ni Kristo, sa 1974. Pagkasunod buntag ang among balay girekisa, ug ako gidakop.
Husay, Kampo sa Pinugos nga Trabaho, ug Pagdestiyero
Ang akong husay wala patambongi sa publiko, ang pagtambong pinaagi sa pagdapit lamang. Ang nanambong maoy dagkong mga opisyal ug mga lider sa komunidad, ang tag-as-ug-posisyon sa katilingban. Mipili akong dili mokuhag abogado ug gihatagan ug 45 minutos sa pagpresentar sa akong kaugalingong depensa. Sa adlaw una sa husay, si Eugenia ug ang among mga anak nga babaye miluhod nga nag-ampo, nga naghangyo, dili nga ako hatagan ug dili-kaayo grabeng sentensiya o pasaylo, kondili lamang nga ang usa ka epektibong pamatuod ikahatag sa Gingharian ug sa balaang ngalan ni Jehova.
Nagpadayon ang husay nga ang huwes nagbasa ug daghang bahin gikan sa mga magasing Bantayanang Torre ug Pagmata! Ang reaksiyon sa mga mamiminaw wala damha sa huwes. Samtang ang mga tawo nakadungog nga kining daotang kalibotan malaglag sa Armagedon ug nga ang Gingharian sa Diyos magmando sa yuta, sila nangalibog—wala makaseguro kon unsay tuohan. Ang huwes sa wala madugay nakaamgo sa iyang sayop, ug panahon sa kataposan nakong mga pangatarongan, misulay siya sa pagpalingkawas sa iyang kaugalingon pinaagi sa pagsigeg salga sa akong presentasyon. Apan, pinaagi sa laktod nga pagbasa gikan sa among mga publikasyon, ang huwes mitabang sa paghatag ug maayong pamatuod, ug ang akong kasingkasing natugob sa pagpasalamat. Bisan pa niana, gisentensiyahan ako ug lima ka tuig sa hago nga trabaho, nga gisundan sa lima ka tuig nga pagkadestiyero.
Gigugol nako ang misunod nga lima ka tuig taliwala sa banggiitang mga kriminal sa halayong amihanan sa Yodva nga kampo sa pinugos nga trabaho sa Komi Autonomous Soviet Socialist Republic. Nianang panahona daghan akog kahigayonan sa paghatag ug pamatuod sa Gingharian ngadto sa mga 1,200 ka piniriso maingon man sa mga tagdumala sa kampo. Human ako buhii niadtong 1979, gidestiyero ako sa Vorkuta, ibabaw sa Arctic Circle. Wala madugay human ako makakita ug trabaho ug usa ka dapit nga kapuy-an sa Vorluta, ang akong pamilya miduyog kanako.
Gidungog nga daghang piniriso ang nangamatay samtang nagtrabaho sa Vorkuta, lakip sa daghang Saksi nga mga binilanggo sa sayosayong mga dekada. Karong adlawa kini maoy ordinaryong siyudad, ug dili na makita bisag asa ang mga kampo sa pinugos nga trabaho. Apan ilawom sa permanenteng yelo sa sulod ug palibot sa siyudad mao ang mga lawas sa daghan kaayong martir nga mitahan sa ilang kinabuhi sa pagdayeg kang Jehova.
Ang Kalipay sa Relihiyosong Kagawasan
Sa 1989 mibiyahe kami gikan sa Vorkuta paingon sa Polandia aron sa pagtambong sa duha ka internasyonal nga kombensiyon sa mga Saksi ni Jehova. Wala kami maulaw sa mga luha sa kalipay nga among gipatulo samtang nagtan-aw kami sa tinagpulo ka libong Kristohanong mga igsoong lalaki ug babaye sa Warsaw ug Katowice nga nagpahimulos ug malipayong panag-ubanay nga walay kahadlok nga dakpon. Usa ka pangandoy ang natinuod. Mibalik kami sa Vorkuta uban ang nabag-ong determinasyon sa pag-alagad sa mga intereses sa Gingharian.
Apan, ang klima ibabaw sa Arctic Circle bugnaw kaayo, ug nadaot ang panglawas ni Eugenia. Busa sa ulahi nianang tuiga mibalik kami sa Kremenchug, diin kami nagmaya sa among pag-alagad kang Jehova uban sa mas dakong kagawasan nga among gipahimuslan karon. Ang among duha ka umagad nga lalaki maoy mga ansiyano sa kongregasyon dinhi sa Ukraine. Ug ang among mga anak nga babaye, bisan tuod nagmatuto ug upat ka anak, maoy mga payunir, ingon sa pagtawag sa bug-os panahong mga ministro.
Matag karon ug unya, mahinumdoman gihapon nako ang natad panggubatan sa 1945 ug ang saad nga akong gihimo kapin sa tunga sa siglo kanhi. Aron matuman nako kini, si Jehova nagtagana kanako ug tukmang kahibalo, ang mao gihapong kahibalo nga nagpaarang sa minilyong uban pa sa paghimo sa mao gihapong saad—ang pag-alagad kang Jehova sa walay kataposan.
[Mapa/Hulagway sa panid 23]
(Alang sa aktuwal nga pagkahan-ay, tan-awa ang publikasyon)
RUSYA
Vorkuta
Lviv
Borislav
UKRAINE
Kremenchug
Molochansk
Caucasus
Biryusinsk
Angarsk
Uban sa among duha ka anak nga babaye, ilang mga bana, ug ilang upat ka anak
[Credit Line]
Mountain High Maps® Copyright © 1997 Digital Wisdom, Inc.