Gibangon sa Hudisyal nga Hunta sa Rusya ang Dungog sa mga Saksi ni Jehova

IKALIPAY sa mga Saksi ni Jehova ang mga taho bahin kanila sa palaumagian sa balita kon ang maong mga taho hustong pagkasulat. Dugang pa, ang mga Saksi ni Jehova andam mopadayag sa tinuod nga impormasyon mahitungod kanila ug sa ilang relihiyosong mga pagtulon-an ug mga kalihokan. Ugaling, kon ipatik ang sayop o butangbutang nga mga artikulo mahitungod kanila, may mga panahong moapelar ang mga Saksi sa mga awtoridad sa kagamhanan sa pagdepensa sa ilang relihiyoso ug sibil nga mga katungod. Tagda ang dili pa dugayng pananglitan.

Niadtong Agosto 1, 1997, sa rehiyonal nga pasukip niini sa St. Petersburg, ang Komsomolskaya pravda, usa ka popular nga mantalaan sa Rusya, nagpatik ug usa ka artikulo nga naghatag ug sayop kaayong impormasyon bahin sa mga Saksi ni Jehova. Diha sa artikulo, nga nag-ulohang “Sekta sa Petersburg. Aduna Unyay Siyudad-Templo Dinhi,” ang awtor, si Oleg Zasorin, nangangkon nga ang mga Saksi ni Jehova makahatag ug kadaot tungod sa ilang mga pagtulon-an ug nga ang ilang mga kalihokan nagalapas sa Konstitusyon sa Rusya. Ang mga pag-atake pulos pagtuis sa pinasukad-sa-Bibliya nga mga pagtulon-an sa mga Saksi bahin, pananglitan, sa mga pag-abonog dugo ug mga relasyon sa pamilya. Dugang pa, ang artikulo naghingalan sa mga Saksi ni Jehova nga usa ka “sekta,” nga nangangkon nga sila, sa panan-aw sa uban, “ang labing makuyaw sa tanang sekta.”

Ang Administrative Center of the Regional Religious Organization of Jehovah’s Witnesses sa Rusya miapelar sa Russian Federation Presidential Judicial Chamber for Media Disputes nga naghangyo nga ilang susihon ang mga pahayag nga gihimo sa artikulo, nga gilantaw sa mga Saksi ni Jehova ingong malimbongon. Diha sa sesyon sa Hudisyal nga Hunta sa Pebrero 12, 1998, ang mga hawas sa mga Saksi ni Jehova didto niadtong tungora ug gitubag ang daghang pangutana nga gipatugbaw sa mga membro sa hunta, maingon man sa mga magsusulat ug mga abogado. Aron matino kon unsa gayoy gituohan ug gitudlo sa mga Saksi ni Jehova, mainampingong gisusi sa mga membro sa Hudisyal nga Hunta ang literatura nga gipatik sa mga Saksi ni Jehova, ilabina ang librong Ang Sekreto sa Kalipay sa Pamilya.

Si V. V. Borshchyov, diputado sa State Duma of the Russian Federation, miingon nga ang ideya bahin sa “mga sekta” negatibo gayod ug kahulogan. Si G. Borshchyov miingon: “[Ang pagpangahas niini] sa pagtuis sa kamatuoran ug ang paghatag ug daotang dungog peligroso kaayo. Ang kamatuoran nga gidawat sa Hudisyal nga Hunta ang apelasyon sa mga Saksi ni Jehova aron masusi hinungdanon kaayo. Ang pagbaha sa ingon niini nga emosyon ug mga insulto nga gitumong diha sa rehistradong relihiyosong mga organisasyon kinahanglang masanta.”

Human sa pagpamati sa tanang ebidensiya, ang Hudisyal nga Hunta mihinapos nga ang artikulo nga migula sa Komsomolskaya pravda supak sa balaod ug supak sa kalagdaan sa maayong pamatasan; nakita usab niini nga ang artikulo pulos kabakakan ug walay-basehanan. “Ang awtor wala maghatag ug bisan unsang espesipikong mga kamatuoran . . . Ang awtor sa publikasyon nagpakaylap ug mga hungihong ingong kasaligang mga taho, nga nag-abuso sa mga katungod sa magsusulat,” matod pa sa Hudisyal nga Hunta. Sukwahi sa gitaho sa artikulo sa mantalaan, nakita sa Hudisyal nga Hunta nga ang mga Saksi ni Jehova maoy masinundanon sa balaod ug nga sila nagtudlo sa mga membro nga magkinabuhing malinawon sa pamilya ug sa uban nga dili sama kanila ug relihiyosong mga pagtulon-an.

Usa ka oras human nadunggan ang kataposang testimonya, ang Hudisyal nga Hunta miisyu sa desisyon niini:

“1. Sa pag-admitir sa pagpatik sa artikulong ‘Sekta sa Petersburg. Aduna Unyay Siyudad-Templo Dinhi’ ingong paglapas sa mga kinahanglanon sa mga Artikulo 4, 49, ug 51 sa Russian Federation Law ‘May Kalabotan sa Palaumagian sa Balita.’

“2. Sa pagrekomendar nga ipasusi sa State Committee of the Russian Federation Responsible for Printed Matter ang bahin sa pagpasidaan sa hunta sa editoryal sa mantalaang Komsomolskaya pravda.

“3. Sa pagbadlong sa magsusulat nga si O. Zasorin.

“4. Sa pagrekomendar nga mangayog pasaylo ang hunta sa editoryal sa mantalaang Komsomolskaya pravda sa pagpatik sa dili-kasaligang impormasyon nga walay pasikaranang pagdaot sa dungog sa relihiyosong organisasyon sa mga Saksi ni Jehova.”

Kining desisyon sa Hudisyal nga Hunta nahiuyon sa mga paghinapos nga naabot sa relihiyosong eskolar ug kandidato sa pilosopiya nga si Sergei Ivanenko. Human sa mainampingong pagtuon sa mga pagtulon-an sa mga Saksi ni Jehova ug sa pagpakig-uban kanila, si G. Ivanenko, nga dili usa sa mga Saksi ni Jehova, nagsulat ug usa ka artikulo nga migula sa Pebrero 20-​26, 1997, nga isyu sa Moscow News.a Si G. Ivanenko mihinapos: “Ang mga Saksi ni Jehova mailhan sa ilang malig-ong pagtuo sa pagkinabuhi nga kaharmonya sa Bibliya. . . . Alang sa mga Saksi ni Jehova, ang Bibliya mao ang konstitusyon, ang sibil nga lagda ug ang kinatas-ang ekspresyon sa kamatuoran. . . . Ang mga Saksi ni Jehova malantaw ingong panig-ingnan sa ilang isigkalungsoranon sa ilang debosyon sa kamatuoran sa Bibliya ug sa ilang pagkaandam sa pagbarog alang sa ilang mga pagtulon-an nga dili gayod mahinakogon.”

Ang desisyon sa Hudisyal nga Hunta ug ang mga komento ni G. Ivanenko nagpamatuod na usab nga ang Kristohanong relihiyon sa mga Saksi ni Jehova dili hulga sa katilingban kondili, hinunoa, nag-alagad alang sa kaayohan sa tanang tawong matarong ug mga kasingkasing. Ang mga Saksi ni Jehova magpabiling ‘andam sa pagdepensa atubangan sa tanan nga mangayo kanila ug katarongan sa paglaom nga anaa kanila, apan magabuhat sa ingon uban ang kalumo sa buot ug halawom nga pagtahod.’​—1 Pedro 3:15.

[Footnote]