Ang Hunahuna sa Bibliya

Unsa ang Balaang Espiritu sa Diyos?

“Karon sa dihang ang tanang tawo nabawtismohan na, si jesus usab gibawtismohan ug, samtang siya nag-ampo, ang langit nabuksan ug ang balaang espiritu sa lawasnong porma sama sa usa ka salampati mikunsad nganha kaniya, ug usa ka tingog migula gikan sa langit: ‘ikaw mao ang akong anak, ang hinigugma; giuyonan ko ikaw.’”—Lucas 3:21, 22.

SA USA ka pakigpulong ngadto sa usa ka grupo sa mga pilosopo sa karaang Gresya, gitawag ni apostol Pablo ang Diyos nga “Ginoo sa langit ug yuta.” Mao kini ang Diyos, si Pablo mipahayag, kinsa “naghimo sa kalibotan ug sa tanang butang diha niini” ug kinsa “nagahatag ngadto sa tanan [nga mga persona] ug kinabuhi ug gininhawa ug tanang butang.” (Buhat 17:24-28) Giunsa pagpalampos sa Diyos kining tanan? Pinaagi sa iyang balaang espiritu, o aktibong gahom.

Nagpatin-aw usab ang Bibliya nga ang Diyos dunay “kadagaya sa dinamikong kusog, siya usab mabaskog sa gahom.” (Isaias 40:26) Oo, gilalang sa Diyos ang tibuok uniberso, nga nagpadayag sa iyang dinamikong kusog ug gahom.

Nagalihok nga Gahom

Dili kaayo tukma ang pag-ingon nga ang balaang espiritu maoy gahom sa Diyos. Tungod kini kay ang gahom mahimong walay lihok, o dili aktibong nagpuyo, diha sa usa ka tawo o sa usa ka butang, sama sa enerhiya nga gitipigan diha sa kargado apan wala gamita nga baterya. Hinunoa, ang Kasulatan nagpresentar sa espiritu sa Diyos diha sa ideya nga nagalihok, morag susama sa koryente nga molatay gikan sa gigamit nga baterya. (Genesis 1:2) Busa, ang balaang espiritu sa Diyos mao ang iyang gigamit nga enerhiya, ang iyang aktibong gahom.

Usahay ang Bibliya naghisgot sa balaang espiritu ingong nagapalampos sa usa ka buluhaton sa Diyos o ang pagkaanaa niana sa laing dapit gikan sa Diyos. (Mateo 28:19, 20; Lucas 3:21, 22; Buhat 8:39; 13:4; 15:28, 29) Ang pipila nga nagbasa nianang mga tekstoha nagtuo nga ang balaang espiritu dunay kaugalingong personalidad nga bulag sa Diyos. Nganong kini nga matang sa paghubit gigamit sa Kasulatan? Ang balaang espiritu ba usa ka persona nga bulag sa Diyos?

Naglungtad ang Labing Gamhanan nga Diyos diha sa usa ka kahimtang nga lahi gayod sa iyang materyal nga kalalangan. Espiritu siya, dili makita sa atong limitadong mga sentido. (Juan 4:24) Ang Bibliya nag-ingon nga si Jehova nga Diyos nagpuyo sa mga langit ug nga gikan didto siya nagatan-aw sa katawhan. (Salmo 33:13, 14) Masabtan kini. Kinahanglang mas dako ang Maglalalang kay sa mga elemento nga iyang gigamit. Siya ang nagmando niini, nagmaniobra niini, nag-umol niini, ug nagkontrolar niini.—Genesis 1:1.

Gikan sa iyang dili-makitang pinuy-anan, mahimong ipahinabo sa Diyos ang mga butang sa bisan unsang panahon ug bisan asa. Busa, dili na kinahanglan nga atua siya sa dapit diin ang iyang aktibong gahom nagalihok. Ikapadala niya ang iyang balaang espiritu aron sa pagpalampos sa buluhaton. (Salmo 104:30) Tingali dali kining masabtan sa mga tawo sa modernong kapanahonan nga magpaandar ug mga kasangkapan sa panimalay pinaagi sa wireless nga himan nga magkontrolar niana gikan sa layo. Karon giila nato ang gahom sa dili-makitang mga puwersa sama sa elektrisidad o mga infrared wave. Sa susama, pinaagi sa iyang dili-makitang balaang gahom, o espiritu, ang Diyos makapalampos ug bisan unsa nga iyang tuyoon sa pagbuhat, nga dili magbalhinbalhin sa iyang kaugalingon gikan sa usa ka dapit ngadto sa lain.—Isaias 55:11.

Sa kapanahonan sa Bibliya kining ideyaha tingali lisod sabton. Ang paghubit sa balaang espiritu ingong usa ka bulag nga puwersa sa walay duhaduha mitabang sa mga magbabasa sa pagsabot kon giunsa paggamit sa Diyos ang iyang gahom bisan pag wala siya didto sa dapit nga nagalihok kana. Sa dihang ang Bibliya nagtumong sa balaang espiritu ingong nagabuhat niini o niana, kini sa diwa nag-ingon nga ang Diyos mismo ang nagplano o nagpasundayag sa iyang gahom diha sa mga tawo o mga butang aron sa pagpalampos sa iyang kabubut-on.

Ang Lainlaing mga Paglihok sa Balaang Espiritu

Gigamit ni Jehova ang balaang espiritu sa paglalang sa tanang may-kinabuhi ug walay-kinabuhing mga butang. (Salmo 33:6) Gigamit usab kini sa Diyos sa paglaglag sa mapintas ug dili-mahinulsolong kaliwatan sa katawhan pinaagi sa usa ka lunop. (Genesis 6:1-22) Mao kini ang samang aktibong gahom nga gigamit sa Diyos sa pagbalhin sa bililhong kinabuhi sa iyang Anak ngadto sa tagoangkan sa Hudiyong ulay nga si Maria.—Lucas 1:35.

Usahay, gipalihok sa espiritu ang mga tawo sa pagsulti sa kamatuoran nga walay-kahadlok ug maisogon atubangan sa mga kaaway, kasagaran nagpameligro sa ilang mga kinabuhi. (Miqueas 3:8) Ug dunay daghang kahimtang diha sa Bibliya, ilabina naglangkit sa tagna, sa dihang ang mga lalaki ug mga babaye gihatagan ug talagsaong panabot o pagsabot pinaagi niining puwersaha. Sanglit walay tawo ang makatagna sa tukma kon unsay anaa sa unahan, kini maoy talagsaong paglihok sa espiritu.—2 Pedro 1:20, 21.

Makahatag usab ang espiritu sa mga indibiduwal ug milagrosong mga gahom. Pananglitan, pinaagi niining puwersaha, si Jesus nakakontrolar sa mga puwersa sa kinaiyahan, nakaayog sakit, ug nakabanhaw gani sa patay. (Lucas 4:18-21; 8:22-26, 49-56; 9:11) Ang espiritu maoy gigamit sa pag-organisar ug pagdasig sa unang mga Kristohanon sa pag-alagad ingong mga saksi sa Diyos sa tibuok yuta.—Buhat 1:8; 2:1-47; Roma 15:18, 19; 1 Corinto 12:4-11.

Gipasundayag Kanato ang Gahom sa Diyos

Posible ba alang sa tawhanong mga alagad sa Diyos karon sa pagpahimulos niining way-limiteng tinubdan sa enerhiya? Oo! Naghatag ang Diyos ug usa ka sukod sa balaang espiritu ngadto sa iyang katawhan sa pagtabang kanila sa pagsabot ug pagpalampos sa iyang kabubut-on. Ihatag niya ang iyang espiritu niadtong kinsa nagahimo ug sinsero, mainampoong paghangyo, kinsa adunay hustong panukmod sa kasingkasing, ug kinsa nagatuman sa iyang mga kinahanglanon. (1 Corinto 2:10-16) Ang maong espiritu mahimong magsangkap sa dili-hingpit nga mga tawo sa “gahom nga labaw sa kasarangan,” nga nagpaarang kanila sa pag-alagad sa Diyos nga matinumanon bisan pa sa mga kababagan. Nan, dayag nga maoy tinguha sa tanang mahinadlokon-sa-Diyos nga katawhan ang pagdawat ug paghupot sa espiritu sa Diyos.—2 Corinto 4:7; Lucas 11:13; Buhat 15:8; Efeso 4:30.

Sa dili na madugay ang Diyos mogamit niining dinamikong puwersa sa pagtapos sa inhustisya ug pag-antos niining daotang kalibotan, sa ingon magabalaan sa iyang dako ug balaang ngalan. Ang balaang espiritu bug-os nga mag-apektar sa tibuok kalibotan, ug ang mga bunga niini mahimong dayag nga makita sa tanan, nga magahatag ug himaya sa Tagmugna niini.—Galacia 5:22, 23; Pinadayag 21:3, 4.