Ang Hunahuna sa Bibliya

Ang Usa ba ka Kosmikong Katalagman Molaglag sa Atong Yuta?

NIADTONG Marso 12, 1998, ang mga ulohang-balita sa mantalaan, mga TV, ug mga site sa Internet sa tibuok globo nagpakaylap sa daotang balita: “Usa ka 1.5 kilometrong gilapdon nga asteroid nagsubay sa agianan nga halos mahagsa sa Yuta.” Ang mga siyentipiko ug ang ordinaryong mga tawo natarantar sa pagtimbangtimbang sa aktuwal nga kapeligrohan. Ang mga astronomo sa wala madugay mihinapos nga walay purohan nga mahagsa.

Apan, taliwala sa kaguliyang, usa ka bag-ong kaamgohan ang mitungha. “Ang labing talagsaong butang mahitungod sa dili diay tinuod nga kapeligrohan mao tingali nga, bisan unsa pa kadto ka makahahadlok, daghang tawo ang wala mahibulong niana,” matod sa U.S.News & World Report. “Ang ideya nga kita dinhi sa Yuta kinahanglang magbantay sa dugang pa nianang mga butanga​—ug magplano nga dunay buhaton bahin niana​—katingad-an gayod usa ka dekada o kapin pa kanhi, apan karon ang mga siyentipiko ug bisan ang pipila ka politiko naghunahuna nga ang kapeligrohan, bisan tuod gamay ra, maoy tinuod.”

Ang ubang mga astronomo nagtuo nga mga 2,000 ka butang sa langit nga may igong gidak-on nga makapahinabog globonhong katalagman nagasubay diha sa mga dalan nga kon dili man motabok sa orbito sa yuta, mopaduol niini. Bisan pag ang gogagmay niana nila maoy mahagsa sa yuta, matod sa mga tigdukiduki, ang pagbuto katumbas sa puwersa sa daghang nukleyar nga mga hinagiban nga nagdungan pagbuto. Ang mga sangpotanan sa maong pagkahagsa malaglagon alang sa atong planeta ug sa mga molupyo niini, tawo ug mananap.

Ang usa ka opinyon nga kasagarang wala panumbalinga sa maong dulom nga mga panagna ug mga kalkulasyon mao kanang iya sa Maglalalang sa uniberso, si Jehova nga Diyos. (Salmo 8:3; Proverbio 8:27) Diha sa Bibliya tin-aw niyang gipahibalo ang iyang kabubut-on ug katuyoan alang sa yuta ug sa tawhanong rasa. Tugotan ba niya ang usa ka kosmikong katalagman nga molaglag sa atong yuta?

Usa ka Uniberso nga Ubos sa Pagkontrolar sa Diyos

Sanglit si Jehova mao ang labing gamhanang Maglalalang sa uniberso, makataronganon ang paghinapos nga duna siyay katakos sa pagkontrolar sa bug-os sa tanang puwersa nga nagmando sa mga butang sa langit. Ang maalamong Haring Solomon miingon nga si Jehova “lig-ong nagtukod sa kalangitan pinaagi sa salabotan.” (Proverbio 3:19) Si propetang Jeremias nag-ingon nga ang Diyos mao “ang Usa kinsa pinaagi sa iyang panabot nagbuklad sa kalangitan.”​—Jeremias 51:15.

Si Jehova nagpalihok sa mga balaod ug mga puwersa luyo sa mga kalihokan sa mga butang sa langit, lakip sa mga bituon, planeta, kometa, ug mga asteroid. (Isaias 40:26) Bisan pa niana, morag gitugotan niya ang mga bituon ug mga planeta nga magpadayon sa ilang kinaiyanhong mga siklo sa mahulagwayong pagkatawo, pagkinabuhi, ug kamatayon nga walay kanunayng pagbalda gikan kaniya. Naglakip kini sa pipila ka makalilisang nga mga pagbanggaay sa mga butang sa langit. Usa ka di pa dugayng pananglitan mao ang Hulyo 1994 nga pagbanggaay diin ang mga tipak sa kometang Shoemaker-Levy 9 mihagsa ngadto sa planetang Jupiter.

Dunay geolohikong pamatuod sa dagkong mga bato gikan sa kawanangan nga mihagsa sa yuta una pa sa kasaysayan sa tawo. Apan ang mao bang panghitabo mahitabo gayod sa atong gipuy-ang planeta? Unsay malagmit nga mahitabo, pananglitan, kon ang usa ka 1.5 kilometro nga gilapdong asteroid mahagsa sa yuta? Ang astronomong si Jack Hills nagtagna nga ang pagkahagsa niini mopagula ug enerhiya nga minilyon ka pilo niadtong bomba nga nagpayhag sa Hiroshima. Kon kini mahagsa sa dagat, ang dagkong mga balod mobaha sa mga baybayon. “Diin nahimutang ang mga siyudad,” matod ni Hills, “duna lamang unyay mga hunasan.” Ang kinangil-arang esena nagtagna sa bug-os nga pagkalaglag sa tawhanong rasa. Sa unsang paagi kining maong panagna sa adlaw sa panudya moharmonya sa kabubut-on sa atong Maglalalang alang sa yuta? Ang Bibliya nagpakita nga kining planetaha dunay linaing dapit diha sa katuyoan ni Jehova.

Atong Yuta​—Gihimo nga Dunay Katuyoan

Mahitungod sa atong planeta, ang salmista nag-ingon: “Ang mga langit, iya ni Jehova ang mga langit, apan ang yuta iyang gihatag ngadto sa mga anak sa mga tawo.” (Salmo 115:16) Gihubit ni Isaias si Jehova ingong “ang Nag-umol sa yuta . . . , ang Usa nga lig-ong nagtukod niini, nga wala maglalang niini sa walay kapuslanan, nga nag-umol niini aron pagapuy-an.” (Isaias 45:18) Ang yuta mao ang panulondon nga gihatag ni Jehova sa katawhan. Ug sanglit ang atong Maglalalang naghunahuna sa walay kataposang kaugmaon alang sa mahinadlokon-sa-Diyos nga katawhan, ang yuta magpabilin sa walay kataposan ingong ilang dumalayong pinuy-anan. Ang Salmo 104:5 nagpasalig kanato: “[Si Jehova] nagpahiluna sa yuta ibabaw sa mga patukoranan niini; dili kini matarog sa panahong walay tino, o sa walay kataposan.”

Tinuod, ang Diyos nagtugot sa pipila ka dagkong mga katalagman sa atong planeta, nga miresulta sa kamatayon sa dagkong mga hugpong sa katawhan. Ang pipila niining maong mga katalagman​—sama sa mga gubat, kanihit sa pagkaon, ug mga epidemya​—sa bug-os o sa bahin gipahinabo sa kadalo, binuang, ug kabangis sa mga tawo. (Ecclesiastes 8:9) Ang uban​—sama sa mga linog, pagbuto sa mga bolkan, baha, ug mga bagyo​—gipahinabo sa kinaiyanhong mga hitabo nga wala masabti sa bug-os sa tawo. Kasukwahi sa orihinal nga katuyoan sa Diyos, ang mga tawo dili na hingpit; sila makasasala. Ingong sangpotanan, sa tinagsatagsa, dili kita makasalig niining panahona nga panalipdan sa Diyos gikan sa gitawag ug kinaiyanhong mga katalagman.

Bisan pa niana, dili gayod tugotan ni Jehova nga mameligro pag-ayo ang paglungtad sa tawo dinhi sa yuta. Sukad sa paglalang sa tawo, ang napamatud-ang kasaysayan wala maundi sa usa ka hitabo sa kinaiyanhong katalagman nga nagpameligro sa paglungtad sa tanang tawo.a

Garantisado ang Paglabang-Buhi sa Tawhanong Rasa

Sukad sa sinugdan sa kasaysayan sa tawo, ang katuyoan sa atong Maglalalang mao nga ang tawo “magapuno sa yuta ug magagahom niini.” (Genesis 1:28; 9:1) Siya nagsaad nga “ang mga matarong magapanunod sa yuta, ug sila magapuyo sa ibabaw niini sa walay kataposan.” (Salmo 37:9, 11, 22, 29) Mahitungod sa iyang mga saad, si Jehova nagpamatuod: “Ang akong tambag magapadayon, ug himoon ko ang tanan nga akong kahimut-an.”​—Isaias 46:10; 55:11; Salmo 135:6.

Ang Bibliya wala magwagtang sa bug-os sa posibilidad sa usa ka gamayng kalamidad sa yuta nga gipahinabo sa kosmikong panghitabo. Apan, makaseguro kita nga dili tugotan ni Jehova ang bisan unsang kosmikong katalagman nga mobalda sa iyang gipahayag nga katuyoan alang sa yuta ug sa tawo. Pinasikad sa mga saad sa Bibliya, kita makaseguro nga ang atong planeta padayong puy-an sa walay kataposan​—oo, mahimo kining pinuy-anan sa mga tawo sa panahong walay tino!​—Ecclesiastes 1:4; 2 Pedro 3:13.

[Footnote]