Delingkuwenteng mga Tin-edyer—Ang mga Hinungdan?
NAGPABILIN ka ba sa naandang opinyon nga ang mga delingkuwenteng batan-on kasagaran naggikan sa kabos nga mga pamilya ug nga ang mga bata nga gikan sa “tinamod” nga mga pamilya talagsa rang mohimog krimen? Alang sa pipila ka tawo sa Asia ang mga kamatuoran morag nagsuportar sa maong opinyon. “Dili na kini tinuod,” nagtaho ang Asia Magazine. “Ang mga estadistika sa kapolisan ug ang mga estorya sa kaso libot sa Asia nagpakita nga dugang ug dugang mga tin-edyer nga gikan sa tinamod nga mga panimalay ang mangawat, mangguba, mogamit ug mga droga ug modangop sa prostitusyon.”
Pananglitan, sa Hapon katunga sa tanang tin-edyer nga gisumbong sa dakong krimen naggikan sa kasarangang matang sa pamilya nga gigikanan. Ang kahimtang sa Bangkok maoy susama. “Kaniadto,” nag-ingon si Adisai Ahapanun, pangulo sa Muhita Training School, “ang krimen sa tin-edyer kadaghanan giaghat sa kakulang ug salapi. Karong adlawa, kapin sa 50 porsiyento sa mga tin-edyer dinhi maoy gikan sa mga panimalay nga may kasarangang kita nga walay kalisdanan sa panalapi.”
Gipasangil sa pipila ang kahimtang diha sa nagtrabahong mga inahan, pagsulbong sa gidaghanon sa diborsiyo, ug sa materyalistikanhong panglantaw sa kinabuhi. Nag-ingon si Eddie Jacob, luyoluyong direktor sa sentro sa rehabilitasyon alang sa mga tin-edyer sa Singapore: “Ang lintunganay mao ang gubot nga mga panimalay—diin ang mga ginikanan basin nagdiborsiyo, o diin kamo adunay nag-inusarang mga ginikanan, o diin ang mga ginikanan parehong nagtrabaho ug ang mga bata napasagdan. Ang mga bata nakakat-on sa ilang mga prinsipyo gikan sa balay.”
Gitagna sa Bibliya nga ang atong kapanahonan pagatiman-an sa nagauswag nga pagkamasukihon taliwala sa mga batan-on. (2 Timoteo 3:1, 2) Bisan pa niana, kanang samang basahona makahatag sa mga pamilya sa mga prinsipyo nga ilang gikinahanglan sa pagpabiling suod, bisan pag unsay ilang kahimtang sa ekonomiya. Ang Bibliya takos sa pagsusi, kay ang “tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong.” (2 Timoteo 3:16) Ang mga Saksi ni Jehova sa Asia—sa pagkatinuod, sa tibuok kalibotan—nakakaplag ug mga ganti sa pagtuon sa Bibliya ingong mga pamilya. Malipay sila sa pagtabang kanimo nga buhaton ang sama.
[Mga hulagway sa panid 31]
Anaa kanimo ang pagpili—pagkahimong delingkuwente o pag-uyon sa Diyos