Duha ka Bahin sa Usa ka Katalagman
Sinulat sa koresponsal sa Pagmata! sa Mexico
SI Godofredo ug Gisela, usa ka magtiayong Saksi ni Jehova, ug ang ilang gagmayng mga anak diha sa sulod sa balay nga hinimo sa aspaltadong tabla sa dihang ang Urakan (Hurricane) nga Pauline mihapak sa baybayon sa Oaxaca, Mexico. Sa tinagsatagsa, gipanglangkat sa hangin ang mga palid sa tabla. Sa kataposan, sa dihang bahin na lang sa gambalay ang nagpabilin, wala nay kapasilongan ang pamilya.
Samtang nagkugos si Gisela sa walo-ka-bulang bata ug ang ubang tulo ka bata nagkupot kaniya ug kang Godofredo, nakigbisog sila sa unos sulod sa kapin sa duha ka oras. Usahay, ang puwersa sa urakan magpukling kanila ug magpaligid kanila sa salog. Sa kataposan, silang tanan nakalabang-buhi.
Sa Acapulco, sa dihang usa sa mga Saksi ni Jehova nga ginganlag Nelly nakakita sa tubig nga misulod na sa balay, gipukaw niya ang iyang pamilya. Ang gitas-on sa tubig kusog kaayong mitubo, ug ang puwersa sa sulog nagbutad kang Nelly sa ilalom, apan ang iyang anak nga babaye nagbitad kaniya paibabaw. Mikupot sila sa rehas sa bentana ug nagtan-aw nga walay mahimo samtang ang tubig mitubo hangtod sa ilang liog. Unya nadungog nila ang tingog sa usa ka lalaki nga nanawag kanila. Ang ila kadtong silingan; gitabangan niya sila nga makagula ug gidala sila sa iyang balay. Gikan didto, nalisang silang nagtan-aw samtang ang usa ka sakyanan bug-os nga nagbungkag sa balay nga gigikanan nila pipila ka minutos ang miagi.
Sa hapon sa Miyerkoles, Oktubre 8, 1997, ang Urakan nga Pauline mikusokuso sa baybayon sa estado sa Oaxaca uban sa hangin nga kapin sa 200 kilometros kada oras. Unya, sa Huwebes, Oktubre 9, sa kadlawon, ang urakan nagpayhag sa estado sa Guerrero, ilabina sa siyudad sa Acapulco, nga nagkutaw sa mga balod nga miabot ug 10 metros ang gihabogon ug nagpatunghag mga baha nga nagbanlas sa mga balay, mga sakyanan, mga hayop, ug mga tawo. Sa pagbalhin sa bagyo, dihay mga gahong nga kapin sa 10 metros ang giladmon sa dapit nga nahimutangan sa mga karsada kaniadto. Sumala sa mantalaang The News, ang Red Cross sa Mexico naghatag ug tiningob nga kalkulasyon nga labing menos 400 ang nangamatay ug 20,000 ngadto sa 25,000 ang walay-pinuy-anan diha sa duha ka estado. Bisan pa niana, taliwala sa katalagman, dihay makapatandog nga mga pasundayag sa Kristohanong gugma.
Misanong ang Katawhan ni Jehova
Sa dihang nahibaloan ang balita mahitungod sa Urakan nga Pauline, ang sangang buhatan sa mga Saksi ni Jehova sa Mexico nagsugod sa pagkadawat ug mga tawag gikan sa mga Saksi sa tibuok nasod nga gustong masayod kon unsay ilang mahimo aron makatabang. Ang tabang gitanyag usab gikan sa gawas sa nasod. Wala madugay usa ka komite sa hinabang ang giporma, ug tinoneladang pagkaon, sapot, ug ubang mga butang ang gipang-apod-apod.
Dugang pa, namalit ug mga materyales sa pagpanukod, ug nagsugod dayon ang buluhatong pagpang-ayo diha sa 360 ka balay ug daghang Kingdom Hall nga nangadaot o nangaguba. Linibong Kristohanong mga igsoong lalaki ug babaye ang puliki nga nag-amot, nagklaseklase, nag-empake, nanghakot, ug nanghatod ug mga hinabang o nag-ayo sa mga guba.
Ang pipila ka tag-iyag tindahan nakadayeg kaayo sa kalihokan sa mga Saksi nga sila malulotong nag-amot ug pagkaon, mga materyales sa pagpanukod, ug ubang mga butang. Ang uban nagbaligya kanila ug mga butang nga gimenosan ang presyo. Ang mga Saksi nga naapektahan natandog pag-ayo sa gugma nga gipakita kanila, ilabina sa dihang nabasa nila ang makapadasig nga mga sulat nga gilakip diha sa mga suplay.
Ikasubo, si José Faustino—usa ka 18-anyos nga Saksi—ug tulo ka tawo nga nagtuon sa Bibliya uban sa mga Saksi gipatay sa urakan. Ang ilang mga paryente, ilabina ang mga ginikanan ni José, nag-apresyar sa mga pag-ampo alang kanila ug sa pagdasig nga gihatag kanila sa kongregasyon.
Pipila ka Positibong mga Resulta
Human sa Urakan nga Pauline daghang tawo ang mihangyong magpatuon sa Bibliya, lakip ang dili-magtutuong mga paryente sa mga Saksi, ug daghang silingan ang mas andam nang mamati sa mensahe sa paglaom sa mga Saksi. Lain pa, ang mga Saksi nakig-ambit sa katibuk-ang pag-apod-apod sa hinabang nga pagkaon. Sa usa ka kaso, sa dihang ang usa ka Saksi nangutana sa usa ka lalaki kon nganong gipili niya ang mga Saksi ni Jehova nga maoy moapod-apod sa pagkaon nga giamot sa iyang kompaniya, ang tawo mitubag: “Tungod kay ako nahibalo nga kamong mga tawhana organisado ug matinud-anon. Gawas pa, nasayod gayod kamo kon kinsay nanginahanglan pag-ayo niining maong tabang, tungod kay nakaila kamo sa mga tawo sa inyong teritoryo.”
Samtang nagkaduol ang kataposan ug dunay nagkadaghang mga katalagman sa tibuok-kalibotan, makadasig kanunay ang pagkakita nga ginasunod ang mga prinsipyo sa Bibliya, bisan atubangan sa kalisdanan.
[Hulagway sa panid 26]
Ang mga batan-on mitabang sa pagpanukod pag-usab
[Hulagway sa panid 27]
Ang mga Saksi nagtukod ug usa ka bag-ong Kingdom Hall sa Oaxaca human sa Urakan nga Pauline