Dili na Monganga!
SULOD sa duolan sa walo ka dekada, ang Pagmata! nakatabang sa iyang mga magbabasa sa pagsagubang sa adlaw-adlawng mga suliran. Usahay, kini makapaigmat nila sa bag-ong mga panghitabo ug mga tinamdan diha sa medikal nga natad, nga makaapektar pag-ayo sa ilang mga kinabuhi, sumala sa gipadayag sa mosunod nga estorya.
Si Matthew natawo niadtong 1989 sa amihanan sa Inglaterra. Hangtod sa dos anyos nga edad, normal siya nga batang lalaki. Dayon, kalit lang, samtang nagbakasyon, nakaagom siyag grabeng pagnganga.
“Ang akong bana ug ako mikonsulta sa lokal namong yunit sa terapiya sa pagsulti,” saysay ni Margaret, iyang inahan, “ug kami gisultihang walay mahimo alang kaniya hangtod nga siya mag-siyete anyos ang edad kay hangtod nianang edara, ang mga bata dili makakontrolar sa ilang kuwerdas bokales. Apan sa dihang si Matthew nag-eskuyla na, siya nalisdan pagsagubang sa mga pagyagayaga sa ubang mga bata, ug ang iyang pagnganga migrabe. Dili siya gustong makig-uban sa panon ug nahimong tigpalain. Bisan ang pagtambong sa mga tigom sa Kingdom Hall nahimong lisod nga buluhaton.
“Unya, among nakit-an ang ‘Paglaom Alang sa mga Nganga,’ diha sa ‘Pagpaniid sa Kalibotan,’ sa Abril 8, 1995, nga isyu sa Pagmata! Kadto nagsaysay sa mubo sa trabaho sa usa ka pundok sa mga terapista sa pagsulti sa Sydney, Australia, kinsa nagmalamposon sa pagtambal sa pagkanganga sa mga bata.
“Misulat kami ngadto sa University of Sydney ug nakadawat ug malumong tubag gikan ni Dr. Mark Onslow, nga misugyot nga amo siyang kontakon pinaagig telepono. Kay kami nagpuyo man sa pikas nga bahin sa kalibotan, ang iyang pundok sa mga terapista sa pagsulti mihukom nga sulayan ang ‘long distance nga pagtambal.’ Kami, ingong mga ginikanan ni Matthew, gitudloan sa teknik sa pundok pinaagig telepono, fax, ug audiotape. Ang terapiya gipasibo sa personal nga mga panginahanglan ni Matthew. Ako molingkod kauban niya ug sa relaks, dili-pormal nga paagi motabang kaniya pinaagig personal nga tabang sa pagtul-id sa mga pulong nga malisdan siya paglitok. Ako nagdayeg pag-ayo kaniya ug naghatag ug ginagmayng mga ganti alang sa ‘larinong’ pagsulti.
“Unom ka bulan sa ulahi si Matthew dili na maulawon, nga tigpalain, kondili normal, malipayon, makighugoyon nga bata. Siya karon motubag panahon sa mga tigom sa kongregasyon ug malipay kaayong mohimo sa mga pagbasa sa Bibliya sa Kingdom Hall. Siya usab may bililhong bahin sa balay-balay nga pagsangyaw. Ang iyang pagsulti normal na!
“Dako kaayo ang among pasalamat alang niadtong tipik nga balita sa Pagmata!, nga nagbag-o sa kinabuhi sa among anak!”—Tinampo.