Gikan sa Among mga Magbabasa
Bagang Kalasangan Salamat sa tin-aw ug makapahupayng impormasyon nga inyong gipatik bahin sa bagang kalasangan. (Mayo 8, 1998) Ikasubo nga makita kon sa unsang paagi ang kabuangan ug kahakog sa tawo nagalaglag sa atong planeta ug sa bililhong kahayopan ug katanoman niini. Nagpalipay kanako ang paghunahuna nga sa dili-madugay ang atong Dakong Maglalalang, si Jehova, mangilabot ug modepensa niining bililhong mutya ug sa buhing mga organismo niini.
F. A., Brazil
Malipay akong mosulti nga ang inyong artikulo naglamdag pag-ayo sa daghang suliran ug mga isyu may kalabotan sa pagkalaglag sa atong bagang kalasangan karong adlawa. Ako ilabinang buot magpasalamat kaninyo sa pagtagana sa impormasyon diha sa kataposang parapo—ang kamatuoran nga adunay paglaom alang sa atong nahibiling kalasangan ug nga ang umaabot nga kaliwatan sa bagang kalasangan seguradong mabuhi.
J. T., Australia
Mao pay pagkahuman nakog basa sa ekselenteng isyu sa magasing Pagmata! nga gihatag kanako sa usa ka mahigalaong estranyo nga usa sa mga Saksi ni Jehova. Usa ako ka membro sa Edinburgh University Ecological Society, nga mikuhag kurso sa forestry sa Edinburgh University niadtong 1939. Daghan ang gitudlo kanamo bahin sa tropikanhong bagang lasang. Pahalipayan ko kamo ug ang inyong mga kawani sa kahamili sa mga seryeng “Maluwas ba ang Atong Bagang Kalasangan?” Bug-os kong gibasa ang serye. Hinaot nga ang inyong relihiyosong kalihokan molambo. Kini molambo.
L. M., Inglaterra
Ang Tuig 2000 Ang artikulong “Ang Hunahuna sa Bibliya: Unsa ka Hinungdanon ang Tuig 2000?” diha sa Mayo 8, 1998, nga Pagmata! maoy gikahinangpang pahinumdom. Gipabilhan ko ang inyong pagkaprangka sa pagbugnaw sa bisan unsang kiling sa pagpangagpas ug ang inyong pagkamatinud-anon sa pagpatin-aw sa kanhing mga pahayag maylabot sa sukod sa panahon sa adlaw ni Jehova.
S. W., Tinipong Bansa
Nagmadaogon Bisan pa sa Kamatayon Usa ka kalipay ang pagsulat kaninyo ug salamat sa pagpatik sa mga kasinatian sa atong mga igsoon panahon sa ikaduhang gubat sa kalibotan ug pagkatapos niana, sama niadtong sa mga seryeng “Nagmadaogon Bisan pa sa Kamatayon.” (Mayo 8, 1993) Kanang seryeha nagdasig kanako sa pagpadayon sa pag-alagad kang Jehova, nga nagasunod sa mga tunob sa iyang nagmadaogong mga Saksi. Bisan ang hulga sa kamatayon wala makapahunong kanila sa paghigugma kang Jehova.
A. A., Albania
Kinabuhi ug Kamatayon sa Cambodia Salamat sa artikulong “Akong Dugayng Panaw Gikan sa Kinabuhi ug Kamatayon sa Cambodia.” (Mayo 8, 1998) Maanindot ang pag-alagad kang Jehova nga matinumanon ug ang pagkahibalo nga sama ni Wathana Meas, kinsa ingong usa ka sundalo mipatay sa uban aron mabuhi, daghan ang nagasubay sa samang dalan bisan pa sa makapasubong mga kasinatian. Nakurat ako sa pagbasa nga siya migugol ug tulo ka bulan nga nagtago sa gahong. Wala siya magdahom nga sa dili madugay iyang masinati ang kinadak-ang pribilehiyo sa iyang kinabuhi—ang pagkaila kang Jehova!
C. M. S. L., Brazil
Naghukom Ka ba Sumala sa mga Panagway? Ang mga panagway mahimong malimbongon, sumala sa maayong pagkailustrar sa sugilanon bahin kang Nasreddin Hoja. (Mayo 8, 1998) Salamat sa pagpahinumdom kanamo nga kinahanglang dili namo hukman ang uban nga mauyonon o dili mauyonon pinasukad lamang sa ilang panagway—ug nga si Jehova naghukom kanato sumala sa kahimtang sa atong kasingkasing, dili sa atong panagway.
A. O. F. A., Brazil
Ang Gugma Dili Gayod Mapakyas Kinasingkasing kong pasalamatan kamo tungod sa laktod, ekselenteng artikulong “‘Ang Gugma Dili Gayod Mapakyas’—Ikaw Mapakyas Ba?” (Mayo 8, 1998) Ang mga ideya nga giugmad may kalabotan sa lainlaing dagway sa tinuod nga gugma nakatandog pag-ayo ug nakadasig kanako, ilabina sa dihang ang artikulo miabot sa panahong gikinahanglan gayod nako ang tabang. Kombinsido na ako nga bisan unsa pay mga kahimtang, ang tinuod nga gugma dili gayod mapakyas.
S. G., Pransiya