Hunawi ug Trapohi ang Imong mga Kamot!
SA UNSANG paagi kita matakdan sa ubo ug sip-on ug ubang mga impeksiyon? Sumala sa U.S. Association for Professionals in Infection Control and Epidemiology, labing menos 80 porsiyento sa maong mga sakit mapasa sa atong mga kamot, dili sa hangin. Sa pagkamatuod, ang paghunaw sa katibuk-an giisip nga mao ang bugtong labing hinungdanong paagi sa pagsanta sa pagkaylap sa sakit. Bisan pa niana, daghan ang dili manghunaw kanunay human mogamit sa kasilyas o sa dihang sila manikma o una pa mohikap ug pagkaon. Siyempre, daghan pang uban manghunaw kanunay sa ilang mga kamot sa maong mga panahon. Apan ang posibleng impeksiyon dili mawala human sa dinalidali, dinanghag nga buhat sa paghunaw.
Ang pagtrapo sa mga kamot sa hustong paagi sama usab ka hinungdanon. Ang mga tigdukiduki sa University of Westminster sa Inglaterra nakadiskobre nga daghang tawo dili manrapog maayo sa ilang mga kamot human manghunaw, ilabina kon mogamit ug mga dryer nga nagbugag init nga hangin. Taposon sa daghan ang pagpanrapo sa ilang mga kamot diha sa ilang mga sinina. Kini magpakaylap sa bisan unsang peligrosong mikroorganismo nga mabilin diha sa mga kamot. Sumala pa sa mga tigdukiduki, labing maayong trapohan gayod ug maayo ang kamot, mas maayong mogamit ug disposable, o kas-a ra gamiton nga tualyang papel, o usa ka mahinlo, wala magamit nga tualyang panapton.
Ang U.S. Centers for Disease Control and Prevention nagtanyag sa mosunod nga mga tambag sa paghunaw:
• Gamit kanunay ug mainit-init nga nag-agos nga tubig ug dili-isog nga sabon. Kon mapugos sa paggamit ug palanggana imbes nag-agos nga tubig, limpiyohi ug dis-impektahi kini matag gamit niini. Ang binasa daang mga towelette dili gayod bug-os makahinlo sa mga kamot.
• Nusnosag maayo ang duha ka kamot hangtod modaghan ang bula, ug padayon sa pagnusnos niini labing menos 15 segundos. Kuskosa ang mga ibabaw ug ang mga palad sa mga kamot maingon man sa tunga sa mga tudlo ug ilalom sa mga kuko.
• Paagasig mainit-init nga tubig ang kamot.
• Trapohi sa mahinlo kas-a ra gamiton, o wala-magamit, nga tualya, ug ayaw hikapa ang gripo o ang butanganan sa tualya sa hinlong mga kamot.
• Siradoi ang gripo pinaagi sa paggamit sa tualya ingong hanig aron dili madapat ang kamot sa kaptanan sa gripo.
• Ang kabataan angay manghunaw nga nagbarog sa gitas-on diin ang ilang mga kamot makaabot ilalom sa nag-agas nga tubig. Tabangi ang bata sa paghimo sa tanang lakang sa ibabaw, ug dayon panghunaw sa imong kaugalingong mga kamot.