Mga Batan-on Nangutana . . .

Sa Unsang Paagi Akong Mahimo ang Kamatuoran nga Ako Na?

“Gimatuto ako ingong usa sa mga Saksi ni Jehova, ug kanunay nakong gibati nga kon gipadako ka nianang paagiha, nailhan gayod nimo si Jehova. Nasayop diay ako!”​—Antoinette.

“UNSA may kamatuoran?” Si Poncio Pilato, ang tawong mitugyan kang Jesus aron patyon, misukna nianang gibantog nga pangutana. (Juan 18:38) Hinunoa, klaro nga gituyo ni Pilato ang iyang matahapong pangutana sa pagtapos​—dili pagbukas​—sa prangkang panaghisgot. Dili gayod siya interesado sa “kamatuoran.” Apan komosta ka? Interesado ka ba sa kamatuoran?

Ang mga pilosopo namalandong kon unsa ang kamatuoran sulod sa daghang siglo, nga sa makauulaw dunay gamayng ipakita sa ilang mga paningkamot. Hinunoa, mahimo nimong makaplagan ang tubag sa pangutana ni Pilato. Si Jesu-Kristo nagtudlo nga ang Pulong sa Diyos maoy kamatuoran. Siya usab misulti labot sa iyang kaugalingon ingong “ang kamatuoran.” Ug si apostol Juan misulat: ‘Ang kamatuoran naanaa pinaagi kang Jesus.’ (Juan 1:17; 14:6; 17:17) Ang kinatibuk-an sa Kristohanong mga pagtulon-an, nga sa ulahi nahimong bahin sa Bibliya, matawag usab nga “kamatuoran” o “kamatuoran sa maayong balita.” (Tito 1:14; Galacia 2:14; 2 Juan 1, 2) Kining Kristohanong mga pagtulon-an gilangkoban sa mga butang sama sa personal nga ngalan sa Diyos, ang pagkatukod sa Gingharian sa Diyos, ang pagkabanhaw, ug ang lukat ni Jesus.​—Salmo 83:18; Mateo 6:9, 10; 20:28; Juan 5:28, 29.

Linibo sa mga batan-on ang natudloan sa kamatuoran sa Bibliya pinaagi sa Kristohanong mga ginikanan. Apan nagkahulogan ba kini nga ang maong mga batan-on ‘nagalakaw diha sa kamatuoran’? (3 Juan 3, 4) Dili kanunay. Pananglitan, ang 20-anyos nga si Jennifer gimatuto ingong usa sa mga Saksi ni Jehova. Siya nahinumdom: “Dad-on ako sa akong inahan sa mga kombensiyon sa Saksi ug nagpasabot nga angay na akong maghunahuna sa pagpabawtismo. Apan naghunahuna ko sa akong kaugalingon, ‘Dili gayod ko buot nga mahimong Saksi. Gusto ko lang nga malingaw!’”

Ang pipila ka batan-on nagatuo sa gitudlo kanila, apan wala nila maugmad ang lawom nga pagsabot kon unsa gayoy ginatudlo sa Bibliya. Ang kapeligrohan? Si Jesus nagpasidaan nga ang ubang indibiduwal ‘walay gamot diha sa ilang kaugalingon.’ Ang maong mga indibiduwal tingalig ‘mopabilin sulod sa usa ka panahon; unya sa gilayon pagkahitabo na sa kasakitan o sa paglutos tungod sa pulong, sila mangapandol.’ (Marcos 4:17) Ang uban makapatin-aw sa ilang binase-sa-Bibliyang mga tinuohan sa usa ka sukod, apan wala nila mailhi ang Diyos sa personal nga paagi. Matod pa sa batan-ong babaye nga ginganlag Aneesa: “Wala ko magtuo nga duna koy tinuod nga relasyon kang Jehova niadtong batabata pa ako . . . Morag bug-os kining nagdepende sa relasyon sa akong mga ginikanan kaniya.”

Unsa may imong kahimtang maylabot niini? Si Jehova Diyos ba lamang sa imong mga ginikanan? O, sama sa salmista sa Bibliya, makaingon ka bang: “Diha kanimo ginatugyan ko ang akong pagsalig, Oh Jehova. Nag-ingon ako: ‘Ikaw ang akong Diyos’”? (Salmo 31:14) Nagkinahanglan tingali ug kaisog sa pag-atubang sa mga kamatuoran. Usa ka batan-ong lalaki nga ginganlag Alexander nag-ingon: “Para nako, ang matinud-anong pagsusi-sa-kaugalingon maoy unang lakang.” Human makahimog mga pagtugkad-sa-kalag, makaamgo ka tingali nga wala gayod nimo mapamatud-i ang kamatuoran (ang kinatibuk-an sa Kristohanong mga pagtulon-an) sa imong kaugalingon. Tingalig kulang kag lig-ong pagtuo, ug busa ang imong kinabuhi morag walay tumong, walay tinuod nga direksiyon.

Sa ilang Kristohanong mga tigom, ang mga Saksi ni Jehova kanunayng moawit ug awit nga may ulohang “Himoa ang Kamatuoran nga Imo Na.”a Kanang tambaga tingalig nahiangay kanimo. Apan unsaon nimo paghimo sa ingon? Asa ka magsugod?

Pamatud-i Kini sa Imong Kaugalingon

Sa Roma 12:2, atong makaplagan ang tambag ni apostol Pablo: ‘Pamatud-i sa inyong kaugalingon ang maayo ug dalawaton ug hingpit nga kabubut-on sa Diyos.’ Unsaon man nimo pagbuhat kana? Pinaagi sa pagbaton “sa tukmang kahibalo sa kamatuoran.” (Tito 1:1) Ang karaang mga molupyo sa siyudad sa Berea wala modawat sa mga butang nga ilang nadunggan sa walay pagpangutana. Sa kasukwahi, sila “sa adlaw-adlaw maampingong nagausisa sa mga Kasulatan kon tinuod ba kining mga butanga [nga ilang ginatun-an].”​—Buhat 17:11.

Ang usa ka batan-ong Kristohanon nga ginganlag Erin nakakita sa panginahanglan nga himoon ang ingon sa iyang kaugalingon. Siya nakahinumdom: “Naghimo akog panukiduki. Akong gisukna ang akong kaugalingon, ‘Unsaon nako paghibalo nga mao kini ang hustong relihiyon? Unsaon nako paghibalo nga dunay Diyos nga ginganlag Jehova?’” Nganong dili sugdan ang imong kaugalingong personal nga programa sa pagtuon? Mahimo kang makasugod sa binase-sa-Bibliyang libro nga Kahibalo nga Motultol sa Kinabuhing Walay Kataposan.b Basaha kini sa maampingong paagi. Basaha ang tanang gisitar nga mga teksto sa Kasulatan ug matikdi kon sa unsang paagi kini nalangkit sa kon unsay gipahayag. Tingalig mahibulong ka sa pagkakaplag kon unsa ka lahi ang imong pagbati bahin sa kamatuoran sa dihang ikaw mahimong “usa ka mamumuo nga walay angay ikaulaw, nga sa husto nagagamit sa pulong sa kamatuoran”!​—2 Timoteo 2:15.

Si apostol Pedro miingon nga ang pipila ka butang sa Bibliya “lisod sabton,” ug makaplagan nimo kini nga matuod. (2 Pedro 3:16) Apan ang espiritu sa Diyos makatabang kanimo sa pagsabot bisan sa lisod nga mga topiko. (1 Corinto 2:11, 12) Mag-ampo alang sa tabang sa Diyos kon ikaw adunay mga problema sa pagsabot sa usa ka butang. (Salmo 119: 10, 11, 27) Sulayi ang paghimog dugang nga panukiduki sa mga publikasyon sa Sosyedad sa Watchtower. Kon dili ka segurado kon unsaon paghimo kana, pangayog tabang. Ang imong mga ginikanan o tingali ang ubang hamtong nga mga membro sa Kristohanong kongregasyon makaabag kanimo.

Hinumdomi, wala ka magtuon aron padayegon ang uban sa imong kahibalo. Ang usa ka batan-ong ginganlag Collin nag-ingon: “Makakat-on ka sa mga hiyas ni Jehova.” Gahinig panahon ang pagpamalandong sa imong gibasa aron motuhop kini diha sa imong kasingkasing.​—Salmo 1:2, 3.

Ang pagpakig-uban sa kongregasyon diha sa Kristohanong mga tigom makatabang usab kanimo. Kon buot sabton, ingon sa gisulat ni apostol Pablo, ang kongregasyon maoy “usa ka haligi ug tukod sa kamatuoran.” (1 Timoteo 3:15) Ang pipila ka batan-on nagreklamo nga makalaay ang Kristohanong mga tigom. “Apan kon wala ka mangandam alang sa mga tigom,” nagpahinumdom ang batan-ong si Collin, “nan wala ka kaayoy makuhang kaayohan gikan niana.” Busa mangandam sa imong mga leksiyon nga abante. Ang mga tigom mas labaw pang makaiikag kon ikaw usa ka entrante​—dili lamang usa ka tumatan-aw.

Puliki Kaayo Aron Magtuon?

Tinuod, tungod sa tanan nimong trabaho sa eskuylahan ug mga buluhaton sa panimalay, ang pagpangitag panahon aron magtuon mahimong malisod. Ang usa ka batan-ong ginganlag Susan misulat: “Sa daghang tuig nakigbisog ako nga nasayod nga kinahanglan akong mangandam para sa mga tigom ug maghimog personal nga pagtuon, apan wala ko gayod kini mahimo.”

Nakakat-on si Susan sa ‘pagpalit sa panahon’ gikan sa dili kaayo hinungdanong mga pangagpas. (Efeso 5:15, 16) Una, naghimo siyag listahan sa tanang butang nga kinahanglan niyang tun-an. Dayon, nag-eskedyul siyag panahon sa pagtuon niini. Apan iya usab nga gilakip ang pipila ka oras para sa lulinghayaw diha sa iyang eskedyul. Siya nagtambag: “Ayaw butangig eskedyul ang matag libreng panahon. Kitang tanan nanginahanglan ug panahon sa pagrelaks.” Ang pagbaton ug eskedyul lagmit nga epektibo usab kanimo.

Ipaambit ang Imong Nakat-onan

Ang paggamit sa imong nakat-onan ilabinang makatabang sa paghimo niini nga bahin nimo. Sulaying magtudlo sa laing tawo. Ang salmista nag-ingon: “Ang akong kaugalingong baba magasulti sa mga butang sa kaalam, ug ang pagpamalandong sa akong kasingkasing maoy mga butang sa salabotan.”​—Salmo 49:3.

Kon wala nimo ikaulaw ang maayong balita, dili ka magpanukong ipaambit kini sa imong mga kauban sa eskuylahan ug sa uban pang imong mahibalag. (Roma 1:16) Pinaagi sa pagpahimulos sa maong mga higayon sa pagsulti sa kamatuoran ngadto sa uban, imong magamit ang imong nakat-onan; ug niining paagiha imong mapatisok ang kamatuoran diha sa imong kaugalingong hunahuna ug kasingkasing.

Pagbantay sa Imong mga Kauban

Ang pipila ka Kristohanon sa unang siglo nakahimog maayong espirituwal nga pag-uswag. Apan sa wala madugay si apostol Pablo kinahanglang mosulat kanila, nga nangutana: “Kinsa ang nagbabag kaninyo sa pagpadayon sa pagsunod sa kamatuoran?” (Galacia 5:7) Ang susamang butang nahitabo sa batan-ong ginganlag Alex. Siya mitug-an nga ang iyang mga paningkamot sa pagtuon sa Pulong sa Diyos gipahuyang tungod sa iyang “pagkuyogkuyog sa daotang mga kauban.” Alang sa imong espirituwal nga pag-uswag, ikaw tingali kinahanglan usab nga mohimog pipila ka kausaban niining bahina.

Sa kasukwahi, ang maayong mga kauban makatabang gayod kanimo nga mouswag. Ang Proverbio 27:17 nag-ingon: “Pinaagi sa puthaw, ang puthaw mismo mahait. Ingon man ang usa ka tawo magapahait sa dagway sa lain.” Pangitag maayong mga sumbanan​—mga tawo nga nagapadapat sa kamatuoran diha sa ilang kaugalingong mga kinabuhi. Dili ka na tingali kinahanglang mangita sa gawas sa imong kaugalingong panimalay. Ang batan-ong si Jennifer nakahinumdom: “Si Lolo mao ang akong labing maayong panig-ingnan. Kanunay siyang naggahin ug tulo ka oras sa pagpangandam para sa among pagtuon sa Bibliya sa kongregasyon ma-Dominggo. Iyang basahon ang kada teksto sa leksiyon diha sa nagkadaiyang mga hubad sa Bibliya ug susihon ang mga pulong diha sa iyang diksiyonaryo. Eksperto siya sa wala-kaayo-mahibaloing mga kamatuoran gikan sa Bibliya. Makapangutana kag bisan unsa kaniya, ug makaplagan niya ang tubag.”

Kon himoon nimo ang kamatuoran nga imo nang kaugalingon, ikaw makaangkon ug usa ka bililhong kabtangan​—usa ka butang nga dili nimo ibaylo sa bisan unsang bili. Busa ayaw gayod isipa ang kamatuoran ingon lamang nga “relihiyon sa akong mga ginikanan.” Ang imong pagtuo angayng sama sa iyaha sa salmista nga nag-ingon: “Kon ugaling ang akong kaugalingong amahan ug akong inahan magabiya kanako, bisan si Jehova mismo magadawat kanako.” (Salmo 27:10) Pinaagi gayod sa paghibalo kon unsay ginatudlo sa Bibliya, pagtuo niini, pagpaambit sa imong mga tinuohan ngadto sa uban ug, labaw sa tanan, pagkinabuhi uyon niining maong mga tinuohan, imong mapasundayag nga imong gihimo ang kamatuoran nga imo na.

[Mga footnote]

[Hulagway sa panid 13]

Pamatud-i ang kamatuoran sa imong kaugalingon pinaagi sa paghimo sa imong kaugalingong panukiduki ug personal nga pagtuon