Sa Dihang ang Patay Nagkahulogang Patay

“Ang buhing iro mas maayo kay sa patayng leyon. Kay ang mga buhi nasayod nga sila mangamatay; apan ang mga minatay, sila dili mahibalo sa bisan unsa, ni may balos pa sila, tungod kay ang ilang handomanan nahikalimtan na.”—Ecclesiastes 9:4, 5.

DAGHANG tawo ang dunay lubog nga pagtuo bahin sa usa ka kalag nga magpabiling buhi human sa kamatayon o moagi sa mga siklo sa reinkarnasyon. Ang uban nagtuo gani nga ang usa mahimong mobalik human sa patay nga kahimtang. Si Thomas Lynch, usa ka tighikay sa paglubong, di pa dugay gipangutana kon unsay iyang mga hunahuna sa pangutana bahin sa kinabuhi luyo sa kamatayon. Siya miingon: “Kadtong mga tawo nga nakakitag mga tunel sa kahayag ug uban pa wala mobalik gikan sa mga patay​—sila giisip nga mga patay tungod lamang kay wala kitay katakos sa pagsukod sa hinungdanong mga timailhan nga buhi sila. Tungod kay ‘patay’ ka kon dili ka na mobalik.”​—The New York Times Magazine.

Husto ang giingon sa Bibliya sulod sa mga milenyo. “Ang buhing iro mas maayo kay sa patayng leyon. Kay ang mga buhi nasayod nga sila mangamatay; apan ang mga minatay, sila dili mahibalo sa bisan unsa, ni may balos pa sila, tungod kay ang ilang handomanan nahikalimtan na.” (Ecclesiastes 9:​4, 5) Ang mubong pagduaw sa bisan unsang karaang lubnganan sa dili madugay magpamatuod sa maong kamatuoran.

Nagkahulogan ba kana nga wala gayoy paglaom alang sa mga patay? Ang Bibliya wala gayod maghatag ug pasikaranan nga tuohan ang usa ka dili-mamatay nga kalag nga magpabiling-buhi human mamatay. (Genesis 2:​7; Ezequiel 18:​4, 20) Bisan pa niana, si Jesu-Kristo nagwali bahin sa pagkabanhaw ngadto sa kinabuhi diha sa usa ka napasig-uling paraiso sa yuta. Ang iyang Hudiyong sumusunod nga si Marta, kansang igsoong lalaki, nga si Lazaro, bag-o pang namatay, nagtuo sa pagkabanhaw, kay siya miingon bahin kang Lazaro: “Ako nahibalo nga siya mobangon diha sa pagkabanhaw sa kataposan nga adlaw.” (Juan 11:24) Niini, si Jesus mitubag: “Ako ang pagkabanhaw ug ang kinabuhi. Siya nga nagapasundayag ug pagtuo kanako, bisan pa siya mamatay, makadangat sa kinabuhi; ug ang matag usa nga buhi ug nagapasundayag ug pagtuo kanako dili gayod bisan kanus-a mamatay. Nagatuo ka ba niini?” (Juan 11:​25, 26) Sayo pa niana, siya miingon: “Ayaw kahibulong niini, tungod kay ang takna nagasingabot diin kadtong tanan nga anaa sa handomanang mga lubnganan makadungog sa iyang tingog ug managpanggula, kadtong mga nagbuhat ug maayong mga butang ngadto sa pagkabanhaw sa kinabuhi, kadtong mga nagbuhat ug ngil-ad nga mga butang ngadto sa pagkabanhaw sa paghukom.” Apan matikdi, si Jesus wala maghisgot bahin sa usa ka dili-mamatay nga kalag!​—Juan 5:​28, 29; Lucas 23:43.

[Blurb sa panid 31]

“‘Patay’ ka kon dili ka na mobalik.” Thomas Lynch, tighikay sa paglubong